নাজিৰা, ৮ ডিচেম্বৰ : নাগৰিকত্ব সংশোধনী বিধেয়ক ২০১৬কলৈ সমগ্ৰ ৰাজ্য উত্তাল হৈ থকাৰ সময়তে শিৱসাগৰ জিলাৰ শিমলুগুৰি ৰে'লৱে জংচনত 200 ৰো অধিক সন্দেহযুক্ত নাগৰিকক আৱদ্ধ কৰিছে স্থানীয় ৰাইজ তথা দল-সংগঠনে ৷
দেওবাৰে পুৱাই শিমলুগুৰি ৰে'লৱে জংচনত আৱদ্ধ কৰা হয় শতাধিক সন্দেহযুক্ত নাগৰিকক ৷ অ'এনজিচিৰ অন্তৰ্গত বিতৰ্কিত ঠিকাদাৰ কৃষ্ণ আগৰৱালা মালিকনাধীন "এচ কে পেট্ৰ" নামৰ কোম্পানীটোৰ ড্ৰিলিং কোম্পানীৰ কামৰ বাবে কলিকতাৰ পৰা লৈ আনিছে দুই শতাধিক সন্দেহ যুক্ত নাগৰিকক ৷ এইসকল সন্দেহ যুক্ত নাগৰিকসকলৰ পৰিচয়-পত্ৰতো দেখিবলৈ পোৱা গৈছে নানাধৰণৰ বিসংগতি ৷ ইয়াৰ লগতে তেওঁলোকে ভালদৰে নাজানে হিন্দী ভাষাও ৷ এইদৰে একাংশ সন্দেহযুক্ত লোকক শ্ৰমিক হিচাপে নিয়োজিত কৰিবলৈ অনাৰ বাবে কৃষ্ণ আগৰৱালাৰ বিৰুদ্ধে গৰজি উঠিছে স্থানীয় ৰাইজ ৷ ৰাইজৰ অভিযোগ অনুসৰি অসমীয়াই ঢেঁকী দিবও নাজানে বুলি বিতৰ্কিত মন্তব্য কৰিছে এইজন অনাঅসমীয়া ব্যৱসায়ীয়ে ৷
ঘটনাস্থলীত আৰক্ষী-প্ৰশাসনৰ লোক উপস্থিত হৈ অব্যাহত ৰাখিছে তদন্ত ৷ ৰাজ্যত নাগৰিকত্ব সংশোধনী বিধেয়ক 2016 গৃহীত হোৱাৰ প্ৰাকক্ষণত এইদৰে আৱদ্ধ কৰা 200 ৰো অধিক সন্দেহযুক্ত নাগৰিকক লৈ এতিয়া সৰৱ হৈ পৰিছে শিমলুগুৰিৰ স্থানীয় ৰাইজ তথা দল-সংগঠন ৷ কেনেকৈ কিয় এই সকল নাগৰিক শিমলুগুৰিলৈ আহিছে তাকে লৈ প্ৰতিবাদমুখৰ হৈ পৰিছে স্থানীয় ৰাইজ আৰু দল-সংগঠন ৷
আৰু পঢ়কঃ নাহৰকটীয়াত লাইনচ্যুত মালবাহী ৰে'লঃ 5 দিনলৈ ব্যাহত ৰেলসেৱা
