খেতিৰ ভাগ লাগে নগাক; সীমান্তৰ আদিবাসী লোকক হাৰাশাস্তি

সৰুপথাৰ : অসমৰ ভূমিত নগাৰ আগ্ৰাসন নতুন কথা নহয় । দীৰ্ঘদিন ধৰি এই কাৰ্যকলাপ অব্যাহত আছে । শেহতীয়াকৈ সীমান্তৰ উৰিয়ামঘাটৰ ৰেংমা সংৰক্ষিত বনাঞ্চলত অসম চৰকাৰে উচ্ছেদ চলোৱাৰ পিছত নগাৰ দপদপনি বৃদ্ধি পাইছে । অসমে উচ্ছেদ চলোৱা ভূমি নিজৰ বুলি দাবী কৰিছে নগাই । কেৱল এয়াই নহয় অসমৰ গাঁৱত নাগালেণ্ডে উচ্ছেদৰো জাননী জাৰি কৰিছে । তাৰ মাজতে নগাৰ আগ্ৰাসনক উচতনিও দিয়া দেখা গৈছে খোদ নাগালেণ্ড চৰকাৰৰ প্ৰতিনিধিৰ ।

শেহতীয়াকৈ নাগালেণ্ডৰ উপ-মুখ্যমন্ত্ৰীয়ে অসম চৰকাৰক লক্ষ্য কৰি সকীয়নি দিছে । উপ-মুখ্যমন্ত্ৰীৰ সকীয়নিৰ পিছতে ঠায়ে ঠায়ে নগাৰ দপদপনি পুনৰ বৃদ্ধি পাইছে । উৰিয়ামঘাটত এইবাৰ চৰম সীমা অতিক্ৰম কৰিলে নগাই । হাতত নথি পত্ৰ লৈ উপস্থিত হ'ল অসমৰ গাঁৱত । উৰিয়ামঘাটৰ ১ নং ৰজাপুখুৰীত আদিবাসী সম্প্ৰদায়ৰ লোকৰ ঘৰত নগাই আহি খেতিৰ ভাগ বিচাৰি বলপূৰ্বকভাৱে চুক্তি কৰাৰ চেষ্টা চলায় ।

সীমান্তৰ গাঁওখনত নগাৰ দাদাগিৰিৰ ভিডিঅ' সম্প্ৰতি ভাইৰেল হৈ পৰিছে । কোনো লোকে গোপনে সমগ্ৰ দৃশ্য মোবাইলত বন্দী কৰি ৰাখিছিল । ভিডিঅ'টোত দেখা গৈছে যে হাতত নথি-পত্ৰ লৈ অসমৰ ভূমিত উপস্থিত হৈছে একাংশ নগা লোক । একাংশৰ হাতত বাঁহৰ লাঠিও দেখা গৈছে । নগা লোকসকলে আদিবাসী লোকৰ ঘৰত খেতিৰ ভাগ বিচাৰিছে । ভূমিৰো ভাগ লাগে তেওঁলোকক । নগা লোককেইজনে দাবী কৰা মতে সেয়া তেওঁলোকৰ পৈতৃক সম্পত্তি ।

আচৰিত কথাটো হ'ল যে পৰিস্থিতি উত্তপ্ত হোৱাৰ পূৰ্বে তাত চি আৰ পি এফৰ কেইগৰাকীমান জোৱান উপস্থিত হয় । কিন্তু চি আৰ পি এফৰ ভূমিকাক লৈও প্ৰশ্ন উঠিছে । কিয়নো নগা লোককেইজনে জোৱানকেইজনকে দুৰ্ব্যৱহাৰ কৰা দেখা গৈছে । চি আৰ পি এফৰ উপস্থিতিতে নগাই ধমক দিছে । মুঠতে সীমান্তত এতিয়া নগাৰ দপদপনি চলিছে । কিন্তু অসম চৰকাৰে এই ক্ষেত্ৰত কোনো ব্যৱস্থা গ্ৰহণ নকৰাৰ অভিযোগ উঠিছে । যাৰ বাবে সীমান্তৰ লোকসকল এতিয়া শংকিত হৈ পৰিছে ।

নামবৰ বনাঞ্চলৰ ১নং ৰজাপুখুৰী গাঁৱৰ যিঘৰত নগাই আহি ধমকি দিছিল সেই ব্যক্তিজনে কয়, "কালি আহি মোৰ চোতালত মোক ঘেৰাও কৰিলে । ক'লে যে তই Agreement কৰিব লাগিব, মিলি থাকিব লাগিব নহ'লে ইয়াৰ পৰা খেদাম । এইবোৰ আমাৰ বাবাৰ মাটি হয়, তঁহতি যদি মিলি নাথাক তেতিয়াহ'লে উচ্ছেদ কৰি দিম ।"

ভুক্তভোগী (ETV Bharat)

তেওঁ লগতে কয়, "তেওঁলোকে কৈছে Agreement কৰিব লাগিব আৰু মিলি থাকিব লাগিব । এইখন ১নং ৰজাপুখুৰী গাওঁ মধ্যমপুৰ পঞ্চায়তৰ অন্তৰ্গত । ৯ জনমান নগা লোক আহিছিল । তেওঁলোকে কৈছিল যে মিঞাই মিলি থকা নাছিল, Agreement কৰা নাছিল সেইকাৰণে উচ্ছেদ কৰিল, গতিকে তহঁতি মিলি নাথাকিলে Agreement নকৰিলে তঁহতকো উচ্ছেদ কৰিম ।"

তেওঁ আৰু কয়, "কিন্তু সেই Agreement ত কি আছিল গম নাপালো । এইখন গাঁৱত অসমীয়া, আদিবাসী, কছাৰী, নেপালী সকলো জনগোষ্ঠীৰ লোক আছে । যেতিয় ধমকি দিছিল তেতিয়া মই কৈছিলো যে তহঁতি জবৰদস্তি কৰিলেও নহ'ব, যেতিয়া অসম আৰু নাগালেণ্ডৰ সীমান্ত দণ্ডাধীশে বহি যি সিদ্ধান্ত লয় কি কৰিব কয় সেইয়াই কৰিম বুলিহে উত্তৰ দিলো । চি.আৰ.পি.এফ আছিল ঘটনাস্থলীত কিন্তু যেতিয়া চি আৰ পি এফে কৈছিল কিয় কৰিছ এইবোৰ তেতিয়া নগাই চি আৰ পি এফক ধমকি দিছিল । নগাই কৈছিল এইবোৰ আমাৰ বাবাৰ এলেকা আমি মাটি বিচাৰিছো ।"

এগৰাকী মহিলাই কয়, "সদায় নগাই আহি অসুবিধা কৰি আছে । কালি কৈছে যে এইটো নগাৰ মাটি হয় । আমাৰ বাবাই দিছে, সেইকাৰণে তোমালোক আছা । এইটো আমাৰ বাবাৰ মাটি হয় । তোমালোক থাকিলে মিলি থাকিবা । নগাই যে কৈছে এইবোৰ তেওঁলোকৰ মাটি মিঞা বহি থাকোতে তেওঁলোক ক'ত আছিল । মিঞা গুছি যোৱাৰ পিছত তেওঁলোক ক'ৰ পৰা আহিল ।"

স্থানীয় লোক এজনে কয়, "বিশেষকৈ কালি ৰজাপুখুৰী গাঁৱত বজাৰৰ পৰা আহি শুনিছো নগাই উপদ্ৰৱ কৰিছে । চি আৰ পিৰ কথাকো তেওঁলোকে কাণসাৰ দিয়া নাই । চাৰিদিনমানৰ আগত এই তিনিআলিতেই আমি গোটেই ৰাইজ আছিলো, এটা বস্তু দেখা পালো যে ইয়াৰ যিবিলাক ঘৰ-দুৱাৰ উচ্ছেদ হ'ল সেই ঘৰবিলাকৰ ঠিকাত দিছিল, মিঞা লোকে ঠিকা লবলৈ আহিছিল । তেওঁলোকে বস্তু-বাহানী উঠাই থাকোতেই নগা লোক সেইফালৰ পৰা আহি গ'ল । নগা গাওঁবুঢ়াসকলে ৰঙা পোছাক পিন্ধি ইয়াত আহিছিল । লগতে লাঠি-জোং লৈ নগা লোক আহিছিল । এই ভঙা ঘৰবোৰৰ টিনপাতত বিকট শব্দ কৰিছে । পিছত চি আৰ পি এফ আহিল । নগাই ইয়াত থকা লোকসকলক কৈছে যে ইয়াৰ পৰা কোনেও একো নিনিব । নগাই ধমকি দি গুছি গ'ল । শৰ্মাক অনুৰোধ কৰিছো ইয়াত বেটেলিয়ান কেম্প স্থাপন কৰি দিয়ক । আমাৰ বহু অসুবিধা হৈছে ।"

উৰিয়ামঘাৰ ৰেংমা সংৰক্ষিত বনাঞ্চলত দ্বিতীয় পৰ্যায়ৰ উচ্ছেদৰ পিছতো সীমান্তত চলি থকা নগাৰ আগ্ৰাসনে এতিয়া ভাবুকিৰ সৃষ্টি কৰিছে । বহুতে প্ৰশ্ন কৰিছে উচ্ছেদিত ভূমি নগাই দখল কৰিব নেকি ? কিয়নো উচ্ছেদৰ মাজতে নগাই আহি সেই ভূমি তেওঁলোকৰ বুলি দাবী কৰিছিল ।

অসমৰ গাঁৱত উচ্ছেদৰ জাননী দিছে । অসম চৰকাৰে আয়োজন কৰা গছপুলি ৰোপণ কাৰ্যসূচীতো বাধা দিছে নগাই । সীমান্তত প্ৰশাসনে স্থাপন কৰা খুটা আৰু ফেন্সিং আঁতৰাই দিবলৈও অসম চৰকাৰক সকীয়াই দিছে নাগালেণ্ড চৰকাৰে । কিন্তু এই ক্ষেত্ৰত অসম চৰকাৰে যদি শীঘ্ৰে কোনো পদক্ষেপ গ্ৰহণ নকৰে তেনেহ'লে পৰিস্থিতি কোন দিশে গতি কৰিব সেয়া চিন্তনীয় !

লগতে পঢ়ক :অসম চৰকাৰক পুনৰ সকীয়নি নাগালেণ্ডৰ উপ-মুখ্যমন্ত্ৰীৰ - ASSAM NAGALAND BORDER DISPUTE