গুৱাহাটী, 30 মাৰ্চ : গুৱাহাটী পৌৰ নিগমৰ ৬০টা ৱাৰ্ডৰ নিৰ্বাচনৰ বাবে মুঠ ২১২ গৰাকী প্ৰাৰ্থীয়ে দাখিল কৰিছে মনোনয়ন(212 candidates files nominations for GMC election) । ইয়াৰে বিজেপিৰ ৫৩ গৰাকী, অগপৰ ৭ গৰাকী, কংগ্ৰেছৰ ৫৯ গৰাকী, অসম জাতীয় পৰিষদৰ ২৬ গৰাকী, আম আদমী পাৰ্টীৰ ৩৭ গৰাকী প্ৰাৰ্থীয়ে দাখিল কৰিছে মনোনয়ন ৷
অসম ৰাজ্যিক নিৰ্বাচন আয়োগে ৩০ মাৰ্চ অৰ্থাৎ বুধবাৰে মনোনয়ন দাখিলৰ শেষ দিন নিৰ্ধাৰণ কৰিছিল । ৪ এপ্ৰিললৈ মনোনয়ন প্ৰত্যাহাৰ কৰাৰ শেষ দিন নিৰ্ধাৰণ কৰা হৈছে । অহা ১৯ এপ্ৰিলত অনুষ্ঠিত হ'ব গুৱাহাটী পৌৰ নিগমৰ নিৰ্বাচন । পুৱা ৭.৩০ বজাৰ পৰা বিয়লি ৪.৩০ বজালৈ অনুষ্ঠিত হ'ব ভোটগ্ৰহণ । ২১ এপ্ৰিলত হ’ব ভোটগণনা ।
সেইদিনা পুৱা ৮ বজাৰ পৰা আৰম্ভ হ’ব ভোটগণনা । ৬০ টা ৱাৰ্ডত মুঠ ৭ লাখ ৯৬ হাজাৰ ৮২৯ জন ভোটাৰ আছে । ইয়াৰে পুৰুষ ভোটাৰ আছে ৩ লাখ ৯৬ হাজাৰ ৮৯১ গৰাকী, মহিলা ভোটাৰ আছে ৩ লাখ ৯৯ হাজাৰ ৯১১ গৰাকী আৰু তৃতীয় লিঙ্গৰ আছে ২৭ গৰাকী ভোটাৰ । নিৰ্বাচনত ৫০ শতাংশ আসন মহিলাৰ বাবে সংৰক্ষিত কৰা হৈছে । এগৰাকী প্ৰাৰ্থীয়ে নিৰ্বাচনত ২ লাখ ৫০ হাজাৰ টকা খৰছ কৰিব পাৰিব । মুঠ ভোটকেন্দ্ৰ ৭৮৯ টা নিৰ্দ্ধাৰণ কৰা হৈছে ।
ইপিনে গুৱাহাটী পৌৰ নিগম নিৰ্বাচনৰ বাবে ভাৰতীয় জনতা পাৰ্টী, অসম প্ৰদেশৰ ৫৩ জন প্ৰাৰ্থীৰ লগতে মিত্ৰদল অগপৰ ৭ জনকৈ প্ৰাৰ্থীয়ে বুধবাৰে দলীয় সমৰ্থকৰ উপস্থিতিৰ মাজেৰে কামৰূপ মহানগৰ জিলা উপায়ুক্ত কাৰ্যালয়ত মনোনয়ন পত্ৰ দাখিল কৰে । ৰাজ্যিক বিজেপিৰ সভাপতি ভৱেশ কলিতা, সাংগঠনিক সাধাৰণ সম্পাদক ফণীন্দ্ৰ নাথ শৰ্মাকে আদি কৰি কেইবাজনো ৰাজ্যিক বিষয়ববীয়া মনোনয়ন পত্ৰ দাখিল অনুষ্ঠানত উপস্থিত থাকে ।
লগতে পঢ়ক : সীমা বিবাদ মীমাংসাৰ চুক্তি সন্দৰ্ভত বিধানসভাত মুখ্যমন্ত্রীৰ বিবৃতি
