দুৰ্ঘটনাত পতিত KMSSৰ নেতা বিদ্যুৎ শইকীয়া; গুৰুতৰভাৱে আহত

গোলাঘাট : নৱবৰ্ষ উদযাপনৰ মাজতে গোলাঘাটৰ চাওদাং পথাৰত পথ দুৰ্ঘটনা । দুৰ্ঘটনাত পতিত হৈ গুৰুতৰভাৱে আঘাতপ্ৰাপ্ত কৃষক মুক্তি সংগ্ৰাম সমিতিৰ কেন্দ্ৰীয় সাধাৰণ সম্পাদক বিদ্যুৎ শইকীয়া । গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত ভৰ্তি নেতাগৰাকীক ।

কেনেদৰে হ'ল দুৰ্ঘটনা ?

প্ৰাপ্ত খবৰ অনুসৰি চাওদাং পথাৰত এখন সভাত অংশগ্ৰহণ কৰি নিশা অঞ্চলটোৰ এজন লোকৰ বাসগৃহত নিশাৰ আহাৰ গ্ৰহণ কৰিবলৈ গৈছিল কৃষক নেতাগৰাকী । এটা ফোন অহাত ৰাজপথলৈ ওলাই আহিছিল কৃষক নেতাগৰাকী । সেই সময়তে পিছফালৰ পৰা এখন মটৰ চাইকেলে তীব্ৰ গতিত আহি খুন্দা মাৰে বিদ্যুৎ শইকীয়াক । মটৰ চাইকেলৰ খুন্দাত বাগৰি পৰে কৃষক নেতাগৰাকী ।

প্ৰত্যক্ষদৰ্শী সতীৰ্থ আৰু স্থানীয় লোকে ততাতৈয়াকৈ মেৰাপানী চিকিৎসালয়ত লৈ যায় যদিও উন্নত চিকিৎসাৰ বাবে নিশাই গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰে কৃষক নেতাগৰাকীক । এই ঘটনা সম্পৰ্কে নাৰী মুক্তি সংগ্ৰাম সমিতিৰ এগৰাকী নেত্ৰীয়ে কয়, "আমাৰ এখন সভা আছিল । সেই সভাৰ পিছত ওচৰৰে এগৰাকী মহিলাৰ ঘৰত জিৰণি ল'বলৈ গৈছিলো । সেই সময়তে তেখেতৰ এটা ফোন অহাত পথৰ ফালে ওলাই গ'ল আৰু তাৰ পাছতে পিছফালৰ পৰা এখন মটৰ চাইকেলে তেওঁক খুন্দিয়াই থৈ যায় । পথ দুৰ্ঘটনা সংঘটিত কৰা লোকজন নিচাসক্ত আছিল ।" দুৰ্ঘটনাটোত কৃষক নেতাগৰাকীয়ে হাত, ভৰি আৰু কঁকালত আঘাত পাইছে বুলি জানিব পৰা গৈছে ।

আনহাতে এই ঘটনা সম্পৰ্কে বিদ্যুৎ শইকীয়াৰ ভাতৃ ইন্দ্ৰজিৎ শইকীয়াই জানিবলৈ দিয়া মতে তেওঁ শৰীৰৰ বিভিন্ন স্থানত আঘাত পাইছে । তেওঁ কয়, "মটৰ চাইকেল লৈ অহা লোকজন স্থানীয় আছিল । ইয়াৰ অন্তৰালত তেওঁৰ কিবা উদ্দেশ্য আছিল নেকি সেয়া আৰক্ষীয়ে সোধাপোছা কৰাৰ পিছত হে জানিব পৰা যাব ।"

লগতে পঢ়ক :খাৰঘূলিৰ জল বিস্ফোৰণ : ৪ টা পৰিয়াললৈ ১.২০ লাখ টকাকৈ ক্ষতিপূৰণ - PIPELINE BURSTS IN KHARGHULI