નવી દિલ્હીઃ ભારતીય ક્રિકેટ ટીમના પૂર્વ ક્રિકેટર સચિન તેંડુલકર આજે 24 એપ્રિલના રોજ 51 વર્ષના થઈ ગયા છે. ક્રિકેટના ભગવાન કહેવાતા સચિન આજે પોતાનો 51મો જન્મદિવસ ઉજવી રહ્યો છે. સચિન માત્ર ભારતના જ નહીં પરંતુ સમગ્ર વિશ્વના મહાન ક્રિકેટરોમાંથી એક છે. તેણે પોતાની ક્રિકેટ કારકિર્દીમાં ઘણી મોટી સિદ્ધિઓ હાંસલ કરી છે.આજે અમે તેના કેટલાક ખાસ રેકોર્ડ વિશે જણાવવા જઈ રહ્યા છીએ.
સચિન તેંડુલકર સાથે જોડાયેલી કેટલીક મહત્વની વાતો
- સચિન વિશ્વનો એકમાત્ર એવો ખેલાડી છે જેણે 200 ટેસ્ટ મેચ રમી છે.
- તેણે 200 ટેસ્ટ મેચોની 329 ઇનિંગ્સમાં 1 સદી અને 68 અડધી સદી સાથે 15921 રન બનાવ્યા છે.
- સચિને ટેસ્ટ ક્રિકેટમાં 6 વખત બેવડી સદી ફટકારી છે. તેનો સર્વોચ્ચ સ્કોર 248 અકબંધ રહ્યો છે, જે બાંગ્લાદેશ સામે આવ્યો હતો.
- તેંડુલકરે તેની આંતરરાષ્ટ્રીય કારકિર્દીમાં 100 સદી ફટકારી છે અને તે આવું કરનાર વિશ્વનો પ્રથમ ખેલાડી છે.
- સચિને 463 ODI મેચોમાં 69 અડધી સદી અને 46 સદીની મદદથી 18426 રન બનાવ્યા છે.
- સચિન એવો ખેલાડી છે, જેણે અત્યાર સુધી સૌથી વધુ વનડે મેચ રમી છે.
- આ સાથે સચિન ODIમાં બેવડી સદી ફટકારનાર વિશ્વનો પ્રથમ ખેલાડી બની ગયો છે.
- તેણે ભારત માટે માત્ર 1 ટી20 મેચ રમી છે, જેમાં તે 2006માં દક્ષિણ આફ્રિકા સામે માત્ર 10 રન જ બનાવી શક્યો હતો.
સચિને પાકિસ્તાન સામે શાનદાર ઇનિંગ રમી હતી: સચિન તેંડુલકરે ICC ODI વર્લ્ડ કપ 2003માં પાકિસ્તાન સામે 98 રનની શાનદાર ઇનિંગ રમી હતી. દક્ષિણ આફ્રિકાના સેન્ચુરિયનમાં 1 માર્ચ 2003ના રોજ પાકિસ્તાન સાથેની આ મેચમાં સચિને 75 બોલમાં 12 ચોગ્ગા અને 1 છગ્ગાની મદદથી 98 રન બનાવ્યા હતા. આ સમયે પાકિસ્તાન પાસે ખતરનાક ઝડપી બોલરોની ફોજ હતી. આ પછી પણ સચિનની વિસ્ફોટક ઇનિંગના કારણે ભારતે મેચમાં પાકિસ્તાનને 6 વિકેટે હરાવ્યું હતું.
સચિનની ક્રિકેટ કારકિર્દીઃ સચિને ભારત માટે 24 વર્ષ અને 1 દિવસ ક્રિકેટ રમી હતી. તેણે 15 નવેમ્બર 1989ના રોજ 16 વર્ષની ઉંમરે પાકિસ્તાન સામે તેની આંતરરાષ્ટ્રીય ક્રિકેટમાં પદાર્પણ કર્યું હતું અને તેની છેલ્લી મેચ 14 નવેમ્બર 2013ના રોજ વાનખેડે ખાતે વેસ્ટ ઈન્ડિઝ સામે રમી હતી. સચિને તેની આંતરરાષ્ટ્રીય ક્રિકેટ કારકિર્દીમાં 664 મેચમાં 34357 રન બનાવ્યા છે. ત્રણેય ફોર્મેટમાં કુલ 201 વિકેટ પણ તેના નામે છે. સચિન ICC ODI વર્લ્ડ કપ 2011ની વિજેતા ટીમનો ભાગ હતો.
