নেচনেল ডেস্ক, 15 জুন: অৱশেষত জামিন লাভ কৰিলে 'কা'(CAA) আন্দোলনৰ সৈতে জড়িত অসমৰ দেবাংগনা কলিতাই ৷ দেবাংগনা কলিতাৰ লগতে জামিন লাভ কৰে আচিফ ইকবাল তান্হা আৰু নতাশা নৰৱালে ৷ মঙলবাৰে দিল্লী উচ্চ ন্যায়ালয়(Delhi High Court)ত হোৱা শুনানিত ন্যায়ালয়ে জামিন প্ৰদান কৰে তিনিওকে ৷ দিল্লী উচ্চ ন্যায়ালয়ে দিল্লী হিংসা (Delhi Riots)ৰ ঘটনাত ইউপিএৰ অধীনত গ্ৰেপ্তাৰ কৰিছিল তিনিওকে ৷ ন্যায়াধীশ সিদ্ধাৰ্থ মৃদুল আৰু ন্যায়াধীশ অজয় জয়ৰাম ভাংবানীৰ বিচাৰপীঠে তিনিওকে নিয়মিত জামিন প্ৰদান কৰিবলৈ নিৰ্দেশ প্ৰদান কৰে ৷
এই ক্ষেত্ৰত আদালতে কয় যে, দিল্লী আৰক্ষী (Delhi Police)য়ে এই সন্দৰ্ভত চাৰ্জশ্বীট দাখিল কৰিছে ৷ এই গোচৰত 740 গৰাকী সাক্ষী আছে ৷ এই সকল সাক্ষীৰ ভিতৰত স্বতন্ত্ৰ সাক্ষীসকলৰ বাহিৰে সুৰক্ষিত সাক্ষী, আৰক্ষী সাক্ষী আদি অন্তৰ্ভুক্ত হৈ আছে ৷ এনে ক্ষেত্ৰত এই 740 গৰাকী সাক্ষীৰ সাক্ষ্য প্ৰদান শেষ নোহোৱালৈকে অভিযুক্ত কেইজনক কাৰাগাৰৰ ভিতৰত ৰাখিব পৰা নাযাব ৷ ন্যায়ালয়ে তিনিও অভিযুক্তক ৫০ হাজাৰকৈ টকাৰ পাৰ্চনেল বণ্ডত জামিন প্ৰদান কৰিছে আৰু আৰক্ষীয়ে চলাই থকা তদন্ত প্ৰক্ৰিয়াত সহযোগ কৰিবলৈ নিৰ্দেশ দিয়ে । দুয়োকে আদালতৰ অনুমতি অবিহনে বিদেশলৈ নাযাবলৈও নিৰ্দেশ দিয়ে উচ্চ ন্যায়ালয়ে ।
দিল্লী আৰক্ষীয়ে এইসকলৰ বিৰুদ্ধে হিংসাত্মক কাৰ্যকলাপত জড়িত থকাৰ অভিযোগ উত্থাপন কৰি বেআইনী কাৰ্যকলাপ প্ৰতিৰোধ আইন (Unlawful Activities Prevention Act)ৰ অধীনত গোচৰ ৰুজু কৰিছিল । যোৱা এবছৰৰ অধিক কাল দেবাংগনা তিহাৰ জেলত বন্দী হৈ আছিল ।
উল্লেখ্য যে, হিংসাৰ ঘটনাৰ পৰিকল্পনা প্ৰস্তুত কৰাৰ অভিযোগত দিল্লী আৰক্ষীৰ বিশেষ শাখাই 18 জন লোকক অভিযুক্ত হিচাপে চিনাক্ত কৰিছে ৷
লগতে পঢ়ক: উদালীৰ চিকিৎসক নিগ্ৰহ কাণ্ড: দুই অভিযুক্তই কৰিলে আত্মসমৰ্পণ
