ઈસ્લામાબાદ: પાકિસ્તાનની કાર્યવાહક સરકારે શુક્રવારે ઈસ્લામાબાદ હાઈકોર્ટના નિર્ણયને સુપ્રીમ કોર્ટમાં પડકાર્યો હતો, જેમાં સિફર કેસમાં પૂર્વ વડાપ્રધાન ઈમરાન ખાન સાથે સંબંધિત જેલની સુનાવણી રદ કરી હતી.
'ધ એક્સપ્રેસ ટ્રિબ્યુન'ના એક અહેવાલ અનુસાર, પાકિસ્તાનની સુપ્રીમ કોર્ટમાં દાખલ કરવામાં આવેલી અરજીમાં, સંઘીય સરકારે સુપ્રીમ કોર્ટને ઇસ્લામાબાદ હાઇકોર્ટના નિર્ણયને પલટાવવાની વિનંતી કરતા કહ્યું કે, હાઇકોર્ટે તથ્યોનું યોગ્ય મૂલ્યાંકન કર્યું નથી.
રિપોર્ટમાં કહેવામાં આવ્યું છે કે, 'અરજીમાં સરકારે દલીલ કરી છે કે ઈસ્લામાબાદ હાઈકોર્ટ (IHC) પાસે ગોપનીય માહિતીના કથિત લીકથી સંબંધિત સિફર કેસની સુનાવણી માટે રચાયેલી વિશેષ અદાલતને ગેરકાયદેસર જાહેર કરવાની સત્તા નથી.'
આ મામલો માર્ચ 2022માં પાકિસ્તાન દૂતાવાસ દ્વારા મોકલવામાં આવેલા રાજદ્વારી દસ્તાવેજ સાથે સંબંધિત છે તથા ખાન, 71, અને તત્કાલીન વિદેશ મંત્રી શાહ મહેમૂદ કુરેશી પર રાજકીય હેતુઓ માટે તેનો ગેરવહીવટ કરવાનો આરોપ છે. બંનેને ગયા મહિને દોષિત ઠેરવવામાં આવ્યા હતા. ખાન અને કુરેશીએ પોતાને નિર્દોષ ગણાવ્યા હતાં.
ગયા વર્ષે નવેમ્બરમાં, IHCએ સિફર કેસમાં પાકિસ્તાન તહરીક-એ-ઈન્સાફના સ્થાપક ખાનની જેલમાંથી ટ્રાયલ સંબંધિત સૂચનાને રદ કરી દીધી હતી. રિપોર્ટમાં કહેવામાં આવ્યું હતું કે IHCએ ત્રણ પાનાના સંક્ષિપ્ત આદેશમાં કહ્યું છે કે અસાધારણ સંજોગોમાં જેલમાં સુનાવણી હાથ ધરવામાં આવી શકે છે.
કોર્ટે એમ પણ કહ્યું હતું કે, જેલમાંથી સુનાવણી માટે કાર્યવાહક કેબિનેટની મંજૂરી પછી કાયદા અને ન્યાય મંત્રાલય દ્વારા 15 નવેમ્બરે બહાર પાડવામાં આવેલ નોટિફિકેશનને પૂર્વવર્તી અસરથી લાગુ કરી શકાય નહીં.
