সাতমাইলত ড্ৰাগছৰ সৈতে আটক সৰবৰাহকাৰী

অপৰাধ অনুসন্ধান শাখা আৰু জালুকবাৰী আৰক্ষীয়ে অতৰ্কিতে চলোৱা অভিযানত নিচাযুক্ত টেবলেটসহ হাতে-লোটে ধৰা পৰে মফিজুল ইছলাম নামৰ ড্ৰাগছ সৰবৰাহকাৰীজন ৷

গুৱাহাটী, 2 মেঃ মহানগৰীৰ সাতমাইলত আটক ড্ৰাগছ সৰবৰাহকাৰী ৷ সাতমাইলৰ ৩৭নং ৰাষ্ট্ৰীয় ঘাইপথৰ পৰা বৃহস্পতিবাৰে অপৰাধ অনুসন্ধান শাখা আৰু জালুকবাৰী আৰক্ষীয়ে অতৰ্কিতে অভিযান চলাই গ্ৰেপ্তাৰ কৰে ড্ৰাগছ সৰবৰাহকাৰীজনক ৷

ড্ৰাগছ বিক্ৰীৰ বাবে সাতমাইললৈ আহিছিল মফিজুল ইছলাম নামৰ ড্ৰাগছ সৰবৰাহকাৰীজন ৷ গোপন সূত্ৰযোগে সৰবৰাহকাৰীৰ তথ্য লাভ কৰি অপৰাধ অনুসন্ধান শাখা আৰু জালুকবাৰী আৰক্ষীয়ে অতৰ্কিতে চলোৱা অভিযানত নিচাযুক্ত টেবলেটসহ হাতে-লোটে ধৰা পৰে মফিজুল ইছলাম ৷ সৰবৰাহকাৰীজনৰ পৰা আৰক্ষীয়ে জব্দ কৰিবলৈ সক্ষম হয় প্ৰায় 14 গ্ৰাম ওজনৰ মাৰাত্মক ড্ৰাগছ ৷ চাবোনৰ কেচত ভৰাই মহানগৰীৰ বিভিন্ন ঠাইত বিক্ৰীৰ বাবে আনিছিল ড্ৰাগছখিনি ৷

ধৃত মফিজুল ইছলামৰ বাসভৱনতো অভিযান চলায় আৰক্ষীয়ে ৷ উল্লেখ্য যে, ডিমাপুৰৰ পৰা এটা ড্ৰাগছ সৰবৰাহকৰী চক্ৰই পল্টনবজাৰত ড্ৰাগছ সৰবৰাহ কৰে বুলি আৰক্ষীক স্বীকাৰোক্তি প্ৰদান কৰে মফিজুল ইছলামে ৷ পল্টন বজাৰৰ পৰাই মফিজুল ইছলামৰ দৰে বিভিন্ন স্থানীয় সৰবৰাহকাৰীয়ে গুৱাহাটীৰ বিভিন্ন প্ৰান্তত বিক্ৰী কৰে ড্ৰাগছ ৷ মফিজুলৰ আটকৰ পাচতেই বৃহৎ ড্ৰাগছ সৰবৰাহকাৰী চক্ৰৰ ঘাটি উচ্ছেদ কৰিবলৈ সক্ষম হ'ব বুলি আশাবাদী মহানগৰ আৰক্ষী ৷