ખેડાઃ જિલ્લામાં છેલ્લા ચારેક દિવસથી સતત વરસાદ વરસી રહ્યો છે. ગુરૂવારે રાત્રે વિવિધ વિસ્તારોમાં ધોધમાર વરસાદ થયો હતો. જેને પગલે જિલ્લાના નીચાણવાળા વિસ્તારોમાં પાણી ભરાયા છે. નડિયાદ શહેરના વિવિધ વિસ્તારો ઉપરાંત મહુધા શહેર તેમજ તાલુકાના ગામોમાં વરસાદી પાણી ભરાઇ જતાં જનજીવન પ્રભાવિત થયું છે.
મહુધાના મહિસા, હેરંજ, ચુણેલ, ખલાડી તેમજ બલાડી સહિતના વિવિધ ગામોમાં વરસાદી પાણી ભરાઇ ગયા હતા. જેને લીધે ગામોમાં લોકડાઉન જેવી સ્થિતિનું સર્જન થયું છે. જિલ્લામાં ધમાકેદાર મેઘમહેર થઇ હતી. જેમાં નડિયાદમાં 8 ઇંચ, મહુધામાં 5 ઇંચ, વસોમાં 3.5 ઇંચ અને માતરમાં 2.5 ઇંચ વરસાદ ખાબક્યો છે.
ખેડા જિલ્લાના તાલુકાની વાત કરવામાં આવે તો 10 તાલુકામાં સાર્વત્રિક વરસાદ થયો છે. જેમાં કઠલાલ -39 mm, કપડવંજ 49 mm, ખેડા 46 mm, ઠાસરા -70, નડિયાદ-200 mm, મહુધા-130 mm, મહેમદાવાદ 66 mm, માતર-63 mm, વસો-49 MM અને ગળતેશ્વરમાં 10 mm મળી જિલ્લામાં કુલ 732 mm વરસાદ નોંધાયો છે.
