અમદાવાદ: સૌથી મહત્વપૂર્ણ કિંમતી ધાતુઓમાં ગણવામાં આવતા સોનાના ભાવમાં સતત વધારો થઈ રહ્યો છે. સોનાની માંગમાં વધારો થઈ રહ્યો છે, જેના કારણે પીળી ધાતુના ભાવ પણ વધી રહ્યા છે અને હવે નવા રેકોર્ડ સ્તરે પહોંચી ગયા છે. જબરદસ્ત તેજી વચ્ચે સોનાએ નવા ઈતિહાસ સાથે નવા નાણાકીય વર્ષની શરૂઆત કરી છે. માર્ચ મહિનામાં સોનાના ભાવમાં 5700 રૂપિયાનો વધારો થયો હતો. તો સાથે જ એપ્રિલ મહિનામાં પણ સોનાના ભાવમાં રૂપિયા 700નો વધારો નોંધાયો છે. અમદાવાદમાં સોનાનો ભાવ 71,200 રૂપિયા બોલાયો છે. આ ભાવ દસ ગ્રામ અને 24 કેરેટનો છે.
MCX પર પ્રથમ વખત સોનાનો ભાવ 71 હજારને પાર: આંતરરાષ્ટ્રીય બજારમાં આવેલી આ જબરદસ્ત તેજીની અસર સ્થાનિક બજારમાં પણ જોવા મળી રહી છે. એમસીએક્સ પર એપ્રિલ ગોલ્ડ કોન્ટ્રાક્ટ રૂ. 69,487 પ્રતિ 10 ગ્રામના સ્તરે પહોંચ્યો હતો, જે અત્યાર સુધીના ઇતિહાસમાં સોનાનું સર્વોચ્ચ સ્તર છે. તે જ સમયે, જૂન કોન્ટ્રાક્ટની કિંમત વધીને 68,719 રૂપિયા પ્રતિ 10 ગ્રામ થઈ ગઈ છે.
વૈશ્વિક બજારમાં સોનાના ભાવમાં તેજી: આજે નાણાકીય વર્ષ 2024-25ના પ્રથમ દિવસે આંતરરાષ્ટ્રીય બજારમાં સોનાની કિંમત 2,263.53 ડોલર પ્રતિ ઔંસના રેકોર્ડ ઉચ્ચ સ્તરે પહોંચી હતી. આજે સોનાની શરૂઆત લગભગ $2,233 પ્રતિ ઔંસથી થઈ હતી, પરંતુ થોડા જ સમયમાં ભાવ તેમના નવા રેકોર્ડ ઊંચાઈએ પહોંચી ગયા હતા.
