જૂનાગઢઃ સામાન્ય રીતે 89 વર્ષની ઉંમરે પહોંચેલો કોઈ પણ વ્યક્તિ શારીરિક રીતે અશક્ત કે દુબળો જોવા મળતો હોય છે. જો કે જૂનાગઢના કલ્યાણભાઈ હુબલ આજે 89 વર્ષે પણ યુવાનોને શરમ આવે તેવી સ્ફૂર્તિ સાથે ટેબલ ટેનિસ રમી રહ્યા છે. છેલ્લા 60 વર્ષથી રોજ ટેબલ ટેનિસમાં હાથ અજમાવતા કલ્યાણભાઈ હુબલ પોતાની તંદુરસ્તી આ રમત થી જાળવી રાખે છે. યુવાનોને પણ શરમાવે તે પ્રકારે ટેબલ ટેનિસ રમતા જોવા મળી રહ્યા છે કલ્યાણભાઈ.
રાજ્ય ચેમ્પિયન પવન દેત્રોજાનો પ્રતિભાવઃ જૂનાગઢનો પવન દેત્રોજા શાળા કક્ષાએ ટેબલ ટેનિસની સ્પર્ધામાં રાજ્યમાં પાંચમું સ્થાન પ્રાપ્ત કર્યા બાદ રાષ્ટ્રીય સ્તરે યોજાતી શાળા ખેલ મહાકુંભમાં ઈન્દોર ખાતે પ્રથમ ક્રમે વિજેતા બન્યો છે. તેણે જણાવ્યું કે, ટેબલ ટેનિસમાં ભવિષ્ય ખૂબ જ સારું છે. સરકારી સહાય મળી રહી છે પરંતુ ટેબલ ટેનિસના કોચિંગને લઈને વિશ્વસ્તરીય કોઈ વ્યવસ્થા થાય તો આવનારા દિવસોમાં ગુજરાત ના ટેબલ ટેનિસ પ્લેયર્સ પણ રાષ્ટ્રીય અને આંતરરાષ્ટ્રીય કક્ષાએ ખૂબ જ સારો દેખાવ કરી શકે છે.
સ્થાનિક કક્ષાએ ટેબલ ટેનિસ સ્પર્ધાની માંગણીઃ સ્થાનિક કક્ષાએ ટેબલ ટેનિસ સ્પર્ધાનું આયોજન થાય અને તેમાં યુવાન ખેલાડીઓ શાળા કક્ષાએથી જ સ્પર્ધામાં ભાગ લેતા થાય તો ટેબલ ટેનિસમાં પણ ગુજ્જુ યુવાનો ખૂબ સારો દેખાવ કરી શકે છે. ટેબલ ટેનિસ આંતરરાષ્ટ્રીય રમત છે. ઓલમ્પિકમાં પણ તેનો સમાવેશ થાય છે. જો સ્થાનિક સ્તરે તૈયાર થતા કલાકારોને આંતરરાષ્ટ્રીય કક્ષાની તાલીમ અને માર્ગદર્શન મળે તો ગુજરાતનો કોઈ પણ ખેલાડી ટેબલ ટેનિસમાં ખૂબ ઉજ્જવળ દેખાવ કરી શકે તે માટે સમર્થ પણ જોવા મળે છે.
હું છેલ્લા 60 વર્ષથી ટેબલ ટેનિસ રમત રમું છું. મને 89 વર્ષ થયા છે. હું ટેબલ ટેનિસ રમીને શારીરિક તંદુરસ્તી જાળવું છું. આ રમતમાં યુવા ખેલાડીઓ આગળ વધે તેવું હું ઈચ્છું છું...કલ્યાણભાઈ હુબલ(89 વર્ષીય ટીટી પ્લેયર, જૂનાગઢ)
