হোজাই, 3 আগষ্ট: বুধবাৰে হোজাই জিলাৰ আৰক্ষী অধীক্ষকৰ কাৰ্যালয়ত উপস্থিত হৈ অসম আৰক্ষীৰ উপ-মহাপৰিদৰ্শক সত্য ৰাজ হাজৰিকাই যোৱা সোমবাৰে নিশা লামডিঙৰ কৃষ্ণবস্তিৰ শালবাগানত অৰ্ধ উলংগ অৱস্থাত এগৰাকী ছাত্ৰীৰ মৃতদেহ উদ্ধাৰ হোৱা ঘটনাৰ সন্দৰ্ভত(Girl allegedly Raped And Killed in Hojai)এক সংবাদমেল সম্বোধন কৰে ৷
তেওঁ কয় যে, ইতিমধ্যে হোজাই জিলা আৰক্ষীয়ে উক্ত ঘটনা সন্দৰ্ভত ক্ষীপ্ৰতাৰে অনুসন্ধান চলাই তিনিজন লোকক আটক কৰিবলৈ সক্ষম হৈছে । আটকাধীন অভিযুক্তকেইজন ক্ৰমে লামডিং নিবাসী মিঠুন পাল, দিলীপ সাহু আৰু কনক চন্দ্ৰ দাস । ইয়াৰে দুজনে ইতিমধ্যে তেওঁলোকে কৰা অপৰাধৰ কথা স্বীকাৰ কৰা বুলি জানিবলৈ দিয়ে (DIG Satyaraj Hazarika on Hojai Rape Case) ।
মিঠুন পালৰ বিৰুদ্ধে পূৰ্বেও লামডিং আৰক্ষী থানাত গোচৰ ৰুজু আছে বুলি জনায় সত্য ৰাজ হাজৰিকাই । লগতে তেওঁ কয় যে আজি তিনিজন অপৰাধীক শংকৰদেৱ নগৰ আদালতত হাজিৰ কৰোৱাৰ লগতে আদালতৰ পৰা তিনি অভিযুক্তক সোধপোছৰ বাবে একসপ্তাহ আৰক্ষীৰ জিম্মাত বিচৰা হৈছে । আনহাতে, ঘটনা সন্দৰ্ভত বৰ্তমানেও তদন্ত চলি আছে বুলি উপ মহাপৰিদৰ্শক সত্য ৰাজ হাজৰিকাই জানিবলৈ দিয়ে ।
