মৰাণ, 4 ছেপ্তেম্বৰ : প্ৰাক্তন কংগ্ৰেছী তথা প্ৰাক্তন বিধায়ক সুশান্ত বৰগোঁহাইৰ বিৰুদ্ধে সৰৱ হৈ উঠিছে থাওৰা কংগ্ৰেছ । ডিমৌৰ ৰাজীৱ ভৱনত থাওৰা ব্লক কংগ্ৰেছে এক সংবাদমেল সম্বোধন কৰি সদ্য বিজেপি নেতা সুশান্ত বৰগোঁহাইক তীব্ৰ সমালোচনা কৰে ।
থাওৰা ব্লক কংগ্ৰেছৰ সভাপতি ডম্বৰু টাওৱে সংবাদমেলত প্ৰাক্তন বিধায়ক গৰাকীয়ে চৰকাৰী ই-ৰিক্সা বিতৰণ কাৰ্যসূচীত মুখ্য অতিথি হিচাপে কেনেকৈ অংশগ্ৰহণ কৰিব পাৰে বুলি প্ৰশ্ন উত্থাপন কৰে ৷ ডম্বৰু টাওৱে লগতে কয় যে, সুশান্ত বৰগোঁহাই বৰ্তমান এজন সাধাৰণ ব্যক্তি ।
তেওঁ চলে-বলে থাওৰাৰ কংগ্ৰেছ কৰ্মীসকলক মিছা প্ৰতিশ্ৰুতি প্ৰদান কৰি বিজেপিলৈ নিয়াৰ চক্ৰান্ত কৰি অহা বুলিও গুৰুত্বপূৰ্ণ অভিযোগ উত্থাপন কৰে । ব্লক কংগ্ৰেছৰ সভাপতিগৰাকীয়ে প্ৰাক্তন বিধায়কগৰাকীক এনে কাৰ্যৰ পৰা বিৰত থাকিবলৈ সকিয়াই দিয়ে । সুশান্ত বৰগোঁহায়ে বিধানসভাৰ অধ্যক্ষক দিয়া বিধায়কৰ পদত্যাগ পত্ৰ গৃহিত হোৱা-নোহাৱাৰ সন্দৰ্ভতো প্ৰশ্ন কৰে ৷
যদি পদত্যাগ পত্ৰ গৃহিত হ'ল, তেন্তে কেনেদৰে সুশান্ত বৰগোঁহায়ে এছক’ৰ্টযুক্ত বাহন ব্যৱহাৰ কৰি ঘূৰি ফুৰিছে বুলি টাওৱে বিধানসভাৰ অধ্যক্ষ বিশ্বজিৎ দৈমাৰীক সংবাদমেলযোগে প্ৰশ্ন কৰে । সংবাদমেলত জিলা কংগ্ৰেছৰ সভাপতি লক্ষীনাথ সন্দিকৈ, শিৱসাগৰ জিলাৰ আইন অধ্যক্ষ বিদ্যুৎ গগৈ, থাওৰা ব্লক কংগ্ৰেছৰ কোষাধ্যক্ষ প্ৰশান্ত বৰগোঁহাই আৰু মিডিয়া বিভাগৰ শিৱসাগৰ জিলাৰ সভাপতি বিজিত দত্ত উপস্থিত থাকে ।
লগতে পঢ়ক : লক্ষ্য ভৱানীপুৰ : বিজেপিৰ উপ নিৰ্বাচন সমিতি গঠন
