বকো,13 জুলাই: কামৰূপৰ বকোত উদ্ধাৰ হৈছে এটা মৃতদেহ ৷ সোমবাৰে পুৱা উদ্ধাৰ হোৱা মৃতদেহটো মেধিপাৰা গাঁৱৰ দেৱেশ্বৰ দাস নামৰ ব্যক্তিগৰাকীৰ বুলি জানিব পৰা গৈছে ৷ বকোৰ আউনীআটীৰ আলেকজাৰী গাঁৱৰ মাজেৰে বৈ যোৱা বকো নৈত মৃতদেহটো ওপঙি থকা প্ৰত্যক্ষ কৰি স্থানীয় ৰাইজে খবৰ দিয়ে আৰক্ষীক । ততালিকে আৰক্ষী ঘটনাস্থলীত উপস্থিত হৈ এছডিআৰএফ বাহিনীৰ সহযোগত মৃতদেহটো উদ্ধাৰ কৰে ৷
ঘটনাৰ বিৱৰণী অনুসৰি,পেচাত এগৰাকী খেতিয়ক দেৱেশ্বৰ দাস নামৰ ব্যক্তিগৰাকীয়ে শনিবাৰে পথাৰত কাম সমাপ্ত কৰি শাওণমহীয়া বকো নৈ সাঁতুৰি পাৰ হ’বলৈ চেষ্টা কৰোতেই নৈৰ প্ৰবল সোঁতে উটুৱাই লৈ যায় ৷ শনিবাৰৰ পৰা আৰক্ষীয়ে ব্যক্তিগৰাকীৰ সন্ধান অব্যাহত ৰাখিছিল যদিও সন্ধান উলিওৱাত ব্যৰ্থ হয় ৷ পৰৱৰ্তী সময়ত অৰ্থাৎ সোমবাৰে মৃতদেহটো উদ্ধাৰ হোৱাৰ পিছত আৰক্ষীয়ে মৰণোত্তৰ পৰীক্ষাৰ বাবে মৃতদেহটো গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে ৷
লগতে চাওকঃ ক্ৰমাশ জটিল হৈ পৰিছে কাজিৰঙাৰ বান পৰিস্থিতি
