નવી દિલ્હી/નોઈડા : ગ્રેટર નોઈડામાં એક વિચિત્ર કિસ્સો સામે આવ્યો છે, જેમાં એક પાકિસ્તાની મહિલા તેના પ્રેમને શોધવા માટે સરહદ પાર કરીને ભારત આવી હતી. આ મહિલા તેના 4 બાળકો સાથે નેપાળ થઈને પાકિસ્તાનથી ગેરકાયદેસર રીતે ભારત પહોંચી હતી અને ગ્રેટર નોઈડાના રાબુપુરામાં યુવક સાથે રહેવા લાગી હતી. પોલીસને મહિલા વિશે માહિતી મળતા જ મહિલા તેના બાળકો અને પ્રેમી સાથે ભાગી ગઈ હતી, ત્યારબાદ પોલીસે હરિયાણાના બલ્લભગઢથી મહિલાની તેના પ્રેમી સાથે ધરપકડ કરી હતી.
ઓનલાઈન ગેમ્સ દ્વારા થયો પ્રેમ : પાકિસ્તાની મહિલાએ PUBG ગેમ રમતી વખતે ગ્રેટર નોઈડાના રબુપુરાના રહેવાસી સચિન સાથે મિત્રતા કરી હતી. મિત્રતા ધીરે ધીરે પ્રેમમાં બદલાઈ ગઈ અને ત્યારબાદ બંનેએ સાથે રહેવાનું વચન આપ્યું. મહિલા ભારત આવી તે પહેલા બંને નેપાળમાં એકવાર મળ્યા હતા. આ પછી મહિલાએ પાકિસ્તાનમાં પોતાનો પ્લોટ વેચી દીધો અને ટુરિસ્ટ વિઝા પર તેના ચાર બાળકો સાથે નેપાળ પહોંચી, ત્યાંથી તે ગેરકાયદેસર રીતે ભારત આવી અને સચિન સાથે ગ્રેટર નોઈડાના રબુપુરામાં ભાડાના મકાનમાં રહેવા લાગી. અહીં મહિલા સચિન સાથે લગ્ન કરવા માટે જરૂરી દસ્તાવેજો એકત્ર કરી રહી હતી, પરંતુ ત્યારે જ પોલીસને આ મામલાની જાણ થઈ, ત્યારબાદ મહિલા શનિવારે તેના પ્રેમી અને ચાર બાળકો સાથે રબુપુરાથી ભાગી ગઈ. મહિલાએ 12 લાખ રૂપિયામાં પ્લોટ વેચ્યો હતો.
મહિલાના લગ્ન 2014માં પાકિસ્તાનમાં થયા હતા : DCPએ જણાવ્યું કે, મહિલાના લગ્ન સિંધ પ્રાંતના રહેવાસી ગુલામ હૈદર સાથે 2014માં થયા હતા. 2019માં પતિ સાઉદી અરેબિયામાં નોકરી કરવા ગયો હતો. આ દરમિયાન મહિલા સોશિયલ મીડિયા પર PUBG રમતી વખતે ગ્રેટર નોઈડાના રબુપુરાના રહેવાસી સચિનને મળી હતી. પોલીસે પાકિસ્તાની મહિલા પાસેથી બે વીડિયો કેસેટ, ચાર મોબાઈલ ફોન, એક સિમ, એક તૂટેલા મોબાઈલ ફોન, એક ફેમિલી રજિસ્ટર સર્ટિફિકેટ, ચાર બર્થ સર્ટિફિકેટ, એક મેરેજ રજિસ્ટ્રેશન સર્ટિફિકેટ, ત્રણ આધાર કાર્ડ, એક ગવર્મેન્ટ ઑફ પાકિસ્તાન નેશનલ ડેટાબેઝ અને રજિસ્ટ્રેશન જપ્ત કર્યું છે. ગૃહ મંત્રાલયની યાદી, 5 પાસપોર્ટ અને પોખરા કાઠમંડુથી દિલ્હીની બસ ટિકિટ મળી આવી છે.
કાઠમંડુની એક હોટલમાં થઈ હતી પહેલી મુલાકાત : સચિન અને મહિલા વચ્ચે મિત્રતા થયા બાદ વાતો શરૂ થઈ અને પછી બંને વચ્ચે નિકટતા વધતાં બંનેએ મળવાનો પ્રયાસ કર્યો હતો. આ પછી, તે માર્ચ 2023માં પાકિસ્તાનથી શારજાહ થઈને પ્રથમ વખત કાઠમંડુ નેપાળ પહોંચી, જ્યાં તે સચિનને મળી અને પછી કાઠમંડુની એક હોટલમાં તેની સાથે 7 દિવસ રહી. તે પછી તે પાકિસ્તાન પાછી જતી રહી હતી.
પોલીસ અને સુરક્ષા એજન્સીઓ કરી રહી છે પૂછપરછ : DCP સાદ મિયાં ખાને જણાવ્યું કે, પાકિસ્તાની મહિલાની પૂછપરછ કરવામાં આવી હતી, જેમાં તેણે સચિન સાથે લગ્ન કરવાની વાત કહી હતી. તો બીજી તરફ પૂછપરછ દરમિયાન પાકિસ્તાનમાં તેના પરિચિતોએ આપેલા નંબરો પર સંપર્ક કરવામાં આવ્યો તો તે નંબર ખોટા જણાયા હતા. આ પછી મહિલા શંકાસ્પદ લાગી રહી છે. પોલીસ અને કેન્દ્ર સરકારની સુરક્ષા એજન્સીઓ મહિલાની પૂછપરછ કરી રહી છે, જેના આધારે આગળની કાર્યવાહી કરવામાં આવશે.
