গুৱাহাটী, ৫ জুন : সোমবাৰে লোকসভা নিৰ্বাচনৰ ফলাফল ঘোষণা কৰাৰ পিচতে ৰাজ্যৰ ৰাজনীতিত চৰ্চাৰ মাজলৈ আহিছে এগৰাকী বিধায়ক । চৰ্চিত বিধায়কগৰাকী হৈছে খুমটাই বিধানসভা সমষ্টিৰ বিজেপি বিধায়ক মৃণাল শইকীয়া ।
ফলাফল ঘোষণাৰ পিচতে বিধায়কগৰাকীয়ে সামাজিক মাধ্যমত গৌৰৱ গগৈক শুভেচ্ছা জ্ঞাপন কৰি লিখিছিল এটা পোষ্ট । ইয়াৰ পিচতে মুখ্যমন্ত্ৰী ডঃ হিমন্ত বিশ্ব শৰ্মাই এই বিষয়ত নিজৰ মন্তব্য আগবঢ়ায় । ইয়াৰ সমান্তৰালভাবে বুধবাৰে ৰাজ্যিক বিজেপিৰ সভাপতি ভৱেশ কলিতায়ো এই সম্পৰ্কত মন্তব্য আগবঢ়ায় ।
সংবাদ মাধ্যমৰ আগত বিজেপিৰ ৰাজ্যিক সভাপতিগৰাকীয়ে কয়, "মৃণাল শইকীয়া সন্দৰ্ভত বিষয়ববীয়াৰ সভাত সিদ্ধান্ত লোৱা হ'ব । মৃণাল শইকীয়াই প্ৰথমে মোদীক শুভেচ্ছা দিব লাগিছিল । আমাৰ নেতা তৃতীয়বাৰৰ বাবে প্ৰধানমন্ত্ৰী হ'বলৈ গৈ আছে । আমাৰ দলৰ আন বিজয়ী প্ৰাৰ্থীসকলক তেওঁ শুভেচ্ছা জনাব লাগিছিল । সেয়াই আমাৰ দলৰ নিয়ম ।"
আনহাতে, মৃণাল শইকীয়াৰ কথাবোৰৰ ক'ৰবাত গ্ৰহণযোগ্যতা আছে নেকি বুলি সোধা এক প্ৰশ্নৰ উত্তৰত সভাপতিগৰাকীয়ে কয় যে এই সকলো কথা সূক্ষ্মভাৱে পৰ্যবেক্ষণ কৰা হ'ব । কেৱল মৃণাল শইকীয়াৰ কথাই নহয়, যোৰহাটত বিজেপি কিয় হাৰিল এই সকলো বিষয়ত আলোচনা হ'ব বুলিও তেওঁ কয় ।
ইফালে মৃণাল শইকীয়াক শ্ব'কজ কৰা হ'ব নেকি বুলি সোধাত ৰাজ্যিক বিজেপিৰ সভাপতিগৰাকীয়ে কয় যে শ্ব'কজেই সকলো সিদ্ধান্ত দিব নোৱাৰে । সেয়েহে মৃণাল শইকীয়াক শ্ব'কজ কৰা হোৱা নাই ।
উল্লেখ্য যে লোকসভা নিৰ্বাচনৰ ভোটগণনা সমাপ্ত হোৱাৰ লগে লগে মঙলবাৰে সন্ধিয়া ৮ বজাত মৃণাল শইকীয়াই সামাজিক মাধ্যমত এটা পোষ্ট দিয়ে । পোষ্টটোত তেওঁ গৌৰৱ গগৈক শুভেচ্ছা জ্ঞাপন কৰি লিখে, "যোৰহাট লোকসভা সমষ্টিত অসাধাৰণ বিজয়ৰ বাবে গৌৰৱ গগৈ ডাঙৰীয়াক বিশেষভাৱে অভিনন্দন । এই ফলাফল কেইবাটাও দিশত বিশেষভাৱে গুৰুত্বপূৰ্ণ আৰু ইয়ে প্ৰমাণ কৰে যে ধন, ডাঙৰ প্ৰচাৰ অভিযান, অতিমাত্ৰাত নেতৃত্ব আৰু দম্ভালিপূৰ্ণ ভাষণে নিৰ্বাচনত জয়ী হোৱাত সদায় সহায় নকৰে । লগতে অসমৰ পৰা নিৰ্বাচিত সকলো প্ৰাৰ্থীকে আন্তৰিক অভিনন্দন তথা শুভেচ্ছা জ্ঞাপন কৰিলো ।"
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024
