સાબરકાંઠાઃ જિલ્લામાં કોરોના વાયરસના સંક્ર્મણને અટકાવવાના વહીવટી તંત્ર દ્વારા અનેક સરાહનિય પગલા લેવાઇ રહ્યા છે. જિલ્લામાં ગંગા સ્વરૂપ યોજનાની લાભાર્થી બહેનોને હાલની સ્થિતિમાં ઘરની બહાર પૈસા ઉપાડવા ન જવુ પડે તે માટે સાબરકાંઠા જિલ્લાની પોસ્ટ ઓફીસ દ્વારા વિધવા બહેનોને ઘરે બેઠા તેમની સહાયની રકમ ચૂકવવામાં આવી રહી છે.
લોકોને લોકડાઉનને પગલે ઘરે રહેવા સતત અપીલ કરવામાં આવી રહી છે. સાથે તેમને ઘરે બેઠા તમામ જીવન જરૂરીયાતની ચીજ-વસ્તુઓ પૂરી પાડવાની ખાત્રી આપવામાં આવી રહી છે. આ ખાત્રી માત્ર શાબ્દીક નહી વાસ્તવિક છે. જિલ્લા પોસ્ટ ઓફિસ દ્વારા ગંગા સ્વરૂપ વિધવા બહેનો તેમજ પેન્શનરોને ઘરે-ઘરે જઇ તેમની સહાય ચુકવવામાં આવી રહી છે.
લોકડાઉનને પગલે વાહન વ્યવહાર બંધ હોવાથી જરૂરીયાતમંદ અને અસહાય લોકોને પોતાની જીવન જરૂરીયાતો માટે કોઇ તકલીફ ન પડે તેનુ ધ્યાન રાખવામાં આવી રહ્યું છે. જેમાં પોસ્ટ ઓફીસના કર્મચારી દ્વારા હાલની સ્થિતિમાં સામાનની સારી સેવા કરવામાં આવી રહી છે.