যোৰহাট, ১০ ফেব্ৰুৱাৰী: দেশৰ লগতে ৰাজ্যৰ নগৰ অঞ্চলৰ এক বৃহৎ সমস্যা হৈছে জাবৰ নিষ্কাষণ । নিতৌ নগৰ সমূহত হাজাৰ হাজাৰ কুইণ্টল জাবৰ ওলাই যদিও বিজ্ঞানসন্মতভাৱে নিষ্কাষণ কৰাৰ সুবিধা নোহোৱাৰ বাবে কোনো কোনো স্থানত এই জাবৰ পাহাৰ সদৃশ হৈ পৰিছে । লগতে ব্যাপক হাৰত প্ৰদূষণ সৃষ্টি হৈছে । অসম চৰকাৰে নগৰৰ সমূহৰ জাবৰ নিষ্কাষণৰ আঁচনি ৰাজ্যৰ কেইবাটাও স্থানত গ্ৰহণ কৰিছে । যোৰহাটতো আৰম্ভ হৈছে জাবৰ নিষ্কাষণৰ প্ৰক্ৰিয়া । উল্লেখ্য় যে বিগত সময়ত যোৰহাটৰ গড়মূড় ডাম্পিং গ্ৰাউণ্ডে ৰাইজক অতিষ্ঠ কৰি আহিছে । ইয়াৰ মাজতেই জিলাবাসীলৈ আহিছে সুখবৰ ।
যোৰহাটৰ গড়মূৰ ডাম্পিং গ্ৰাউণ্ডত জমা হৈ আছে লাখ লাখ কুইণ্টল জাবৰ । প্ৰদূষণৰ লগতে এই জাবৰে পুতি পেলাইছে টোকলাই আৰু ভোগদৈ নদী । কিন্তু শেহতীয়াকৈ ৰাজ্য চৰকাৰৰ নগৰ উন্নয়ন বিভাগে এই জাবৰ নিষ্কাষণ কৰি ইয়াক সম্পদলৈ ৰূপান্তৰ কৰিছে । এই জাবৰ নিষ্কাষণ কৰি এটা অংশ জৈৱিক সাৰ আৰু প্লাষ্টিক অংশ চিমেণ্ট কাৰখানাৰ ইন্ধন হিচাপে ব্যৱহাৰৰ ব্যৱস্থা কৰিছে । ইতিমধ্যে ইয়াৰ কাম দ্ৰুত গতিত আৰম্ভ হৈছে আৰু প্ৰায় ৫০ ট্ৰাক চিমেণ্ট কাৰখানালৈ প্ৰেৰণ কৰিছে ।
অহা ছেপ্টেম্বৰৰ ভিতৰত জাবৰ নিষ্কাষণৰ প্ৰায় শেষ কৰাৰ লক্ষ্য স্থিৰ কৰা হৈছে । এই স্থানত এখন পাৰ্ক গঢ়ি তোলাৰ চিন্তা কৰা হৈছে । উন্নত প্ৰযুক্তি বিদ্যাৰ জৰিয়তে জাবৰক সম্পদলৈ ৰূপান্তৰ কৰাৰ কাম দিনে-নিশাই কৰি থকা হৈছে । ফলত যোৰহাটবাসীয়ে দীৰ্ঘদিনে ভুগি থকা এক জলন্ত সমস্যাৰ পৰা মুক্ত হ'ব বুলি আশা কৰা হৈছে ।
লগতে পঢ়ক:ঘৰৰ জাবৰ বাটত পেলোৱা লোকৰ বাবে বেয়া দিন আহিল গুৱাহাটীত
