મહીસાગર: સંતરામપુર વિધાનસભાના ધારાસભ્ય અને કેબિનેટ કક્ષાના શિક્ષણ મંત્રી ડૉ કુબેર ડીંડોરે આજે મતદાન કર્યું છે. લોકશાહીના મહાપર્વને ઉજવવા સૌ પ્રથમ શિક્ષણ મંત્રી ડૉ કુબેર ડીંડોર પોતાના માદરે વતન ભંડારા ખાતે મતદાન માટે આવી પહોંચ્યા હતા. શિક્ષણ મંત્રી ડો કુબેર ડીંડોરે હાથમાં મોરપીંછ રાખી મતદાન કર્યું છે. અગાઉ પ્રચાર દરમિયાન પણ શિક્ષણ મંત્રી હાથમાં મોરપીંછ સાથે જોવા મળ્યા હતા. દાહોદ લોકસભા બેઠકના ઉમેદવાર જશવંતસિંહ ભાભોર જંગી લીડથી જીતશે તેવો વિશ્વાસ વ્યક્ત કર્યો છે. લોકસભા 2024ની ચૂંટણીમાં ભાજપ 400 પાર સાથે જંગી લીડથી જીતશે તેવો પણ વિશ્વાસ વ્યક્ત કર્યો અને દરેક મતદાતાઓને પોતના ઘરેથી નીકળી વધુમાં વધુ મતદાન કરવા માટેની અપીલ કરી છે.
પૂરા દેશમાં ત્રીજા ચરણનું મતદાન: શિક્ષણ મંત્રી ડૉ કુબેર ડીંડોરે જણાવ્યુ હતું કે, આજે પૂરા દેશમાં ત્રીજા ચરણનું મતદાન થઈ રહ્યું છે. તેમાં મે મારા વતન, મારી કર્મભૂમિ ભંડારા મુકામે સવારે 7 વાગ્યાના ટકોરે મતદાન કર્યું છે. આ સાથે મારા ગ્રામ્યજનો મારા તાલુકાની ધર્મપ્રેમી, કલાપ્રેમી, જનતાને, યુવાનોને, વડીલો, માતા-બહેનોને હું આહવાન કરુ છું કે, બધા પોતાના મતનો ઉપયોગ કરે. મતાધિકારી તરીકે સો ટકા મતદાન કરે એવી અપીલ પણ કરું છું. અમે આજે ઇચ્છિત ભારતના સંકલ્પને સાકાર કરવા, દેશ હિતમાં, રાષ્ટ્ર હિતમાં મેં મતદાન કરેલ છે, તમામને મારી શુભેચ્છા, સાથે સાથે તમામ મતદારો પોતાના મતનો ઉપયોગ કરે તેવી મારી નમ્ર વિનંતી છે.
