નવી દિલ્હી: નાણા પ્રધાન નિર્મલા સીતારમણ સંસદના આગામી બજેટ સત્ર 2023 દરમિયાન 1 ફેબ્રુઆરીએ નવા સંસદ ભવનમાં કેન્દ્રીય બજેટ 2023-24 રજૂ કરી શકે છે. આ વર્ષનું બજેટ રજૂ કરવાની તૈયારીઓ જોરશોરથી ચાલી રહી છે. સૂત્રોના જણાવ્યા અનુસાર નવા સંસદ ભવનનું નિર્માણ કાર્ય લગભગ પૂર્ણ થઈ ગયું છે અને તે જાન્યુઆરીના અંત સુધીમાં તૈયાર થઈ જવાની આશા છે. તેથી જ નવા સંસદભવનમાં યોજાનાર આગામી બજેટ સત્રની તૈયારીઓ પણ શરૂ થઈ ગઈ છે. જો કે આ અંગે અંતિમ નિર્ણય લેવાનો બાકી છે, પરંતુ લોકસભા સચિવાલયે નવા સંસદભવનમાં પ્રવેશવા માટે વિવિધ પક્ષોના સાંસદો માટે નવા ઓળખ કાર્ડ બનાવવાનું શરૂ કરી દીધું છે.
આ પણ વાંચો: Ram Setu national heritage status: રામ સેતુને રાષ્ટ્રીય ધરોહર સ્મારક જાહેર કરવાની પ્રક્રિયા શરુ
સંસદના બંને ગૃહોને સંબોધિત કરશે રાષ્ટ્રપતિ દ્રૌપદી મુર્મુ: બજેટ સત્ર 31 જાન્યુઆરીથી શરૂ થશે અને 14 ફેબ્રુઆરીથી 12 માર્ચ વચ્ચેના વિરામ સાથે 6 એપ્રિલ સુધી ચાલુ રહેવાની શક્યતા છે. પરંપરા મુજબ, 31 જાન્યુઆરીએ, બજેટ સત્રના પહેલા દિવસે, રાષ્ટ્રપતિ દ્રૌપદી મુર્મુ સંસદના બંને ગૃહોની સંયુક્ત બેઠકને સંબોધિત કરશે. 1 ફેબ્રુઆરીએ, સીતારમણ નાણાકીય વર્ષ 2023-24 માટે બજેટ રજૂ કરશે. સૂત્રોના જણાવ્યા અનુસાર સંસદભવનના નવા બિલ્ડીંગમાં રાષ્ટ્રપતિનું અભિભાષણ અને કેન્દ્રીય બજેટ બંને રાખવાના પ્રયાસો કરવામાં આવી રહ્યા છે. જો જરૂર પડે તો નવા ગૃહના બાકીના દિવસોની કાર્યવાહી જૂના સંસદ ભવનમાં ચલાવી શકાય છે.
આ પણ વાંચો: Budget 2023: બજેટ પહેલા આશા અપેક્ષાઓ વચ્ચે શેરબજારમાં તેજી થશે
નવા સંસદ ભવનથી બજેટ સત્ર શરૂ: સૂત્રોએ જણાવ્યું કે, વર્તમાન અને નવા સંસદ ભવન વચ્ચેની વાડ દૂર કરવામાં આવી છે. નવા સંસદભવનના બાહ્ય સુશોભનનું કામ શરૂ થઈ ગયું છે. જો કોઈ ટેકનિકલ સમસ્યા ન હોય તો આ વખતે નવા સંસદ ભવનથી બજેટ સત્ર શરૂ થઈ શકે છે. જો કોઈ ટેકનિકલ ખામીના કારણે આ શક્ય નહીં બને તો બજેટ સત્રનો બીજો તબક્કો નવા સંસદભવનમાં કરાવવાનો પ્રયાસ કરવામાં આવશે.
