ETV Bharat / state

মৰুভূমিক বাসোপযোগী কৰি তোলাৰ লক্ষ টি এম পি কে-ৰ - TMPK tree plantation programme

author img

By ETV Bharat Assamese Team

Published : May 4, 2024, 1:19 PM IST

TMPK tree plantation programme: টি এম পি কেৰ দ্বাৰা আয়োজিত গছপুলি ৰোপণ কাৰ্যসূচীত অংশগ্ৰহণ চিলাপথাৰ প্ৰেছ ক্লাবৰ ৷ 1600 বিঘা মাটিত অৰণ্য গঢ় দিয়াৰ উদ্দেশ্যৰে টি এম পি কেৰ নেতৃত্বত আৰম্ভ হৈছে এই ডেৰ মাহজোৰা গছপুলি ৰোপণ কাৰ্যসূচী ৷

tree plantation programme by TMPK in Kareng Chapori of  DHEMAJI district
কাৰেং চাপৰিত সংবাদকৰ্মীৰ গছ পুলি ৰোপণ (Etv bharat assam)

কাৰেং চাপৰিত সংবাদকৰ্মীৰ গছ পুলি ৰোপণ (Etv bharat assam)

জোনাই, 4 মে’ : প্ৰকৃতি ৰক্ষাৰ হকে আগবাঢ়ি আহিছে একাংশ সংবাদ কৰ্মী ৷ চিলাপথাৰ প্ৰেছ ক্লাবৰ সংবাদ কৰ্মীসকলে শনিবাৰে ধেমাজি জিলাৰ ব্ৰহ্মপুত্ৰৰ উত্তৰ পাৰৰ কাৰেং চাপৰিত গ্ৰহণ কৰিছে গছপুলি ৰোপণৰ কাৰ্যসূচী ।

উল্লেখযোগ্য যে, 1600 বিঘা মাটিত অৰণ্য গঢ় দিয়াৰ উদ্দেশ্যৰে টি.এম.পি.কেয়ে কাৰেং চাপৰিত অৱস্থিত মিছিং মহোৎসৱস্থলীত বিগত সময়ত ৰোপণ কৰিছিল 1 লাখ গছ পুলি । এইবাৰো একেটা স্থানতে ধৰিত্ৰী দিৱস আৰু শ্বহীদ দিৱসৰ সৈতে সংগতি ৰাখি টি.এম.পি.কেয়ে গ্ৰহণ কৰিছে ডেৰ মাহজোৰা গছপুলি ৰোপণৰ কাৰ্যসূচী । এই অনুষ্ঠানলৈ সহযোগিতাৰ হাত আগবঢ়াইছে চিলাপথাৰ প্ৰেছ ক্লাবে ৷

ইয়াৰ লগতে, এই কাৰ্যসূচীৰ প্ৰতি ধেমাজি জিলা আৰক্ষী, মিচিং শিল্পী দল, চিলাপথাৰ বিজ্ঞান মহাবিদ্যালয়কে আদি কৰি বিভিন্ন অনুষ্ঠান প্ৰতিষ্ঠানেও সঁহাৰি আগবঢ়াইছে বুলি জানিব পৰা গৈছে । আজি চিলাপথাৰ প্ৰেছ ক্লাৱ আৰু জোনাই প্ৰেছ ক্লাৱৰ বহু কেইগৰাকী সংবাদ কৰ্মীয়ে ৰোপণ কৰে গছপুলি ।

উল্লেখযোগ্য যে, এইবাৰ যিসকল লোকে গছপুলি ৰোপণ কাৰ্যসূচীৰ নেতৃত্ব লৈছে সেইসকলে ৰোপণৰ উপৰিও গছ পুলিটো প্ৰতিপালন কৰি তোলাৰ বাবেও দায়ৱদ্ধ বুলি টি এম পি কেৰ কৰ্মীসকলে জানিবলৈ দিছে ।

অনুষ্ঠানটোত অংশগ্ৰহণ কৰি চিলাপথাৰ জিলা সমিতিৰ সম্পাদক মানস কুলি আৰু ৰঞ্জিত টায়ে কয়, "এই অঞ্চল আছিল এটা সময়ত মৰুভূমি সদৃশ আৰু বৰ্তমান সেউজীয়া পৰিৱেশে বিৰাজ কৰিবলৈ আৰম্ভ কৰিছে ৷ পৰৱৰ্তী সময়ত এই ঠাইডোখৰ অটব্য অৰণ্যলৈ পৰ্যবসিত হৈ ইয়াত বিভিন্ন জীৱকুলৰ বসবাসৰ উপযোগী হৈ উঠিব ।

এই কাৰ্যসূচীত চিলাপথাৰ প্ৰেছ ক্লাৱৰ ভাৰপ্ৰাপ্ত সভাপতি গুণাধৰ দলে ,ভাৰপ্ৰাপ্ত সম্পাদক লবিৰাম বড়ী, মোহন পাংগিং, মহম্মদ নামৰুজ, মনিকান্ত টায়ে, জোনাই প্ৰেছ ক্লাৱৰ সম্পাদিকা কৰবী দলে, গৌতম পেগুৱে অংশগ্ৰহণ কৰে ।

অসমৰ বিভিন্ন প্ৰান্তৰ টি.এম.পি.কেৰ বিষয়ববীয়াৰ লগতে বিভিন্ন অনুষ্ঠান প্ৰতিষ্ঠানৰ কৰ্মী, সাংসদ, মন্ত্ৰী, বিধায়কৰ লগতে যাদৱ পায়েঙৰ দৰে প্ৰকৃতি কৰ্মীয়েও এই গছপুলি ৰোপণ কাৰ্যসূচীৰ প্ৰতি সহযোগিতা আগবঢ়াইছিল বুলি উদ্যোক্তাসকলে জনায় ৷ ডেৰ মাহজোৰা গছৰ পুলি ৰোপণৰ এই কাৰ্যসূচীৰ সামৰণি পৰিব 5 জুন অৰ্থাৎ বিশ্ব পৰিৱেশ দিৱসৰ দিনা ৷

লগতে পঢ়ক: সোণাৰু-কাঞ্চন-কৃষ্ণচূড়াৰ চতুৰ্থ বৰ্ষপুতি

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.