અમદાવાદ: દેશની સુરક્ષાને લગતી ગુપ્ત માહિતી પાકિસ્તાનના એજન્ટને મોકલીને દેશની સુરક્ષાને નુકસાન પહોંચાડવા મામલે ગુજરાત ATSએ કાર્યવાહી કરી કચ્છમાંથી બીએસએફમાં નોકરી કરતા એક યુવકની ધરપકડ કરવામાં આવી છે. આરોપીની તપાસમાં સામે આવ્યું કે તે એક યુવતીના સંપર્કમાં આવ્યો હતો અને તેણે તે યુવતીને રાષ્ટ્રીય સુરક્ષાને લગતી ગુપ્ત માહિતી પહોંચાડી હતી અને જેના બદલામાં તેને ટુકડે ટુકડે પૈસા પણ મોકલવામાં આવ્યા હતા.
ચોંકાવનારા ખુલાસાઓ: હનીટ્રેપની ઘટના: ભારતીય બોર્ડર સિક્યુરિટી ફોર્સમાં કામ કરતા કર્મચારીને હનીટ્રેપમાં ફસાવી તેની પાસેથી ગુપ્ત માહિતીઓ મેળવીને દેશની સુરક્ષાને જોખમમાં મુકવામાં આવી હોવાની ઘટના સામે આવી છે. ગુજરાત એટીએસની ટીમને બાતમી મળી હતી કે ભુજ ખાતેના બીએસએફ હેડક્વાર્ટરની ઓફિસમાં નોકરી કરતો નિલેશ વાલજીભાઈ બળીયા બીએસએફની માહિતીઓ જે દેશની સુરક્ષા અને સલામતી માટે અગત્યની હોય તે માહિતી વ્હોટ્સએપના માધ્યમથી પાકિસ્તાનના એજન્ટને મોકલે છે, જે બાતમીના આધારે પોલીસે આ સમગ્ર મામલે યુવકની અટકાયત કરી તપાસ કરતા ચોંકાવનારા ખુલાસાઓ સામે આવ્યા છે.
'એટીએસને મળેલી માહિતીના આધારે કચ્છમાંથી યુવકની ધરપકડ કરી તેનો મોબાઇલ એફએસએલમાં મોકલી પ્રાથમિક તપાસ કરતા તેના પાકિસ્તાનની એજન્ટ સાથેના સંપર્કો મળી આવ્યા છે. તેણે અત્યાર સુધીમાં કયા પ્રકારની માહિતીઓ પાકિસ્તાની એજન્ટને મોકલી છે. તેને 28,800 રૂપિયા મળ્યા છે. તે કઈ કઈ જગ્યાએથી અને કોના દ્વારા મોકલવામાં આવ્યા છે? આરોપીને મળેલા પૈસા દેશના અલગ અલગ રાજ્યોમાંથી પણ મોકલવામાં આવ્યા હોવાની હકીકત સામે આવતા આ કેસમાં પાકિસ્તાની એજન્ટ સાથે ભારતના કોઈ લોકો સામેલ છે કે કેમ તે અંગે તપાસ શરૂ કરવામાં આવી છે.' -સુનિલ જોશી, SP, ગુજરાત ATS
પાકિસ્તાની મહિલા એજન્ટ સાથે સંપર્કમાં: આ મામલે ગુજરાત એટીએસની ટીમે ટેકનિકલ તપાસ કરી નિલેશ બળીયાની પૂછપરછ કરતા તેણે કબુલાત કરી હતી કે તે છેલ્લા પાંચ વર્ષથી બીએસએફ બટાલિયન 59 ના હેડક્વાર્ટસ ભુજ ખાતે CPWD વિભાગની ઓફિસમાં પટાવાળા તરીકે નોકરી કરે છે. જાન્યુઆરી 2023 માં વ્હોટ્સએપના માધ્યમથી અદિતિ તિવારી નામ ધરાવતી પાકિસ્તાની મહિલા એજન્ટ સાથે સંપર્કમાં આવ્યો હતો અને તેની સાથે મિત્રતા કાર્ડ થતા પોતે બીએસએફની ઓફિસમાં કોમ્પ્યુટર ઓપરેટર તરીકે નોકરી કરતો હોવાનું યુવતીને જણાવ્યું હતું.
ગુનો દાખલ કરવામાં આવ્યો: ગુજરાત એટીએસએ નિલેશ બળીયાની અટકાયત કરીને તેના પાસેથી કબ્જે કરેલો તેનો ફોન એફએસએલમાં મોકલતા ટેકનીકલ એનાલિસિસ કરતા તેમાંથી પાકિસ્તાન મહિલા એજન્ટ સાથેની વ્હોટ્સએપ ચેટ અને કોલ તેમજ સંવેદનશીલ અને ગુપ્ત માહિતી મોકલી હોવાના પુરાવાઓ મળી આવ્યા હતા. સાથે જ માહિતીના બદલામાં મેળવેલા પૈસાની વિગત અને બેન્ક એકાઉન્ટના સ્ટેટમેન્ટ પણ મળી આવ્યા હતા. આ સમગ્ર મામલે નિલેશ બળીયા તેમજ પાકિસ્તાની મહિલા એજન્ટ દ્વારા બીએસએફના કાર્ય ક્ષેત્રમાં આવતા વિસ્તારમાં ચાલતા બાંધતામ અને થનાર બાંધકામની ગુપ્ત અને સંવેદનશીલ માહિતી ગેરકાયદેસર રીતે નાણાકીય વળતર મેળવી આપ લે કરેલી હોય આ સમગ્ર મામલે ગુનો દાખલ કરવામાં આવ્યો છે.
તપાસ શરૂ: આ મામલે ગુજરાત એટીએસની ટીમે નિલેશ બળીયા વિરુદ્ધ IPC ની કલમ ક 121, ક 123 તેમજ 120 બી મુજબ ગુજરાતી એટીએસ ખાતે ગુનો દાખલ કરી આરોપીની ધરપકડ કરી છે અને તેને કોર્ટમાં રજૂ કરી 10 દિવસના રિમાન્ડ મેળવી અલગ અલગ મુદ્દાઓ પર તપાસ શરૂ કરી છે.
વધુ ખુલાસા થઇ શકે છે: આ મામલે ઝડપાયેલા આરોપી ધોરણ 12 સુધી અભ્યાસ કરેલો છે, અને તે પોતે પરિણીત અને એક બાળકનો પિતા છે. આરોપી ખરેખર પાકિસ્તાની એજન્ટ સાથે કઈ રીતે સંપર્કમાં આવ્યો અને ઓનલાઈન મળેલા પૈસા સિવાય તેને અન્ય કોઈ પ્રકારે પૈસા મળ્યા છે કે કેમ તેમ જ આરોપી સાથે તેની ઓફિસના કે અન્ય કોઈ અધિકારી કર્મચારી સંડોવાયેલા છે કે કેમ તે મામલે તપાસ શરૂ કરવામાં આવી છે.
રિમાન્ડ મેળવી તપાસ શરૂ: નિલેશ બળીયા છેલ્લા પાંચ વર્ષથી બીએસએફ બટાલિયન 59 માં કોન્ટ્રાક્ટ બેઝ ઉપર પટાવાળા તરીકે ફરજ બજાવતો હોય અને છ મહિનાથી યુવતીના સંપર્કમાં હોવાની માહિતી સામે આવી છે. દેશની આંતરિક સુરક્ષા અને સલામતીને લગતો ગંભીર પ્રકારનો ગુનો હોય જેથી આરોપીની પૂછપરછ માટે રાજ્ય તેમજ કેન્દ્રની વિવિધ ગુપ્તચર એજન્સીઓ સાથે મળીને પૂછપરછ કરવા માટે આરોપીના રિમાન્ડ મેળવી તપાસ શરૂ કરવામાં આવી છે.
