দেশজুৰি কৰ্কট ৰোগৰ ভয়াৱহতাৰ সন্দৰ্ভত বিভিন্ন বাতৰি প্ৰকাশ হৈ থকাৰ সময়তে এইবাৰ পোহৰলৈ আহিছে ভয়ংকৰ তথ্য ৷ কৰ্কট ৰোগৰ প্ৰভাৱ দেশৰ ভিতৰতে সৰ্বাধিক । কিন্তু আপোনালোকে জানেনে কৰ্কট ৰোগৰ কৰাল গ্ৰাসত পৰিছে ভাৰতৰ যুৱ প্ৰজন্ম ৷
শেহতীয়া এক তথ্যত প্ৰকাশ পোৱা অনুসৰি, কিছু বেচৰকাৰী সংস্থাই পৰিচালন কৰা হেল্পলাইনত সহায় বিচাৰি ফোন কৰা কৰ্কট ৰোগীৰ 20 শতাংশৰে বয়স 40 বছৰৰ তলত ৷ ইয়াৰ পিচতে পোহৰলৈ আহিছে যে, সাম্প্ৰতিক সময়ত কম বয়সীয়া লোকসকলৰ মাজত কৰ্কট ৰোগৰ ঘটনা উদ্বেগজনকভাৱে বৃদ্ধি হৈছে ৷
কৰ্কট মুক্ত ভাৰত ফাউণ্ডেছনৰ মতে, 1 মাৰ্চৰ পৰা 15 মে'ৰ ভিতৰত 1,368 জন লোকে কৰ্কট ৰোগৰ সন্দৰ্ভত পৰামৰ্শ বিচাৰি ফোন কৰিছে ৷ এই তথ্যত দেখুওৱা অনুসৰি 40 বছৰৰ তলৰ কৰ্কট ৰোগীৰ 60 শতাংশ পুৰুষ আছিল । আটাইতকৈ প্ৰচলিত কৰ্কট ৰোগ হৈছে মূৰ আৰু ডিঙিৰ কৰ্কট ৰোগ (26 শতাংশ) ৷ ইয়াৰ পিছত আছে গেষ্ট্ৰোইনটেষ্টিনেল কৰ্কট (16 শতাংশ), স্তন কৰ্কট (15 শতাংশ) আৰু তাৰ পিছত ৰক্ত কৰ্কট (9 শতাংশ) ।
ইয়াৰে ভিতৰত সৰ্বাধিক সংখ্যক ফোন আছিল হায়দৰাবাদৰ ৷ তাৰ পিছতেই মিৰাট, মুম্বাই আৰু নতুন দিল্লীৰ পৰা কৰা হৈছিল বুলি এন জি অ' টোৱে এক বিবৃতিত প্ৰকাশ কৰে । ৰোগীসকলে বিনামূলীয়াকৈ মতামত বিচাৰিবলৈ হেল্পলাইন নম্বৰ (93-555-20202) মুকলি কৰা হৈছিল । সোমবাৰৰ পৰা শনিবাৰৰ ভিতৰত পুৱা 10 বজাৰ পৰা সন্ধিয়া 5 বজালৈ এই ফোনকলসমূহ কাৰ্যক্ষম হৈ আছিল ৷
কৰ্কট মুক্ত ভাৰত অভিযানৰ নেতৃত্ব দি থকা মুখ্য অনুসন্ধানকাৰী আৰু জ্যেষ্ঠ অংকলজিষ্ট ডাঃ আশীষ গুপ্তাই কৈছিল যে, হেল্পলাইন নম্বৰটো মুকলি হোৱাৰ পিছৰে পৰাই ই সমগ্ৰ ভাৰতৰপৰা কৰ্কট ৰোগীসকল ফোনকল কৰিবলৈ আৰম্ভ কৰিছে ৷
ডাঃ গুপ্তাই লগতে কয়, "এই অধ্যয়নে ভাৰতক 'কৰ্কট মুক্ত' কৰাত সহায় কৰিব । ভাৰতত মূৰ আৰু ডিঙিৰ কৰ্কট ৰোগত আক্ৰান্তৰ সংখ্যা আটাইতকৈ বেছি ৷ ইয়াক জীৱনশৈলীৰ পৰিৱৰ্তন, টীকাকৰণ আৰু স্ক্ৰীনিঙৰ দ্বাৰা প্ৰায় সম্পূৰ্ণৰূপে প্ৰতিৰোধ কৰিব পাৰি ।
প্ৰাৰম্ভিক পৰ্যায়ত কৰ্কট ৰোগ ধৰা পেলোৱাৰ বাবে স্তন আৰু মলাশয়ৰ কৰ্কট ৰোগৰ অতি কাৰ্যকৰী স্ক্ৰীনিং কৌশল হাতত লোৱা হৈছিল । কিন্তু দুৰ্ভাগ্যবশতঃ ভাৰতত সঠিক স্ক্ৰীনিং কমকৈ কৰাৰ ফলত প্ৰায় 2/3 ভাগ কৰ্কট ৰোগ পলমকৈ ধৰা পৰে ৷
এই তথ্যত উল্লেখ কৰা অনুসৰি, ভাৰতত ধৰা পৰা প্ৰায় 27 শতাংশ ৰোগী কৰ্কট ৰোগৰ প্ৰথম আৰু দ্বিতীয় পৰ্যায়ত আছে ৷ আনহাতে, 63 শতাংশ কৰ্কট ৰোগৰ তৃতীয় বা চতুৰ্থ পৰ্যায়ত আছে । কৰ্কট ৰোগীসকলৰ আটাইতকৈ সচৰাচৰ প্ৰশ্নটো আছিল, তেওঁলোকৰ ৰোগৰ সঠিক চিকিৎসা আৰু আপটুডেট আছিল নে নাই নিশ্চিত কৰা ।
কৰ্কট মুক্ত ভাৰত অভিযানৰ লক্ষ্য হৈছে, শিক্ষা আৰু আগতীয়াকৈ চিনাক্তকৰণৰ জৰিয়তে কৰ্কট ৰোগৰ ৰোগী আৰু প্ৰভাৱ হ্ৰাস কৰা বুলি ডাঃ গুপ্তাই জানিবলৈ দিয়ে ৷ 67 শতাংশই কৰ্কট ৰোগীয়ে ব্যক্তিগত চিকিৎসালয়ত কৰ্কট ৰোগৰ চিকিৎসা গ্ৰহণ কৰি আছিল । যদিও 33 শতাংশ ৰোগীয়েহে চৰকাৰী চিকিৎসালয়ত চিকিৎসা গ্ৰহণ কৰি আছিল ৷
ডাঃ আশীষ গুপ্তাই লগতে কয়, "আমাৰ দেশত মেদবহুলতাৰ হাৰ বৃদ্ধি, খাদ্যাভ্যাসৰ পৰিৱৰ্তন, বিশেষকৈ অতি-সংসাধিত খাদ্যৰ ব্যৱহাৰ বৃদ্ধি আৰু বহিৰাগত জীৱনশৈলীও কৰ্কট ৰোগৰ হাৰৰ কাৰক । আমি এক স্বাস্থ্যকৰ জীৱনশৈলী গ্ৰহণ কৰিব লাগিব ৷ যুৱ প্ৰজন্মত কৰ্কট ৰোগৰ আশংকা প্ৰতিহত কৰিবলৈ ধঁপাত আৰু সুৰাৰ ব্যৱহাৰ পৰিহাৰ কৰিব লাগিব" ৷
লগতে পঢ়ক: ABV Regional Cancer Centre: ত্ৰিপুৰাত উদ্বেগজনকভাৱে বৃদ্ধি পাইছে কৰ্কট ৰোগী
