મહેસાણાઃ રાજ્યમાં પોષણ અભિયાન અંતર્ગત મહેસાણા જિલ્લાની રાજ્યમાં શ્રેષ્ઠ કામગીરી રહી છે. નોવેલ કોરોના કારણે સમગ્ર જિલ્લામાં લોકડાઉન છે. તે સમયે જિલ્લાની આંગણવાડીની બહેનો દ્વારા સતત કાર્યરત રહી પોષણ અભિયાનમાં ઉડીને આંખે વળગે તેવી સરાહનીય કામગીરી કરી છે. મહેસાણા જિલ્લા વિકાસ અધિકારી એમ.વાય.દક્ષિણીના માર્ગદર્શન અને પ્રેરણાથી મહેસણા આઇ.સી.ડી.એસ વિભાગ ગૌરીબેન સોલંકીની આગેવાની હેઠળ કામ થઇ રહ્યું છે.
કોવિડ-19ના કપરા સમયમાં પણ મહેસાણા જિલ્લાએ સરાહનીય કામગીરી કરી રાજ્યમાં 98.63 ટકા સાથે પ્રથમ રહ્યો છે. કમિશ્નર મહિલા અને બાળ વિકાસ વિભાગ ગાંધીનગર દ્વારા આંગણવાડ઼ી કાર્યકરોને મોબાઇલ આપવામાં આવેલી છે. જેમાંથી તેમને કરેલી કામગીરીને સતત કર્મયોગીઓ અપડેટ કરી રહ્યાં છે. એપ્રિલ માસમાં ગર્વન્સ ડેસ્કબોર્ડ એન્ટ્રી રિપોર્ટ પોષણ અભિયાનમાં મહેસાણા જિલ્લો 98.63 ટકા સાથે પ્રથમ રહ્યો છે.
મહેસાણા જિલ્લાએ એચ.આર ડિસ્ટ્રીક સ્તરે 100 ટકા, એચ.આર.બ્લોકમાં 100 ટકા સહિત સુપરવિઝન, ઘર મુલાકાત અને લાભાર્થીઓના કવરેજ સહિતની અન્ય કામગીરીમાં જિલ્લા વિકાસ અધિકારીની આગેવાની હેઠળ ઉત્તમ કામગીરી કરી છે. જિલ્લામાં આઇ.સી.ડી.એસ વિભાગ દ્વારા સોમવારે વીડિયો કોન્ફરન્સ દ્વારા માર્ગદર્શન અને સુપરવિઝન કરી સતત ફોલોઅપ લેવામાં આવે છે. કોરોના અંતર્ગત જિલ્લામાં માતૃશક્તિ, પુર્ણાશક્તિ અને બાળશક્તિ આપવામાં આવે છે.
મહેસાણા જિલ્લાની માતાઓ પણ આ પેકેટમાંથી રસોઇશોની જેમ અવનવી વાનગીઓ બનાવી પોતાના બાળકોને ખવડાવે છે. આવી જ રીતે બાળશક્તિ પાઉડરમાંથી સ્વાદિષ્ટ બિસ્કીટ બનાવી પોષણ અભિયાનમાં સુપેરે કામગીરી થઇ રહી છે.
મહેસાણા જિલ્લામાં બાળ શક્તિથી બનાવેલા ગળ્યા બિસ્કીટ, પુરી, મસાલા પુડલા, હાંડવો, મસાલા ઇડલી, મુઠીયા, ચકરી જેવી વાનગીઓ અત્યારે માતૃશક્તિ, પુર્ણાશક્તિ અને બાલશક્તિના પેકેટમાંથી બનાવવામાં આવેલી છે. જિલ્લામાં વાનગી બનાવી તેનું ડોક્યુમેન્ટેશન કરવામાં આવે છે. આ ઉપરાંત ઉચ્ચ સ્તરે આ કામગીરીને મોકલવમાં આવે છે. જિલ્લામાં યોગ્ય કામગીરી કરેલા કર્મયોગીનું સન્માન કરવામાં આવે છે.
જિલ્લાએ પોષણ અભિયાનની આગેવાની લીધી છે. જિલ્લા વિકાસ અધિકારી એમ.વાય.દક્ષિણીએ વીડિયો કોન્ફન્સના માધ્યમથી તાલુકા સ્તેર તમામ આઇ.સી.ડી.એસના કર્મયોગીઓને પોષણ અભિયાનમાં કામગીરી કરવા બદલ અભિનંદન આપી પ્રોત્સાહિત કર્યા હતા. જિલ્લા વિકાસ અધિકારી એમ.વાય.દક્ષિણીના માર્ગદર્શનથી આજે મહેસાણા જિલ્લો એપ્રિલ માસના રાજ્ય સરકારના પોષણ અભિયાન અહેવાલમાં પ્રથમ નંબરે આવ્યો છે. જે આપણા માટે ગૌરવની વાત છે.
