চিটাৰা ডেস্ক, ৬ ডিচেম্বৰ: জ’য়া আখতাৰ পৰিচালিত দ্য আৰ্চিছ ছবিৰে বহু তাৰকা সন্তানে অভিনয় জগতত পাতনি মেলিব । দ্য আৰ্চিছৰ জৰিয়তে বলীউডত আত্মপ্ৰকাশ কৰিব কিংবদন্তি অভিনেত্ৰী শ্ৰীদেৱী আৰু চলচ্চিত্ৰ নিৰ্মাতা বনী কাপুৰৰ কনিষ্ঠ কন্যা খুশি কাপুৰ, শ্বাহৰুখ খানৰ কন্যা সুহানা খান আৰু অমিতাভ বচ্চনৰ নাতি অগস্ত্য নন্দই । মঙলবাৰে সন্ধিয়া দ্য আৰ্চিছৰ বিশেষ দৰ্শনীৰ আয়োজন কৰা হয় । য’ত বহু চলচ্চিত্ৰ তাৰকাই নিজৰ গ্লেমাৰছ লুকেৰে সকলোৰে দৃষ্টি আকৰ্ষণ কৰিছিল । কিন্তু বলীউড জগতত নিজৰ যাত্ৰা আৰম্ভ কৰিবলৈ ওলোৱা খুশী কাপুৰে তেওঁৰ সাজৰে এই দৰ্শনীত সকলোৰে দৃষ্টি আকৰ্ষণ কৰে ৷ খুশী কাপুৰে পৰিধান কৰা সাজৰ বাবে ছ’চিয়েল মিডিয়াতো যথেষ্ট প্ৰশংসা লাভ কৰে ।
খুশী কাপুৰে মাতৃৰ গাউন পৰিধান কৰি ৰেড কাৰ্পেটত খোজ দিয়ে
হয়, খুশী কাপুৰে প্ৰথমখন ছবিৰ দৰ্শনীত মাতৃ তথা কিংবদন্তি অভিনেত্ৰী শ্ৰীদেৱীৰ পুৰণি গাউন পৰিধান কৰি উপস্থিত হয় । খুশী কাপুৰৰ বাবে প্ৰথমখন ছবিৰ দৰ্শনী বিশেষ হোৱাৰ লগতে সেয়া এক আবেগিক মুহূৰ্তও আছিল । এই বিশেষ মুহূৰ্তটোত নিশ্চয় খুশীয়ে নিজৰ মাতৃক স্মৰণ কৰিছে, যাৰ বাবে অভিনেত্ৰীগৰাকীয়ে পৰিধান কৰিছিল মাতৃৰ পুৰণি গাউন ৷ খুশীয়ে মাতৃৰ ৰূপালী গাউনৰ লগতে তেওঁৰ গহনাবোৰো পৰিধান কৰিছিল । উল্লেখ্য যে, দ্য আৰ্চিছৰ দৰ্শনীত খুশীয়ে পৰিধান কৰা ৰূপালী গাউনটো ২০১৩ চনত আই আই এফ এৰ ৰেড কাৰ্পেটত পৰিধান কৰিছিল প্ৰবীণ অভিনেত্ৰী শ্ৰীদেৱীয়ে ।
দ্য আৰ্চিজৰ সৈতে বলীউডত আত্মপ্ৰকাশ কৰিব খুশী কাপুৰে
দ্য আৰ্চিজ পৰিচালনা কৰিছে জ’য়া আখতাৰে । এই ছবিখন আমেৰিকাৰ কমিক বুক ছিৰিজ দ্য আৰ্চিছৰ পৰা অনুপ্ৰাণিত । দ্য আৰ্চিছৰ কাহিনী ৬০ ৰ দশকৰ আৰু ই ৰিভাৰডেল নামৰ এটা পাহাৰীয়া ষ্টেচনৰ আশে-পাশে ঘূৰি থাকে । প্ৰেম আৰু বন্ধুত্বৰ লগতে ছবিখনত এক বিশেষ সামাজিক বাৰ্তাও দিয়া হৈছে । দ্য আৰ্চিজ ছবিখনত ভেৰ’নিকাৰ চৰিত্ৰত অভিনয় কৰিছে সুহানা খানে । বেটী কাপুৰৰ চৰিত্ৰত অভিনয় কৰিছে খুশী কাপুৰে । বেটী কাপুৰক ছবিখনত ভেৰ’নিকা আৰু আৰ্চি এণ্ড্ৰুজৰ (অগস্ত্য নন্দ) বেষ্ট ফ্ৰেণ্ড হিচাপে দেখা যাব । অহা ৭ ডিচেম্বৰৰ পৰা অ’টিটি প্লেটফৰ্ম নেটফ্লিক্সত প্ৰচাৰ হ’ব ছবিখন ।
লগতে পঢ়ক: শ্বাহৰুখৰ কন্যা, অমিতাভৰ নাতিক সমৰ্থন কৰিবলৈ দ্য আৰ্চিছৰ দৰ্শনীত উপস্থিত সমগ্ৰ বলীউড
