গুৱাহাটী, ২৫ ছেপ্তেম্বৰ: অসম আৰক্ষীৰ সঞ্চালক প্ৰধান ভাস্কৰজ্যোতি মহন্তৰ বিৰুদ্ধে বিশেষাধিকাৰ ভংগৰ অভিযোগ উত্থাপন কৰি শনিবাৰে নিশা বিধানসভাৰ অধ্যক্ষ বিশ্বজিৎ দৈমাৰীৰ হাতত এক অভিযোগ পত্ৰ দাখিল কৰে কংগ্ৰেছৰ বিধায়িনী দলে ।
কংগ্ৰেছ বিধায়িনী দলৰ উপ-দলপতি ৰকিবুল হুছেইনৰ নেতৃত্বত যোৱা বিধায়কৰ দলটোৱে আৰক্ষী সঞ্চালক প্ৰধান গৰাকীৰ বিৰুদ্ধে শীঘ্ৰে শাস্তিমূলক ব্যৱস্থা গ্ৰহণ কৰিবলৈও অধ্যক্ষৰ ওচৰত দাবী জনায় ।
অভিযোগ পত্ৰখনত কংগ্ৰেছ বিধায়িনী দলে উল্লেখ কৰে যে, শুকুৰবাৰে ছিপাঝাৰত আৰক্ষী সঞ্চালক প্ৰধান গৰাকীয়ে সংবাদ মাধ্যমৰ আগত "মই পুলিচ । বিধায়ক চিধায়ক নামানো" বুলি মন্তব্য কৰিছিল । তেওঁৰ এনে মন্তব্যই কেৱল বিধায়ক সকলকে অপমান কৰা নাই । পবিত্ৰ বিধানসভাকো অপমান কৰিছে ।
সেয়েহে বিশেষাধিকাৰ ভংগৰ অভিযোগত আৰক্ষী সঞ্চালক প্ৰধান গৰাকীৰ বিৰুদ্ধে শীঘ্ৰে ব্যৱস্থা গ্ৰহণৰ বাবে কংগ্ৰেছ বিধায়িনী দলে অধ্যক্ষৰ ওচৰত দাবী তোলে ।
লগতে পঢ়কঃ মুখ্যমন্ত্ৰীৰ Intelligence বিফল হোৱাৰ বাবেই গৰুখুটিৰ ঘটনা সংঘটিত হৈছে : লুৰীণ
