বৰপেটা,৪ এপ্ৰিল: চেঙা সমষ্টিৰ অগপ-বিজেপি-ইউপিপিলৰ মিত্ৰজোঁটৰ তথা অগপৰ প্ৰক্ষেপিত প্ৰাৰ্থী ৰবিউল হুছেইনৰ সমৰ্থনত দেওবাৰে বৰপেটাৰ বহৰিত অনুষ্ঠিত হয় নিৰ্বাচনী সভা । বহৰি মিনি ষ্টেডিয়ামত অনুষ্ঠিত এই নিৰ্বাচনী সভাত অংশগ্ৰহণ কৰি ভাষণ প্ৰদান কৰি মুখ্যমন্ত্ৰী সৰ্বানন্দ সোণোৱালে কয় যে, কংগ্ৰেছ চৰকাৰৰ দিনত গোষ্ঠীগত সংঘৰ্ষ হৈছিল ৷ এই সংঘৰ্ষত সংখ্যালঘু লোক যথেষ্ট ক্ষতিগ্ৰস্ত হৈছিল ৷ কিন্তু বিজেপি চৰকাৰৰ দিনত ৰাজ্যৰ কোনো ঠাইত গোষ্ঠীগত সংঘৰ্ষ হোৱা নাই বুলি তেওঁ উল্লেখ কৰে ৷ এই চৰকাৰে সকলো ধৰ্মৰ লোকক মৰ্যদা সহকাৰে সুৰক্ষা দিয়া বুলিও তেওঁ কয় ৷
অসমত বসবাস কৰা প্ৰতিগৰাকী ভূমিহীন নাগৰিকক মাটিৰ পট্টা প্ৰদান কৰিব বুলিও মুখ্যমন্ত্ৰী গৰাকীয়ে ভাষণ প্ৰসংগত উল্লেখ কৰে ৷ সভাখনত অগপ সভাপতি তথা কৃষি মন্ত্ৰী অতুল বৰা, মন্ত্ৰী কেশৱ মহন্ত আৰু অগপ প্ৰাৰ্থী ৰবিউল হুছেইনও ভাষণ প্ৰদান কৰে ৷
লগতে পঢ়কঃ হাগ্ৰামাক চিৰদিনৰ বাবে হুজুৰে বন্দী কৰিছে: হিমন্ত বিশ্ব শৰ্মা
