કચ્છ: છેલ્લાં 10 દિવસોમાં કચ્છની દરિયાઇ સીમામાંથી છ વખત ચરસના પેકેટો ઝડપાયા છે. BSFની એક વિશેષ સર્ચ પાર્ટી અને NIU ની ટીમ દ્વારા જખૌના દરિયાકાંઠાના વિસ્તારમાં સઘન સર્ચ ઓપરેશન શરૂ કરાયું હતું જેના ભાગરૂપે આજે ચરસના 10 પેકેટ મળી આવ્યા છે. જખૌના દરિયા કાંઠાથી લગભગ 15 કિલોમીટર દૂર ઇબ્રાહિમ પીર બેટમાંથી શંકાસ્પદ ચરસના 10 પેકેટ જપ્ત કરવામાં આવ્યા છે.
બીએસએફ દ્વારા વધુ તપાસ હાથ ધરાઇ: રિકવર કરાયેલ ચરસના પેકેટનું વજન આશરે 1 કિલો જેટલું છે. ચરસના પેકેટને પ્લાસ્ટિકના સ્તરથી લપેટવામાં આવ્યું હતું. ચરસના પેકેટ પર 'અફઘાન પ્રોડક્ટ' પ્રિન્ટ કરવામાં આવેલ છે. ચરસની પ્રકૃતિ અને પ્રકાર અંગે હાલ બીએસએફ દ્વારા વધુ તપાસ કરવામાં આવી રહી છે.
12 એપ્રિલથી 27 ચરસના પેકેટ ઝડપાયા: ઉલ્લેખનીય છે કે 12 એપ્રિલ 2023ના રોજ પ્રથમ કન્સાઈનમેન્ટની રિકવરી બાદ શરૂ કરાયેલી સર્ચ ઓપરેશનમાંથી આ છઠ્ઠી રિકવરી છે. અત્યાર સુધીમાં 27 પેકેટ રિકવર કરવામાં આવ્યા છે. છેલ્લાં 10 દિવસોમાં જખૌના દરિયા કિનારાથી કુલ 27 પેકેટ મળી આવ્યા છે. ચરસના પેકેટો મળી આવ્યા બાદ BSFએ જખૌ કિનારે અલગ અલગ બેટ પર વ્યાપક સર્ચ ઓપરેશન શરૂ કર્યું છે. ઉલ્લેખનિય છે કે દરિયાના ઊંડા મોજાથી ચરસના પેકેટ ધોવાઈ ગયા છે અને ભારતીય દરિયાઈ સીમામાં તણાઈ આવ્યા છે.
આ પણ વાંચો KUTCH: જખૌના દરિયા કાંઠા પર આવેલા ખિદરત બેટ પાસેથી ચરસના 5 પેકેટ મળ્યા
જુદી જુદી એજન્સીઓએ 1565 ચરસના પેકેટ જપ્ત કર્યા: ભૂતકાળમાં BSF, ગુજરાત પોલીસ, કોસ્ટગાર્ડ, કસ્ટમ્સ દ્વારા કચ્છના બંદર અને ક્રીક વિસ્તારમાંથી આવા જ ચરસના પેકેટો મળી આવ્યા છે. BSF અને અન્ય તમામ એજન્સીઓએ 20 મી મે 2020થી અત્યાર સુધીમાં 1565 જેટલા ચરસના પેકેટ જપ્ત કર્યા છે.
આ પણ વાંચો Nalanda Blast: બિહારના નાલંદામાં વિસ્ફોટ, રામ નવમી પછી અહીં હિંસા ભડકી
