આ બાબતે રાજ્યના મુખ્યપ્રધાન વિજય રૂપાણીએ જણાવ્યું હતું કે, સૌરાષ્ટ્ર વર્ષોથી પાણી માટે પડકારનો સામનો કરતું આવ્યું છે. કોંગ્રેસના સમયમાં રાજકોટ સુધી ટ્રેનમાં પાણી પહોંચાડવું પડતું હતું. તે સમયે પીવાના પાણીની જરૂરિયાત પણ પૂર્ણ કરી શકાતી ન હતી, તેવી વિકટ પરિસ્થિતિ ગુજરાતના લોકોએ જોઇ છે. જ્યારે ગુજરાત માટે અત્યંત મહત્વાકાંક્ષી એવી “સૌની યોજના” કાર્યાન્વિત કરીને તેના હકારાત્મક પરિણામો ગુજરાતની પ્રજાને મળ્યાં છે. ત્યારે કોંગ્રેસે આ યોજનાનો વિરોધ કર્યો હતો. જો “સૌની યોજના”ની પાઇપલાઇન ન હોત, ધોળી ધજા ડેમમાંથી સૌરાષ્ટ્રને પાણી ન મળતું હોત, ઢાંકીનું પમ્પિંગ સ્ટેશન ન હોત તો આજે સૌરાષ્ટ્ર ખાલી કરવું પડ્યું હોત એવી સ્થિતિ ઊભી થઈ હોત.
આજે પાઇપલાઇન-પંમ્પિંગ સ્ટેશનો બન્યા છે. આ માટે આપણો 13 હજાર કરોડનો અંદાજ હતો. સૌરાષ્ટ્રના 115 ડેમ જોડવાનો છેલ્લો તબક્કો ચાલુ છે. એક વર્ષમાં કામ પુરૂ થવાનું છે અને તે પછી ઇન્ટરકનેક્શન દ્વારા બધા જળાશયો જોડવામાં આવશે. સાથે જ બજેટમાં પણ પાણી પર ફોકસ કરવામાં આવ્યું છે.
સૌરાષ્ટ્રના કેચમેન્ટમાં વરસાદ જ ન પડે તો ડેમો ભરાવાના નથી. 115 ડેમ ખાલી જ હોત. પરંતુ, નર્મદામાં પૂરતું પાણી હશે તો એ ડેમોમાં પાણી ટ્રાન્સફર થશે. ભાદર ડેમમાં પાણી આપવાનું ચાલુ છે. જ્યાં જ્યાં જરૂર છે ત્યાં નર્મદાના પાણી પહોંચાડ્યા છે. જેમાં 35થી વધુ જળાશયોમાં નર્મદાના પાણી પહોંચ્યા છે અને વધુ તળાવો-ચેકડેમોમાં જ્યાં જરૂર પડી ત્યાં પાણી ભર્યાં છે.
કચ્છના ટપ્પર ડેમમાં પણ નર્મદાના પાણી પહોંચાડ્યા છે. જો ટપ્પરમાં નર્મદાના પાણી પહોંચાડ્યા ન હોત તો આજે કચ્છમાં શું સ્થિતિ હોત? કચ્છમાં લોકો-પશુઓને પાણી વિના ટળવળવું પડ્યું હોત. આ યોજનાના કારણે કચ્છ સુધી પાણી પહોંચ્યું છે, સૌરાષ્ટ્ર માટે જીવાદોરી સમાન આ યોજના પૂર્ણ કરવામાં આવી છે.