ETV Bharat / state

ডাকঘৰৰ পকী ছাদ খহি পৰাত হাহাকাৰ পৰিস্থিতি গ্ৰাহকৰ মাজত - Amguri post office collapses

author img

By ETV Bharat Assamese Team

Published : Apr 30, 2024, 12:48 PM IST

Amguri post office : খহি পৰিল আমগুৰি ডাকঘৰৰ ছাদ ৷ কথমপি ৰক্ষা বহু গ্ৰাহকৰ জীৱন ৷ শীঘ্ৰে মেৰামতিৰ দাবী সচেতন গ্ৰাহক তথা স্থানীয় লোকৰ ৷

roof of amguri post office collapses due to dilapidated condition
ডাকঘৰৰ পকী ছাদ খহি পৰাত হাহাকাৰ পৰিস্থিতি গ্ৰাহকৰ মাজত

ডাকঘৰৰ পকী ছাদ খহি পৰাত হাহাকাৰ পৰিস্থিতি গ্ৰাহকৰ মাজত

আমগুৰি, 30 এপ্ৰিল : ডাকঘৰৰ পকী ছাদ খহি পৰাত হাহাকাৰ পৰিস্থিতি গ্ৰাহকৰ মাজত ৷ শিৱসাগৰ জিলাৰ আমগুৰিস্থিত প্ৰধান ডাকঘৰত সংঘটিত হৈছে এই ঘটনা ৷ ডাকঘৰটোৰ পকী ছাদৰ এটা অংশ খহি পৰাত উক্ত সময়ত ডাকঘৰটোত উপস্থিত থকা বহুকেইজন গ্ৰাহকৰ কথমপি জীৱন ৰক্ষা পৰে ৷

জানিব পৰা মতে, আমগুৰিৰ মূল ডাকঘৰটোত গ্ৰাহকৰ ভিৰ থকা অৱস্থাতে অৰ্থাৎ কাম-কাজ চলি থকা অৱস্থাতে পকী ছাদৰ এটা অংশ খহি পৰাৰ ফলত ডাকঘৰটোৰ ভিতৰভাগত হুৱা-দুৱা পৰিৱেশৰ সৃষ্টি হয় । এই ঘটনাৰ পাচতে ডাকঘৰটোত থকা সচেতন গ্ৰাহকে আমগুৰি ডাকঘৰৰ দুৰৱস্থাৰ বিষয়ে মুখ্য কাৰ্যালয়লৈ পত্ৰ প্ৰেৰণ কৰাৰ বাবে সিদ্ধান্ত গ্ৰহণ কৰিছে বুলি জানিব পৰা গৈছে ।

উল্লেখ্য যে, আমগুৰিস্থিত প্ৰধান ডাকঘৰটোৰ পকী ছাদৰ বিভিন্ন অংশ জহি-খহি যোৱাৰ লগতে চিমেণ্টৰ বীম পৰ্যন্ত জৰাজীৰ্ণ অৱস্থাত আছে । ডাকঘৰটোত গ্ৰাহকৰ গুৰুত্বপূৰ্ণ নথি-পত্ৰ মজুত আছে ৷ কিন্তু সাধাৰণ এজাক বৰষুণৰ ফলতেই ডাকঘৰটোৰ ভিতৰত পানী পৰাত কৰ্মচাৰীসকল দীৰ্ঘদিন ধৰি অসুবিধাৰ সন্মুখীন হৈ আহিছে বুলি জানিব পৰা গৈছে ।

যিকোনো মুহূৰ্ততে খহি পৰাৰ পূৰ্ণ আশংকা প্ৰকাশ কৰিছে সচেতন গ্ৰাহকসকলে ৷ যদি সেয়াই হয় তেন্তে ডাকঘৰটোৰ গুৰুত্বপূৰ্ণ নথি-পত্ৰবোৰ নষ্ট হ'লে পৰৱৰ্তী সময়ত গ্ৰাহকসকল ভীষণ অসুবিধাৰ সন্মুখীন হ'ব ।

উল্লেখ কৰা প্ৰয়োজন যে, আমগুৰি ডাকঘৰৰ পকী দেৱালৰ বিভিন্ন অংশ ফাট মেলাৰ লগতে খিৰিকিবোৰও ভাঙি গৈছে । ডাকঘৰটোত খোৱাপানীৰ সমস্যা থকাৰ লগতে শৌচালয়ৰ অব্যৱস্থাৰ বাবেও কৰ্মচাৰীসকল ভীষণ অসুবিধাৰ সন্মুখীন হৈ আহিছে বুলি জানিব দিয়ে ।

যিকোনো সময়তে ভয়ংকৰ দুৰ্ঘটনা সংঘটিত হোৱাৰ সম্ভাৱনা থকা ডাকঘৰটো শীঘ্ৰে মেৰামতি কৰি দিবলৈ দাবী জনাইছে গ্ৰাহক তথা সচেতন লোকে ।

লগতে পঢ়ক: দিখৌ-ব্ৰক্ষ্মপুত্ৰ-দৰিকাৰ সংগমস্থলীত এজাক দুৰ্ভগীয়া শিক্ষাৰ্থী - Demand To Construct A Bridge

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.