নগাঁও, ৪ মাৰ্চ: প'ষ্টেল বেলটৰ জৰিয়তে ভোটাধিকাৰ সাব্যস্ত কৰাক লৈ নগাঁও নিৰ্বাচনী জিলাৰ প্ৰশাসনে ভোটাৰক সজাগ কৰাৰ বাবে প্ৰয়াস কৰা পৰিলক্ষিত হৈছে । বৃহস্পতিবাৰে নগাঁৱৰ চাৰিওটা সমষ্টিত মোবাইল বাহনেৰে পৰিভ্ৰমণ কৰি এই বিষয়ত বিষদ তথ্য বৰ্ণনা কৰি ঘোষণা কৰা হয় । জিলা প্ৰশাসনৰ তৰফৰ পৰা অনুপ্ৰেৰণামূলক গীতৰ জৰিয়তে সজাগতামূলক অভিযান চলোৱা হৈছে ।
প'ষ্টেল বেলটৰ জৰিয়তে প্ৰথমবাৰৰ বাবে ভাৰতীয় নিৰ্বাচন আয়োগে একাংশ ভোটাৰক ঘৰৰ পৰাই ভোটাধিকাৰ সাব্যস্ত কৰাৰ সুযোগ প্ৰদান কৰিছে । ৮০ৰ উৰ্ধ্বৰ ভোটাৰ, COVID-১৯ত আক্ৰান্ত আৰু বিশেষভাৱে সক্ষম লোকে এই সুবিধা গ্ৰহণ কৰিব পাৰিব । ইতিমধ্যে,জিলাখনৰ চাৰিওটা সমষ্টিতে প'ষ্টেল বেলটৰ জৰিয়তে ভোটাদান কৰিব বিচৰা ভোটাৰৰ পৰা ১২(ডি)নং আবেদন পত্ৰৰ জৰিয়তে তেখেতসকলৰ তথ্যসমূহ সংগ্ৰহ কৰিছে নিৰ্বাচনী কাৰ্য়ালয়ৰ বিষয়াই ।
কোনো নাগৰিকে যদি এতিয়াও এই সুবিধা গ্ৰহণ কৰিব খোজে, তেন্তে তেওঁলোকে অহা ৬ মাৰ্চৰ ভিতৰত তেওঁলোকৰ সংশ্লিষ্ট বি এল অ'ৰ দ্বাৰা প্ৰদত্ত প্ৰমাণ পত্ৰৰ সৈতে ১২(ডি)নং আবেদন পত্ৰ দাখিল কৰি তেওঁলোকৰ ভোটাধিকাৰ সাব্যস্ত কৰিব পাৰিব ।
লগতে পঢ়ক:তিনিচুকীয়াত বৃহৎ পৰিমাণৰ নগদ ধন জব্দ
