સુરેન્દ્રનગર શહેરના મુખ્ય બસ સ્ટેન્ડમાંથી દરરોજ અમદાવાદ તેમજ રાજકોટ સહિત રાજ્યના અનેક શહેરોમાં અવરજવર માટે અંદાજે 300થી વધુ બસોની ટ્રીપ થાય છે. જેમાં નોકરીયાતો, વિદ્યાર્થીઓ સહીત મુસાફરો મુસાફરી કરે છે. ત્યારે આ બસ સ્ટેન્ડ જર્જરિત થયા બાદ વર્ષ 2014માં પાડી દેવામાં આવ્યું હતું.
આ સમય દરમિયાન અંદાજે રૂપિયા 55 કરોડના ખર્ચે નવું આધુનિક એરપોર્ટ જેવી સુવિધા ધરાવતું બસ સ્ટેન્ડ બનાવવાની રાજ્ય સરકાર તેમજ સ્થાનિક તત્કાલિન ધારાસભ્ય દ્વારા વાતો કરવામાં આવી હતી. પરંતુ તાજેતરમાં 5 વર્ષ બાદ રાજ્ય સરકારે નવા બસ સ્ટેન્ડ માટે માત્ર રૂપિયા 8.29 કરોડ જેટલી નજીવી રકમ અંગેનું ટેન્ડર બહાર પાડતા પ્રજાજનોમાં રોષ જોવા મળી રહ્યો છે.
કોગ્રેસ દ્વારા તાત્કાલિક સંપૂર્ણ સુવિધાવાળુ નવું બસ સ્ટેન્ડ બનાવવા તેમજ હાલ બસ સ્ટેન્ડમાં ઉભા કરેલા બે શેડમાં મુસાફરો માટે બેસવાની, છાંયો, ઠંડુ પાણી, સ્વચ્છ શૌચાલય સહિતની સુવિધાઓ અંગે થાળી વેલણ વગાડી વિરોધ કર્યો હતો. તેમજ ભાજપ સરકાર અને સ્થાનિક રાજકીય આગેવાનોને જગાડવાનો પ્રયાસ કર્યો હતો. સરકાર દ્વારા પ્રજાને લોલીપોપ આપી નવા બસ સ્ટેન્ડ માટે ઓછી રકમ ફાળવી હોવાનો પણ આક્ષેપ કર્યો હતો. જો આગામી દિવસોમાં યોગ્ય પગલાં નહીં લેવામાં આવે તો, ઉગ્ર આંદોલનની ચીમકી પણ ઉચ્ચારવામાં આવી હતી.
