ধুবুৰী, 16 এপ্ৰিল: ধুবুৰীৰ গৌৰীপুৰত মঙলবাৰৰ পুৱতি নিশা সংঘটিত হয় এটা শোকাৱহ পথ দুৰ্ঘটনা ৷ গৌৰীপুৰ বটেৰতল 17 নং ৰাষ্ট্ৰীয় ঘাইপথত সংঘটিত হয় এই দুৰ্ঘটনাটো । দুৰ্ঘটনাটোত থিতাতে নিহত হয় চাৰিগৰাকীকৈ লোক । চাৰিচকীয়া এখন বাহনে গছত খুন্দা মৰাৰ ফলতে দুৰ্ঘটনাটো সংঘটিত হয় বুলি জানিব পৰা গৈছে ৷
মৃত চাৰিগৰাকী লোকৰ ভিতৰত এগৰাকী যুৱতী আৰু তিনিজন যুৱক আছিল বুলি জানিব পৰা গৈছে । মৃত চালকজন চাহিল আহমেদ বুলি গৌৰীপুৰ আৰক্ষীয়ে জনায় । চাহিল আহমেদৰ লগতে বাহনখনত থকা নিহত আন দুজন লোক শ্বাহিদ খন্দকাৰ আৰু নুৰ আমিন বুলি জানিব পৰা গৈছে ৷ ইফালে নিহত যুৱতীগৰাকী গৌৰীপুৰৰ 2 নং ৱাৰ্ডৰ বনশ্ৰী শীল বুলি জানিব পৰা গৈছে ৷
আনহাতে, দুৰ্ঘটনাগ্ৰস্ত চাৰিচকীয়া বাহনখন বঙাইগাঁৱৰ পৰা ধুবুৰী অভিমুখী আছিল বুলি কোৱাৰ পৰিৱৰ্তে আন একাংশই গৌৰীপুৰৰ পৰা বাহনখন ওলাই গৈছিল বুলি দাবী কৰে ৷ চাৰিচকীয়া বাহনখনৰ পঞ্জীয়ন নম্বৰ হ’ল AS 01 BP 1557 । ইফালে আৰক্ষীয়ে ঘটনাৰ খবৰ পোৱাৰ পাচতে উক্ত স্থানত উপস্থিত হৈ মৃতদেহ কেইটা উদ্ধাৰ কৰি ঘটনাস্থলীৰ পৰা ধুবুৰী মেডিকেল কলেজ হাস্পতাললৈ প্ৰেৰণ কৰে ।
জানিব পৰা মতে ধুবুৰীত অনুষ্ঠিত হোৱা অশোকাষ্টমী মেলাত মটৰ চাইকেল ষ্টান্ট কৰাৰ বাবে বাইকাৰ যুৱতীগৰাকী ধুবুৰীলৈ আহিছিল । তেনে সময়তে গন্তব্যস্থল তথা ধুবুৰী পোৱাৰ পূৰ্বেই সংঘটিত হয় এই ভয়ংকৰ পথ দুৰ্ঘটনাটো । এই ঘটনাক কেন্দ্ৰ কৰি সমগ্ৰ এলেকাটোত শোকৰ ছাঁ পৰিছে ৷
উল্লেখ কৰা প্ৰয়োজন যে, নিশাৰ ভাগত গৌৰীপুৰৰ পৰা ধুবুৰীলৈ অহাৰ পৰিৱৰ্তে বিপৰীত দিশৰ বলদমাৰা অঞ্চললৈ গৈ দুৰ্ঘটনাত পতিত হোৱা ঘটনাই স্থানীয় লোকৰ মনত সৃষ্টি কৰিছে বহু ৰহস্যৰ । আৰক্ষীয়ে সমগ্ৰ ঘটনাৰ তদন্ত আৰম্ভ কৰিছে । আৰক্ষীৰ নিৰপেক্ষ তদন্তৰ পিছতহে সমগ্ৰ ঘটনাৰ ৰহস্য পোহৰলৈ আহিব ।
সমান্তৰালভাৱে সঁচাকৈয়ে অশোকাষ্টমী মেলাত বাইক ষ্টান্ট কৰাৰ বাবেই নে অন্য কিবা কাৰণত 3 যুৱকৰ সৈতে বাইকাৰ যুৱতীগৰাকী ওলাই গৈছিল তাকে লৈও স্থানীয় লোকৰ মনত বিভিন্ন প্ৰশ্নৰ অৱতাৰণা ঘটিছে ৷
লগতে পঢ়ক: বৰপেটাৰোড-মৰাণত ভয়াৱহ পথ দুৰ্ঘটনাত নিহত তিনি যুৱক - Road accident in Assam
