વાંકાનેર તાલુકામાં અકસ્માતના બે બનાવોમાં એકનું મોત, ત્રણ ઈજાગ્રસ્ત

• વાંકાનેર તાલુકા પંથકમાં અકસ્માતના બે ઘટના બની
• છકડો રિક્ષા અને બાઈક વચ્ચે અકસ્માતમાં એકનું મોત, 2 ઇજાગ્રસ્ત
• કાર અને છકડો રિક્ષા અથડાતા એક ઇજાગ્રસ્ત

મોરબી : વાંકાનેરના ખીજડીયા રાજના રહેવાસી દેવજીભાઈ જીવનભાઈ ફાંગલીયાએ પોલીસ ફરિયાદ નોંધાવી છે કે, કારચાલકે કાર પુરઝડપે ચલાવી સિંધાવદર ખીજડીયા વચ્ચે રોડ પર ફરિયાદી દેવજીભાઈની છકડો રિક્ષા સાથે અકસ્માત સર્જ્યો હતો. આ અકસ્માતમાં યુવાનને ઈજા પહોંચી હતી. જે બાદ આરોપી પોતાની કાર લઇને ઘટના સ્થળેથી નાસી ગયો હતો. આ અંગે વાંકાનેર તાલુકા પોલીસે અકસ્માતની ફરિયાદ નોંધી વધુ તપાસ હાથ ધરી છે.

વાંકાનેરના કોઠારિયા ગામે બાઈકને રિક્ષાનો અકસ્માત

જ્યારે ટંકારાના સજ્જનપર ગામની સીમમાં રહીને મજુરી કરતા પંકજ દિપાભાઇ પરમારે પોલીસ ફરિયાદ નોંધાવી છે કે, સુકાભાઈ ધારસિંગ સંગાડા વાળા યુવાને મોટરસાયકલ લઈને જતા હતા. જે દરમિયાન કોઠારિયા ગામની સીમમાં વાંકાનેર લજાઈ રોડ પર ઓવરટેક કરતા સમયે સામેથી આવતી છકડો રિક્ષા સાથે અકસ્માત સર્જાયો હતો. આ અકસ્માતમાં બાઈકસવાર સુકાભાઈ ધારસિંગભાઈ સંગાડાનું મોત થયું હતું. જયારે ફરિયાદી પંકજભાઈ ભીલ અને રિક્ષાચાલકને ઈજા પહોંચી હોવાની ફરિયાદ નોંધાવી છે. વાંકાનેર તાલુકા પોલીસે આ ફરિયાદ નોંધી વધુ તપાસ હાથ ધરી છે.