বৰপেটা, ২৪ মাৰ্চ : সত্ৰনগৰী বৰপেটাৰ বাটে ঘাটে এতিয়া কেবল হোলী গীতৰ ৰোল ৷ বৰপেটাৰ আকাশে-বতাহে মাথোঁ হোলী গীতৰেই গুঞ্জন ৷ চৌদিশ জুৰি ধ্বনিত হৈছে কেবল হোলীগীতৰ অমিয়া সুৰ ৷ মন প্ৰাণ হৰি নিয়া হোলীগীতৰ গুঞ্জনত মুখৰিত সত্ৰনগৰীৰ আকাশ, বৰপেটাৰ বতাহ ৷
দৌল মহোৎসৱ উপলক্ষে পুৱাৰে পৰা উখল-মাখল সত্ৰনগৰী বৰপেটা ৷ আজিৰে পৰা তিনিদিনীয়া কাৰ্যসূচীৰে আৰম্ভ হৈছে দ্বিতীয় বৈকুন্ঠপুৰী, ঐতিহ্যমণ্ডিত বৰপেটা সত্ৰৰ শ্ৰীশ্ৰীকৃষ্ণৰ দৌল মহোৎসৱ ৷ দৌল মহোৎসৱ উপলক্ষে আজি পুৱাৰ পৰাই বৰপেটা সত্ৰত আৰম্ভ হৈছে এক উখল-মাখল পৰিৱেশ ৷
বিভিন্ন প্ৰান্তৰ পৰা অহা ভক্তসকলে ভিৰ কৰিছে বৰপেটা সত্ৰত ৷ ইপিনে স্থানীয় ৰাইজিং ক্লাবৰ উদ্যোগত আজি (দেওবাৰ) অনুষ্ঠিত হয় এক ব্যতিক্ৰমী হোলীগীতৰ প্ৰতিযোগিতা ৷ 'মুকলি পথত হোলীগীত' শীৰ্ষক এই প্ৰতিযোগিতা উপভোগ কৰিবলৈ আজি লোকাৰণ্য হৈ পৰে সত্ৰনগৰী বৰপেটাৰ বাট-পথ ৷
আজি পুৱা বৰপেটা সত্ৰৰ দালানৰ সন্মুখত বৰপেটা সত্ৰৰ ডেকা সত্ৰীয়া গৌতম পাঠকে হোলীগীত প্ৰতিযোগিতা উদ্বোধন কৰাৰ পিচতেই এটাৰ পাচত আনটো হোলীগীতৰ দলে বাটে বাটে হোলীগীত গাই কৃষ্ণ প্ৰেমৰ বন্দনাৰে মুখৰিত কৰি তোলে বৰপেটা ধাম ৷
মুকলি পথত হোলীগীত প্ৰতিযোগিতাৰ অনুষ্ঠানত বিশিষ্ট অতিথিৰূপে অংশগ্ৰহণ কৰে অসমৰ জনপ্ৰিয় কণ্ঠশিল্পী কৃষ্ণমণি চুতীয়া, অভিশ্ৰুতি বেজবৰুৱা আৰু 'বেহৰবাৰী আউটপোষ্ট' ধাৰাবাহিকৰ মণি বৌ খ্যাত জনপ্ৰিয় অভিনেত্ৰী পাপৰি বৰাই ৷
বৰপেটা সত্ৰৰ দালানৰ সন্মুখত আৰম্ভ হোৱা মুকলি পথত হোলীগীত প্ৰতিযোগিতা উদ্বোধনৰ পিছতে হোলী গীত প্ৰতিযোগিতাত অংশগ্ৰহণকাৰী দলসমূহে বাটে বাটে হোলী গীত পৰিবেশন কৰি বৰপেটা চহৰৰ মূল পথ পৰিভ্ৰমণ কৰি বৰপেটা প্ৰেছ ক্লাৱত উপস্থিত হয় ৷ এই সময়চোৱাত বৰপেটাৰ ৰাজপথত সৃষ্টি হয় এক অনন্য মন প্ৰাণ উতলা কৰি তোলা পৰিৱেশৰ ৷
লগতে পঢ়ক: হোলীৰ সময়ত গ্ৰহদোষৰ পৰা বাচিব কিদৰে ? - Holi 2024
