વાપી: દેશના કર માળખાને સુદ્રઢ કરવા તથા નાગરિકો દ્વારા કરવામાં આવતી માલ/સેવાની ખરીદી માટે તેઓને બિલ મેળવવા પ્રોત્સાહિત કરવા સારુ “મેરા બિલ મેરા અધિકાર” નામની યોજના રાજ્ય તથા કેન્દ્ર સરકારના સંયુક્ત ઉપક્રમે તારીખ 1લી સપ્ટેમ્બર 2023 થી લઇને 1 વર્ષ માટે લાગુ કરવામાં આવી છે. ગુજરાત ખાતે આ યોજનાનો પ્રારંભ રાજ્યના નાણાં, ઉર્જા અને પેટ્રોકેમીકલ્સ પ્રધાન કનુ દેસાઈ ના હસ્તે વાપી ખાતેથી કરવામાં આવી હતી.
મેરા બિલ મેરા અધિકાર: માલ/સેવાની ખરીદી માટે તેઓને બિલ મેળવવા પ્રોત્સાહિત કરવા સારુ “મેરા બિલ મેરા અધિકાર” નામની યોજના રાજ્ય તથા કેન્દ્ર સરકારના સંયુક્ત ઉપક્રમે તારીખ 1લી સપ્ટેમ્બર 2023 થી લઇને 1 વર્ષ માટે લાગુ કરવામાં આવી છે. આ યોજના ગુજરાત, આસામ, હરિયાણા રાજ્યો અને પોંડીચેરી, દીવ-દમણ તથા દાદરા અને નગર હવેલીના સંઘ રાજ્યોના ક્ષેત્રમાં લાગુ કરવામાં આવી છે. ગુજરાત ખાતે આ યોજનાનો પ્રારંભ રાજ્યના નાણાં, ઉર્જા અને પેટ્રોકેમીકલ્સ પ્રધાન કનુ દેસાઈ તારીખ 01/09/2023 ના રોજ સવારે 11:00 કલાકે વાપી ખાતેથી કર્યો હતો.
વિવિધ માધ્યમ થકી પ્રચાર: યોજના અંગે સુરત GST વિભાગના સંયુક્ત કમિશનર કે. ડી.શુકલએ જણાવ્યું હતું કે, આ યોજના ગુજરાત સહિત 3 રાજ્ય અને 2 સંઘપ્રદેશમાં લાગુ કરવામાં આવી છે. યોજના હેઠળ તમામ માટે માસિક, ત્રિમાસિક બીલના ડ્રો કરી 10 હજારથી 1 કરોડ સુધીના પુરસ્કાર એનાયત કરવામાં આવશે. આ માટે કેન્દ્ર સરકાર અને રાજ્ય સરકાર દ્વારા 30 કરોડની સંયુક્ત ધન રાશિ ફાળવવામાં આવી છે. GST દ્વારા ગ્રાહકોના પ્રાપ્ત તમામ બીલનો કમ્પ્યુટરાઈઝડ ડ્રો કરવામાં આવશે. ગ્રાહકોને જાગૃત કરવા આ માટે વિવિધ માધ્યમ થકી પ્રચાર પ્રસાર કરવામાં આવી રહ્યો છે.
GST વાળા બિલ: આ યોજના હેઠળ GST અંતર્ગત વેરાપાત્ર માલ/સેવાની રૂપિયા 200/- કે તેથી વધુ રકમની ખરીદીના બિલ માન્ય ગણાશે. બિલની મહત્તમ રકમ નક્કી કરવામાં આવેલ નથી. આ યોજનામાં ભાગ લેનાર વ્યક્તિ દ્વારા વધુમાં વધુ એક મહિનામાં 25 બિલ અપલોડ કરી શકાશે. તારીખ 01/09/2023 અને ત્યાર પછીના બિલોને જ માન્યતા આપવામાં આવશે તથા માસિક ડ્રો માટે જે તે માસના બિલોને તે પછીના માસની 5 તારીખ સુધી અપલોડ કરી શકાશે. ત્યારે આ યોજનાનો પ્રથમ દિવસે જ સારો પ્રતિસાદ મળ્યો છે. ગણતરીના કલાકોમાં જ 6500 લોકોએ આ એપ ડાઉનલોડ કરી પોતાના GST વાળા બિલ અપલોડ કર્યા છે.
