গুৱাহাটী, 14 নৱেম্বৰ: অৱশেষত বন্ধ হ’ল বিশ্ববিদ্যালয় অনুদান আয়োগ চমুকৈ ইজিচিৰ গুৱাহাটীস্থ আঞ্চলিক কার্যালয় (UGC regional office in Guwahati closed)। বিশ্ববিদ্যালয় অনুদান আয়োগে গুৱাহাটীৰ লগতে পুনে, কলকাতা, বেংগালুৰু, ভূপাল আৰু হায়দৰাবাদকে ধৰি দেশৰ ৬ টা আঞ্চলিক কার্যালয় বন্ধৰ ঘোষণা কৰিছে (UGC announces closure of 6 regional offices) । ১৩ নৱেম্বৰৰ অর্থাৎ দেওবাৰৰ পৰা কাৰ্যকৰী হোৱাকৈ ইউজিচিৰ আঞ্চলিক কার্যালয়কেইটা বন্ধ কৰি দিয়া হৈছে (University Grants Commission) ৷
এতিয়াৰে পৰা গুৱাহাটীৰ লগতে পুনে, কলকাতা, বেংগালুৰু, ভূপাল আৰু হায়দৰাবাদকে ধৰি দেশৰ ৬ টা আঞ্চলিক কাৰ্যালয়ৰ সকলো কাম-কাজ পৰিচালিত হ’ব ইউজিচিৰ দিল্লীস্থিত মুখ্য কাৰ্যালয়ৰ পৰা । আঞ্চলিক কার্যালয়সমূহৰ জৰিয়তে মহাবিদ্যালয় আৰু বিশ্ববিদ্যালয়সমূহৰ যোগাযোগ তথা তথ্যৰ আদান-প্ৰদানৰ ক্ষেত্ৰত সুচল হৈছিল যদিও এতিয়াৰ পৰা পোনপটীয়াকৈ দিল্লীৰ সৈতে যোগাযোগ কৰিব লাগিব ।
আয়োগে পুৰণি শিক্ষা নীতি অনুসৰি সমগ্ৰ দেশৰ মহাবিদ্যালয় আৰু বিশ্ববিদ্যালয়সমূহৰ সুবিধাৰ বাবে আঞ্চলিক কাৰ্যালয় স্থাপন কৰাৰ সিদ্ধান্ত লৈছিল । সেই অনুসৰি, পুনে, হায়দৰাবাদ, ভূপাল, দিল্লী, গুৱাহাটী, কলকাতা আৰু বেংগালুৰুত আঞ্চলিক কাৰ্যালয় স্থাপন কৰা হৈছিল । এই কাৰ্যালয়সমূহৰ জৰিয়তে, শিক্ষাৰ্থী, অধ্যাপক, অধ্যক্ষ আৰু মহাবিদ্যালয়ৰ বাবে আয়োগৰ বিভিন্ন আঁচনি ৰূপায়ণ কৰা হয় ।
অনুদান আয়োগৰ আঞ্চলিক কাৰ্যালয়সমূহৰ জৰিয়তে এই আঁচনিসমূহৰ সুবিধাবোৰ মহাবিদ্যালয় আৰু বিশ্ববিদ্যালয়ৰ অধ্যাপক, গৱেষক আৰু ছাত্ৰ-ছাত্ৰীসকলে প্ৰত্যক্ষভাৱে লাভ কৰিব পাৰে । সেয়েহে, নগৰাঞ্চলৰ লগতে গ্ৰাম্য অঞ্চলৰ মহাবিদ্যালয়ৰ অধ্যাপক আৰু অধ্যক্ষসকলক পোনপটীয়াকৈ দিল্লীলৈ নোযোৱাকৈ আঞ্চলিক কাৰ্যালয়ৰ জৰিয়তে অনুদান আয়োগৰ বিভিন্ন প্ৰয়োজনীয় কাম কৰিব পাৰে ।
এই ব্যৱস্থাৰ ফলত তেওঁলোকৰ সময় আৰু ধন ৰাহি হয় । অৱশ্যে এতিয়া আঞ্চলিক কাৰ্যালয়সমূহ বন্ধ হোৱাৰ বাবে, অমীমাংসিত বিষয়ৰ বাবে বা আঁচনিবোৰ সম্পূৰ্ণ কৰাৰ বাবে পোনপটীয়াকৈ দিল্লীলৈ যাব লাগিব । অনুদান আয়োগৰ কাৰ্যালয় কেন্দ্ৰীকৰণ কৰাৰ ফলত কামবোৰ অধিক জটিল আৰু সময়বহুল হৈ পৰিব । নতুন ৰাষ্ট্ৰীয় শিক্ষা নীতি বলৱৎ কৰাৰ পৰিপ্ৰেক্ষিতত দিল্লীস্থ মুখ্য কাৰ্যালয়ৰ অধিক মানৱ সম্পদৰ প্ৰয়োজন হোৱাত আঞ্চলিক কার্যালয় ৬ টা বন্ধৰ সিদ্ধান্ত লোৱা বুলি জানিব পৰা গৈছে ।
উল্লেখ্য আঞ্চলিক কার্যালয় বন্ধ কৰাৰ আলোচনা এবছৰ ধৰি চলি আছিল । আয়োগৰ জ্যেষ্ঠ বিষয়াসকলৰ বৈঠকতো এই সন্দৰ্ভত পূৰ্বতে আলোচনা অনুষ্ঠিত হৈছিল যদিও চূড়ান্ত সিদ্ধান্ত লোৱা হোৱা নাছিল । শেহতীয়াকৈ বিগত ৭ অক্টোবৰত দিল্লীত অনুষ্ঠিত আঞ্চলিক কার্যালয়ৰ যুটীয়া সচিবসকলৰ বৈঠকত কাৰ্যালয়সমূহ বন্ধ কৰি দিল্লীত থকা ইউজিচিৰ মুখ্য কাৰ্যালয়লৈ অনাৰ সিদ্ধান্ত লোৱা হয় ।
এই প্ৰক্ৰিয়া সম্পূৰ্ণ কৰিবলৈ ১৩ নৱেম্বৰৰ সময়সীমা নিৰ্ধাৰণ কৰা হৈছিল । দেশৰ মহাবিদ্যালয় আৰু বিশ্ববিদ্যালয়সমূহৰ আভ্যন্তৰীণ কাম-কাজ সূচাৰুৰূপে চলিবলৈ আয়োগৰ বিকেন্দ্ৰীকৰণৰ প্ৰয়োজন । কিন্তু এই কার্যালয়সমূহ বন্ধ হোৱাৰ বাবে অধ্যাপক আৰু অধ্যক্ষসকল অসুবিধাৰ সন্মুখীন হোৱাৰ লগতে গৱেষণা প্ৰকল্পৰ বাবেও সমস্যাৰ উদ্ভৱ হ’ব । এতিয়াৰে পৰা মহাবিদ্যালয় আৰু বিশ্ববিদ্যালয়ৰ বাবে বিভিন্ন অনুদান আঁচনিৰ তথ্য লাভ কৰিবলৈও দিল্লীত উপস্থিত হ'ব লাগিব ।
ফলত বিশ্ববিদ্যালয়সমূহৰ প্ৰশাসনিক কামত অতিৰিক্ত সময় আৰু ধন ব্যয় হ’ব । ইপিনে এই বন্ধৰ সিদ্ধান্তৰ সন্দৰ্ভত ইণ্টাৰনেটৰ যুগত আঞ্চলিক কাৰ্যালয়ৰ কোনো প্ৰয়োজন নাই বুলিহে তাৎপর্যপূর্ণ মন্তব্য কৰিছে বিশ্ববিদ্যালয় অনুদান আয়োগৰ সদস্য অধ্যাপক এম কে শ্ৰীধৰে ।
লগতে পঢ়ক: NE States Insurgency Condition : দুটা দশকত উত্তৰ পূৰ্বাঞ্চলত উন্নত হৈছে নিৰাপত্তা পৰিস্থিতি
