নগাঁও, 3 নৱেম্বৰ : প্ৰাচীন লোককলাৰ অন্যতম পুতলা নাচ । সম্প্ৰতি আধুনিকতাৰ ধামখুমীয়াত যেন ক্ৰমাৎ হেৰাই যাব ধৰিছে প্ৰাচীন লোককলাৰ অন্যতম পুতলা নাচ । ইয়াৰ মাজতে পুতলা নাচ জীয়াই ৰখাৰ বাবে অহৰহ চেষ্টা অব্যাহত ৰাখিছে নগাঁৱৰ এটা শিল্পী দম্পতীয়ে । নাম গিৰিধৰ সেনাপতি আৰু পত্নী পদ্মা সেনাপতি । নগাঁও জিলাৰ ভালুকমাৰীৰ গিৰিধৰ সেনাপতিয়ে ১৯৭৭ চনতে জড়িত হৈ পৰিছিল শ্ৰীমন্ত শংকৰদেৱ পুতলা নাচ দলৰ সৈতে ।
হাতীচোং মৌজাৰ পশ্চিম অঞ্চল কাকমাৰীৰ বেথাৰাম বৰাৰ পুতলা নাচ দলৰ সৈতে জড়িত হৈ পৰৱৰ্তী সময়ত ১৯৭৯ চনত নিজেই জন্ম দিয়ে নৱৰত্ন পুতলা থিয়েটাৰৰ । সেই সময়ৰ পৰাই পুতলা থিয়েটাৰ ভ্ৰাম্যমাণ হিচাপে প্ৰদৰ্শন কৰি আহিছে গিৰিধৰ সেনাপতিয়ে । সেই সময়ত হাতীচোং অঞ্চলটোৰ পৰা কেবাটাও পুতলা থিয়েটাৰৰ দল জন্ম হৈছিল যদিও পৰৱৰ্তী সময়ত পুতলা থিয়েটাৰ সমূহ বন্ধ হৈ পৰে । অৱশ্যে আজি পৰ্যন্ত এই কলাবিধ জীয়াই ৰখাৰ চেষ্টা কৰি আহিছে গিৰিধৰ সেনাপতিয়ে ।
গিৰিধৰ সেনাপতিৰ পুতলা থিয়েটাৰ দলটোৱে মঞ্চত লক্ষীন্দৰ বেউলা, সাবিত্ৰী-সত্যবান, ভক্ত প্ৰহ্লাদ, অকাল বোধন, দক্ষ যজ্ঞ, ৰজা হৰিচন্দ্ৰ, গাভৰু জুই, নাঙঠ মানুহ আদি পৌৰাণিক আৰু সামাজিক নাটক মঞ্চস্থ কৰি আহিছে । গিৰিধৰ সেনাপতিৰ এই শিল্পকৰ্মত আৰম্ভণিৰ পৰাই সহযোগ কৰি আহিছে গিৰিধৰ সেনাপতিৰ পত্নী পদ্মা সেনাপতিয়ে । গিৰিধৰ সেনাপতিৰ লগত পত্নী পদ্মা সেনাপতিয়ে পুতলা নির্মাণ, পুতলাৰ সাজসজ্জা প্ৰস্তুত কৰা, পুতলা নচুওৱা, গীত গোৱা, বাদ্য সংগত কৰা, সংলাপ দিয়া আদি কামত সম্পূৰ্ণ সহযোগ কৰি আহিছে ।
এই শিল্পী দম্পতীয়ে প্ৰাচীন লোককলা জীয়াই ৰখাৰ অশেষ চেষ্টা অব্যাহত ৰাখিছে যদিও বিগত দুটা বছৰে ক'ভিড সৃষ্ট পৰিবেশৰ বাবে তীব্ৰ প্ৰত্যাহ্বানৰ সন্মুখীন হৈ পৰিছে । ক'ভিড সৃষ্ট জটিল পৰিবেশৰ সময়ত চৰকাৰৰ এককালীন সাহায্য লাভ কৰিছে যদিও এই শিল্পী দম্পতীয়ে আজি পৰ্যন্ত লাভ কৰা নাই নিয়মীয়া শিল্পী পেঞ্চন । সম্প্ৰতি তীব্ৰ আৰ্থিক সংকটত ভোগা এই শিল্পী দম্পতীয়ে শিল্পী পেঞ্চন লাভ নকৰাত অসন্তুষ্ট পৰিয়ালটো । শিল্পী দম্পতীয়ে চৰকাৰৰ শিল্পী পেঞ্চন কেতিয়া লাভ কৰে সেয়া এক বৃহৎ প্ৰশ্ন হৈ পৰিছে পৰিয়ালটোৰ বাবে ।
লগতে পঢ়ক : আমগুৰিৰ হাফলুটিঙত ৰাসৰ বাবে মুখাশিল্পীৰ ব্যস্ততা
