চিটাৰা ডেস্ক, ২ ফেব্ৰুৱাৰী: বিতৰ্কিত মডেল তথা অভিনেত্ৰী পুনম পাণ্ডেৰ দেহাৱসান । অভিনেত্ৰীগৰাকীৰ মৃত্যুৰ খবৰ পুনমৰ ইনষ্টাগ্ৰাম একাউণ্টত শ্বেয়াৰ কৰা হৈছে । ইফালে মুহূৰ্ততে ছ’চিয়েল মিডিয়াত জুইৰ দৰে বিয়পি পৰিছে এই খবৰ ৷ পুনমৰ আকস্মিক মৃত্যুৰ খবৰে এতিয়া স্তম্ভিত কৰি তুলিছে সকলোকে ।
উল্লেখ্য যে, পুনম পাণ্ডেৰ মৃত্যুৰ খবৰ ইনষ্টাগ্ৰামত শ্বেয়াৰ কৰা হৈছে । তেওঁৰ ইনষ্টাগ্ৰাম একাউণ্টত শ্বেয়াৰ কৰা পোষ্টটোত লিখা আছিল, ‘‘আজি পুৱা আমাৰ বাবে অতি কঠিন । আমি আপোনালোকক জনাবলৈ পাই অতি দুখী হৈছো যে আমি আমাৰ মৰমৰ পুনমক ছাৰ্ভাইকেল কেন্সাৰৰ বাবে হেৰুৱাইছো । তেওঁৰ সংস্পৰ্শলৈ অহা প্ৰতিগৰাকী মানুহে প্ৰেম আৰু দয়া লাভ কৰিছিল । এই দুখৰ সময়ত আমি গোপনীয়তাৰ বাবে অনুৰোধ জনাইছো । ”
পুনম পাণ্ডেৰ মৃত্যুৰ খবৰে স্তম্ভিত কৰি তুলিছে ছ’চিয়েল মিডিয়া ব্যৱহাৰকাৰীক । অভিনেত্ৰীগৰাকীৰ মৃত্যুৰ খবৰ পোৱাৰ পিচতে অনুৰাগীসকলে ছ’চিয়েল মিডিয়াত পোষ্ট কৰি শোক প্ৰকাশ কৰিছে । কিন্তু বহু নেটিজেনে জল্পনা-কল্পনা কৰিছে যে তেওঁৰ মৃত্যুৰ ঘোষণা কেৱল প্ৰচাৰমূলক ষ্টাণ্ট নেকি ? এই পোষ্টটোৰ প্ৰতি প্ৰতিক্ৰিয়া প্ৰকাশ কৰি এজন ব্যৱহাৰকাৰীয়ে লিখিছে, “হেৰাই গৈছে ? আশাকৰো এইটো কোনো ভুৱা বা ধেমেলীয়া পোষ্ট নহয় । আশাকৰো এইটো কোনো মাৰ্কেটিং গিমিক নহয় কিন্তু যদি সঁচা হয় । তেন্তে তেওঁৰ আত্মাই শান্তি পাওক ৷” এজন ব্যৱহাৰকাৰীয়ে মন্তব্য কৰিছে, “আশাকৰো এইটো এটা ভুৱা পোষ্ট ৷” আন এজন ব্যৱহাৰকাৰীয়ে লিখিছে, “হয়তো এইটো এটা প্ৰেংক ।’’
কোন আছিল পুনম পাণ্ডে ?
পুনম পাণ্ডে আছিল এগৰাকী মডেল । ২০১১ চনৰ ক্ৰিকেট বিশ্বকাপৰ ফাইনেলৰ পূৰ্বে ভিডিঅ’ বাৰ্তাযোগে ভাৰতে ফাইনেল মেচত জয়ী হ’লে কাপোৰ খুলিব বুলি প্ৰতিশ্ৰুতি দিছিল বিতৰ্কিত মডেলগৰাকীয়ে ৷ ইয়াৰ লগে লগে লাইমলাইটলৈ আহিছিল পুনম ৷ এই দাবীৰে প্ৰথমবাৰৰ বাবে সকলো ছ’চিয়েল মিডিয়া প্লেটফৰ্মতে দৃষ্টি আকৰ্ষণ কৰিছিল পুনমে । কংগনা ৰনৌতে সঞ্চালনা কৰা ‘লকআপ’ নামৰ ৰিয়েলিটি শ্ব’তো দেখা গৈছিল পুনমক ।
লগতে পঢ়ক: কেন্সাৰৰ সৈতে যুঁজি অৱশেষত ইহলীলা সম্বৰণ অভিনেতা জুনিয়ৰ মেহমুদৰ
