નવી દિલ્હી: મુઝફ્ફરપુર શેલ્ટર હોમ કેસમાં મુખ્ય આરોપી બ્રજેશ ઠાકુરે ટ્રાયલ કોર્ટ દ્વારા આજીવન કેદની સજા ફટકારવાના આદેશને દિલ્હી હાઈકોર્ટમાં પડકાર્યો છે. બ્રજેશ ઠાકુરને દિલ્હીની સાકેત કોર્ટે આજીવન કેદની સજા ફટકારી છે. સાકેત કોર્ટે બ્રજેશ ઠાકુર પર 32 લાખ રૂપિયાનો દંડ ફટકાર્યો હતો.
11 ફેબ્રુઆરીએ સાકેત કોર્ટના એડિશનલ સેશન્સ જજ સૌરભ કુલશ્રેષ્ઠએ મુઝફ્ફરપુર શેલ્ટર હોમ કેસમાં સજા ફટકારી હતી. સાકેત કોર્ટે ત્રણ મહિલાઓ સહિત 11 દોષિતોને આજીવન કેદની સજા ફટકારી છે. કોર્ટે 4 મહિલાઓ સહિત 6 દોષિતોને 7 વર્ષની કેદની સજા ફટકારી છે. એક મહિલાને 6 મહિનાની કેદની સજા ફટકારી હતી. જો કે, તેણે 6 મહિનાથી વધુ મહિના જેલમાં વિતાવ્યા હતા, તેથી કોર્ટે તેની છૂટા કરવાના આદેશ આપ્યો હતો.
અગાઉ બિહારની કોર્ટમાં આ કેસની સુનાવણી ચાલી રહી હતી. 7 ફેબ્રુઆરી 2019ના રોજ સુપ્રીમ કોર્ટે આ કેસની સુનાવણી બિહારથી દિલ્હીની સાકેત કોર્ટમાં ટ્રાંસફર કરી. સુપ્રીમ કોર્ટે નિર્દેશ આપ્યો હતો કે, આ કેસની સુનાવણી 6 મહિનામાં પૂર્ણ કરવામાં આવે. તે પછી, સાકેત કોર્ટે 25 ફેબ્રુઆરી 2019થી સુનાવણી શરૂ કરી.
