કચ્છ: આગામી લોકસભાની ચૂંટણીમાં કચ્છ-મોરબી લોકસભા બેઠકના ભાજપના ઉમેદવાર વિનોદ ચાવડા પાંચ લાખથી વધુ લીડથી વિજેતા બને તે માટે ચૂંટણીલક્ષી પ્રચાર-પ્રસાર, સાહિત્ય વિતરણ સહિતની કામગીરી વોર્ડથી લઈ બુથ સુધી પાર્ટીના સંનિષ્ઠ કાર્યકર્તા દ્વારા કરવામાં આવી રહી છે. લોકસભા ચૂંટણીમાં સારુ પરિણામ લાવવા માટે સંગઠનના હોદ્દેદારોથી લઈને પાયાના બુથ સુધીના કાર્યકરો માઈક્રોપ્લાનીંગથી કામ કરી રહ્યા છે.જેના ભાગરૂપે આજે ભુજ વિધાનસભા વિસ્તારમાં ચૂંટણી મધ્યસ્થ કાર્યાલય ખુલ્લું મૂકવામાં આવ્યું હતું.
ચૂંટણીલક્ષી કામગીરી અને સંગઠનને વધુ મજબૂત કરવા પ્રયત્નો: ચૂંટણીલક્ષી કામગીરી અને સંગઠનને વધુ સુદૃઢ કરી પ્રચાર-પ્રસાર કાર્ય અને લોકસંપર્કને વધુ વેગવંતો બનાવવા વિધાનસભા વાઇઝ કાર્યાલયો કાર્યરત કરવામાં આવી રહ્યા છે તે અંતર્ગત આજે ભુજ વિધાનસભા મધ્યસ્થ કાર્યાલયનું ઉદઘાટન સમારોહ યોજાયું હતું. જેમાં કચ્છ-મોરબી લોકસભાના ઉમેદવાર વિનોદ ચાવડા, કચ્છ જિલ્લા ભાજપ પ્રમુખ દેવજીભાઈ વરચંદ, ભુજ વિધાનસભા મતવિસ્તારના ધારાસભ્ય કેશુભાઈ પટેલ, સંગઠનના હોદ્દેદારો અને કાર્યકર્તાઓ મોટી સંખ્યામાં ઉપસ્થિત રહ્યા હતા.
દરેક વિધાનસભા બેઠક પર ભાજપને મોટી લીડ મળવાની છે તેવો વિશ્વાસ: કચ્છ મોરબી લોકસભા બેઠકના ભાજપના ઉમેદવાર વિનોદ ચાવડાએ જણાવ્યું હતું કે,લોકસભા ચૂંટણીને લઈને કચ્છ મોરબી લોકસભા બેઠકના વિવિધ વિધાનસભા મતવિસ્તારમાં ચૂંટણી મધ્યસ્થ કાર્યાલયનું ઉદ્ઘાટન કરવામાં આવી રહ્યુ છે. આગામી સમયમાં અબડાસા વિધાનસભા અને મોરબી વિધાનસભા વિસ્તારમાં ચૂંટણીના કાર્યલય ખુલ્લા મુકવામાં આવશે. કચ્છ જિલ્લા ભાજપના પ્રમુખ તેમજ આ લોકસભા બેઠકમાં સમાવિષ્ટ 7 વિધાનસભા બેઠકના ધારાસભ્યો, કચ્છ જીલ્લા પંચાયતના પ્રમુખ તેમજ મોટી સંખ્યામાં ભારતીય જનતા પાર્ટીના કાર્યકર્તાઓ ચૂંટણી પ્રચાર કરી રહ્યા છે. તેમણે કહ્યુ કે, અમને સંપૂર્ણ વિશ્વાસ છે કે કાર્યલય મારફતે ચૂંટણીલક્ષી કામો મજબૂત બનશે. દરેક વિધાનસભા બેઠક પર ભાજપને મોટી લીડ મળવાની છે તેવો વિશ્વાસ છે.
