ৰাহুল গান্ধীৰ বিৰুদ্ধে গোচৰ তৰিব অসম আৰক্ষীয়ে, ডিজিপিক নিৰ্দেশ মুখ্যমন্ত্ৰীৰ

author img

By ETV Bharat Assamese Desk

Published : Jan 23, 2024, 4:56 PM IST

ৰাহুল গান্ধীৰ বিৰুদ্ধে গোচৰ তৰিব অসম আৰক্ষীয়ে

Assam CM to Case Against Rahul Gandhi : "এইবোৰ অসমীয়া সংস্কৃতিৰ অংশ নহয় । আমি এখন শান্তিপূৰ্ণ ৰাজ্য । এনে 'নক্সালবাদী কৌশল' আমাৰ সংস্কৃতিৰ বাবে অপৰিচিত । মই অসম আৰক্ষীৰ ডিজিপিক আপোনালোকৰ নেতা ৰাহুল গান্ধীৰ বিৰুদ্ধে গোচৰ ৰুজু কৰিবলৈ নিৰ্দেশ দিছো ।" মুখ্যমন্ত্ৰীয়ে এক্স পোষ্টত লিখিছে ।

গুৱাহাটী, ২৩ জানুৱাৰী : কংগ্ৰেছ নেতা ৰাহুল গান্ধীৰ বিৰুদ্ধে গোচৰ ৰুজু কৰিব অসম আৰক্ষীয়ে ৷ অসমত ভাৰত জোড়ো ন্যায় যাত্ৰাত পদে পদে বাধাৰ সন্মুখীন হোৱা ৰাহুল গান্ধীৰ বিৰুদ্ধে গোচৰ ৰুজু কৰিবলৈ নিৰ্দেশ অসমৰ মুখ্যমন্ত্ৰী ডঃ হিমন্ত বিশ্ব শৰ্মাৰ ৷ ইতিমধ্যেই তাৰ বাবে মুখ্যমন্ত্ৰীয়ে নিৰ্দেশ দিছে ৰাজ্যৰ আৰক্ষী সঞ্চালক প্ৰধানক ।

সামাজিক মাধ্যম এক্সযোগে এই কথা সদৰী কৰিছে মুখ্যমন্ত্ৰীগৰাকীয়ে ৷ ৰাহুল গান্ধীৰ বিৰুদ্ধে আৰক্ষীক আক্ৰমণ কৰিবলৈ উচটনি যোগোৱাৰ অভিযোগ মুখ্যমন্ত্ৰীৰ ৷ উল্লেখ্য যে মঙলবাৰে ৰাহুল গান্ধীৰ ‘ভাৰত জোড়ো ন্যায় যাত্ৰা’ মেঘালয়ৰ পৰা আহি গুৱাহাটীত প্ৰৱেশ কৰাৰ সময়তে খানাপাৰাত সৃষ্টি হয় এক উত্তপ্ত পৰিস্থিতিৰ ।

  • प्रमाण सामने आ रहे हैं कि किस प्रकार से राहुल गांधी और जितेंद्र सिंह ने भीड़ को असम पुलिस के जवानों को मारने के लिए भड़काया।

    हमारे जवान जनता के सेवक हैं, किसी शाही परिवार के नहीं।

    निश्चिंत रहिए, क़ानून के हाथ बहुत लंबे होते हैं, आप तक जरूर पहुंचेंगे। pic.twitter.com/MqW1vyo73V

    — Himanta Biswa Sarma (@himantabiswa) January 23, 2024 " class="align-text-top noRightClick twitterSection" data=" ">

পূৰ্বে লোৱা সিদ্ধান্ত অনুসৰিয়েই গুৱাহাটীত প্ৰৱেশত বাধা দিছিল গুৱাহাটী আৰক্ষীয়ে ৷ তাৰ পিছতো খানাপাৰাত আৰক্ষীৰ বেৰিকেড ভাঙি আগবাঢ়ি গৈছিল প্ৰদেশ কংগ্ৰেছৰ সভাপতি ভৃপেন বৰাকে ধৰি কংগ্ৰেছৰ একাংশ নেতা-কৰ্মী ৷ কিন্তু আৰক্ষীৰ বেৰিকেড ভঙাৰ পিছতে উত্তপ্ত পৰিস্থিতিৰ সৃষ্টি হয় ৷ বেৰিকেড ভঙা কংগ্ৰেছ নেতা-কৰ্মীৰ ওপৰত লাঠিচালনা কৰে আৰক্ষীয়ে ৷ আহত হয় অসম প্ৰদেশ কংগ্ৰেছৰ সভাপতি ভূপেন বৰাকে ধৰি কেইবাগৰাকীও নেতা-কৰ্মী । আহত হয় একাধিক আৰক্ষী জোৱানো ৷

এই ঘটনাৰ পিছতে মুখ্যমন্ত্ৰী আৰু ৰাজ্যৰ বিজেপি চৰকাৰৰ বিৰুদ্ধে সৰৱ হৈ পৰে ৰাহুল গান্ধী, জিতেন্দ্ৰ সিঙকে ধৰি কংগ্ৰেছ নেতৃত্ব ৷ আনহাতে, ঘটনাটোৰ কিছু সময়ৰ পিছতেই সামাজিক মাধ্যমত কেইবাটাও পোষ্টৰ জৰিয়তে নিজৰ প্ৰতিক্ৰিয়া প্ৰকাশ কৰে মুখ্যমন্ত্ৰী ডঃ হিমন্ত বিশ্ব শৰ্মাই । খানাপাৰাৰ উত্তপ্ত পৰিস্থিতিৰ বাবে হিমন্ত বিশ্ব শৰ্মাই পোনপটীয়াভাৱে জগৰীয়া কৰে ৰাহুল গান্ধীক ৷ লগতে অসম আৰক্ষীৰ সঞ্চালক প্ৰধানক গোচৰ ৰুজু কৰাৰ নিৰ্দেশ প্ৰদান কৰে মুখ্যমন্ত্ৰী ডঃ হিমন্ত বিশ্ব শৰ্মাই ।

নিজৰ প্ৰথমটো এক্স পোষ্টত মুখ্যমন্ত্ৰীগৰাকীয়ে কংগ্ৰেছ নেতা কে চি বেণুগোপালৰ টুইট এটা সংলগ্ন কৰি লিখিছে— "এইবোৰ অসমীয়া সংস্কৃতিৰ অংশ নহয় । আমি এখন শান্তিপূৰ্ণ ৰাজ্য । এনে 'নক্সালবাদী কৌশল' আমাৰ সংস্কৃতিৰ বাবে অপৰিচিত । মই অসম আৰক্ষীৰ ডিজিপিক আপোনালোকৰ নেতা ৰাহুল গান্ধীৰ বিৰুদ্ধে গোচৰ ৰুজু কৰিবলৈ নিৰ্দেশ দিছোঁ । ৰাহুল গান্ধীয়ে সমৰ্থকক প্ৰৰোচিত কৰাৰ বাবে তেওঁৰ বিৰুদ্ধে গোচৰ ৰুজু কৰিবলৈ নিৰ্দেশ প্ৰদান কৰিছোঁ ৷"

আনহাতে, ওপৰৰ এক্স পোষ্টটোৰ পিছতেই মুখ্যমন্ত্ৰী শৰ্মাই এটা ভিডিঅ’ সংলগ্ন কৰি আন এক পোষ্ট দিয়ে ৷ তাত তেওঁ ৰাহুল গান্ধী আৰু জিতেন্দ্ৰ সিঙে প্ৰৰোচিত কৰাৰ প্ৰমাণ পোহৰলৈ অহা বুলি দাবী কৰিছে ৷ মুখ্যমন্ত্ৰীগৰাকীয়ে সামাজিক মাধ্যম এক্সত দাবী কৰিছে, "ৰাহুল গান্ধী আৰু জিতেন্দ্ৰ সিঙে কেনেদৰে ৰাইজক অসম আৰক্ষীৰ জোৱানক মাৰিবলৈ উচটনি দিছিল সেই সন্দৰ্ভত প্ৰমাণ ওলাইছে । আমাৰ জোৱানসকল কোনো ৰাজপৰিয়ালৰ নহয়, জনসাধাৰণৰ সেৱক । নিশ্চিত হওক, আইনৰ হাত বহুত দীঘল আৰু ই নিশ্চিতভাৱে আপোনাৰ ওচৰ পাবগৈ ।"

উল্লেখযোগ্য যে খানাপাৰাৰ উত্তপ্ত পৰিস্থিতিৰ পিছত পুনৰ নিজৰ ভাৰত জোড়ো ন্যায় যাত্ৰা আৰম্ভ কৰে ৰাহুল গান্ধীয়ে ৷ আবেলি গুৱাহাটীৰ কিছু দূৰৈৰ হাজোত এখন সংবাদমেলো সম্বোধন কৰে ৷ সংবাদমেলত হিমন্ত বিশ্ব শৰ্মা আৰু বিজেপি চৰকাৰক ক্ষুৰধাৰ সমালোচনা কৰে ৰাহুল গান্ধীয়ে ৷ তেওঁৰ বিৰুদ্ধে গোচৰ ৰুজু কৰাৰ ঘোষণা প্ৰসংগত অৱশ্যে বৰ্তমানলৈকে কোনো প্ৰতিক্ৰিয়া প্ৰকাশ কৰা নাই ৰাহুল গান্ধী নাইবা কংগ্ৰেছ দলে ৷

লগতে পঢ়ক :ভাৰত জোড়ো ন্যায় যাত্রা : ৰণক্ষেত্রলৈ পৰিণত খানাপাৰা, আহত বহুজন

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.