হায়দৰাবাদ : স্তন কেন্সাৰৰ সৈতে যুঁজি থকা টিভি অভিনেত্ৰী হিনা খানে গোপনে নিজৰ দীৰ্ঘদিনীয়া প্ৰেমিকৰ সৈতে বিয়াত বহে । ৪ জুনত ছ’চিয়েল মিডিয়াত বিশেষ ফটো শ্বেয়াৰ কৰি হিনা খানে আনুষ্ঠানিকভাৱে বিবাহৰ কথা ঘোষণা কৰে । হিনাৰ এই ঘোষণাই অনুৰাগীক সুখী কৰি তোলে ।
৪ জুন বুধবাৰে হিনা খান নিজৰ দীৰ্ঘদিনীয়া প্ৰেমিক ৰকি জয়ছৱালৰ সৈতে বিবাহপাশত আবদ্ধ হয় । দুয়ো ব্যক্তিগত অনুষ্ঠানত বিবাহপাশত আবদ্ধ হয়, য’ত কেৱল পৰিয়ালৰ সদস্য আৰু ঘনিষ্ঠ বন্ধু-বান্ধৱীয়েহে অংশগ্ৰহণ কৰে । দুয়োৱে বহুদিন ধৰি ডেট কৰি আছিল আৰু প্ৰতিটো সময়তে এজন আনজনৰ কাষত আছিল ।
বুধবাৰে হিনা খানে নিজৰ বিবাহৰ খবৰ দি সকলোকে আচৰিত কৰি তোলে । টিভি অভিনেত্ৰীগৰাকীয়ে নিজৰ ইনষ্টাগ্ৰামত বিয়াৰ সুন্দৰ ফটো পোষ্ট কৰি দীঘলীয়া আৰু হৃদয়স্পৰ্শী টোকা লিখে ।
হিনা খানে নিজৰ পোষ্টত লিখে, "দুখন ভিন্ন জগতৰ পৰা আমি প্ৰেমৰ বিশ্বব্ৰহ্মাণ্ড সৃষ্টি কৰিলোঁ । আমাৰ মতানৈক্যবোৰ নাইকিয়া হৈ গ’ল, আমাৰ হৃদয় এক হৈ পৰিল, আজীৱন স্থায়ী হৈ থকা এটা বন্ধনৰ সৃষ্টি কৰিলে । এতিয়া আমাৰ ঘৰ, আমাৰ পোহৰ, আমাৰ আশা একেলগে । আমি সকলো বাধা অতিক্ৰম কৰোঁ । আজি আমাৰ মিলন চিৰদিনৰ বাবে প্ৰেম আৰু আইনত ছীল কৰা হৈছে । পত্নী আৰু স্বামী হিচাপে আমি আপোনাৰ আশীৰ্বাদ আৰু শুভেচ্ছা বিচাৰিছোঁ ।"
হিনা খানৰ বিয়াৰ সাজ
বিয়াৰ বাবে হিনা খানে বাছি লয় অপেল গ্ৰীণ হেণ্ডলুম শাৰী, য’ত সোণ আৰু ৰূপৰ সূতাৰে বোৱা শতিকা পুৰণি ডিজাইন আছে । হিনাক বিখ্যাত ফেশ্বন ডিজাইনাৰ মনীষ মালহোত্ৰাই ডিজাইন কৰা গহনা পিন্ধি থকা দেখা গৈছে । আনহাতে ৰকিয়ে বিয়াৰ বাবে মনীষ মালহোত্ৰাৰ বগা চিকানকাৰী কুৰ্তা বাছি লয় ।
শ্বেয়াৰ কৰা ফটোসমূহত নৱবিবাহিত দম্পতীয়ে সুন্দৰ ভংগীমা দিয়া দেখা গৈছে । বহু ফটোত হিনা খানক বিয়াৰ আঙঠি, মেহেন্দী আৰু অন্যান্য বিয়াৰ সাজ-পোছাক প্ৰদৰ্শন কৰা দেখা গৈছে । ইয়াৰে এখন ফটোত দম্পতীটোৱে পঞ্জীয়নভুক্ত বিবাহ কৰা দেখা গৈছে । এই ফটোখনে নিশ্চিত কৰে যে তেওঁলোকে নিজৰ নতুন যাত্ৰা আৰম্ভ কৰিবলৈ পঞ্জীয়নভুক্ত বিবাহ বাছি লয় ।
নৱবিবাহিত দম্পতীলৈ অভিনন্দন বাৰ্তা
ফটোবোৰ পোষ্ট কৰাৰ পাছত চেলেব্ৰিটী আৰু অনুৰাগীয়ে শুভেচ্ছা যাচিবলৈ আৰম্ভ কৰে । বিখ্যাত প্ৰযোজক একতা কাপুৰে পোষ্টটোৰ কমেণ্টত লিখিছে, "বেষ্ট নিউজ, দ্য কিউটেষ্ট কাপল এভাৰ ।" মালাইকা অৰোৰা, গৌহৰ খান, সোহা আলী খান, জাৰিন খান, বিপাশা বসু, অংকিতা লোখাণ্ডেকে ধৰি বহু চেলেব্ৰিটী আৰু অনুৰাগীয়ে নৱবিবাহিত দম্পতীটোক নতুন যাত্ৰাৰ বাবে অভিনন্দন আৰু শুভেচ্ছা জ্ঞাপন কৰিছে ।
হিনা খান আৰু ৰকি জয়ছৱালৰ প্ৰথম সাক্ষাৎ
হিনা খান আৰু ৰকি জয়ছৱাল ‘য়ে ৰিষ্টা ক্যা কেহলাতা হে’ৰ ছেটত লগ হৈছিল । শ্ব’টোত হিনাই অক্ষৰাৰ চৰিত্ৰত অভিনয় কৰিছিল আৰু ৰকি আছিল তত্বাৱধায়ক প্ৰযোজক । সময়ৰ লগে লগে তেওঁলোকৰ সম্পৰ্ক প্ৰেমলৈ ৰূপান্তৰ হয় আৰু ২০১৭ চনত তেওঁলোকে বিশ্ববাসীৰ আগত ঘোষণা কৰে ।
লগতে পঢ়ক : আলহীৰ ৰূপত আহিল কোন ? ঘৰৰ ভিতৰতে গুলীয়াই থৈ গ’ল টিকটকাৰ ছনা ইউছুফক !
