গুৱাহাটী, 22 মে’ : ক্ৰমাৎ যেন ঠন ধৰি উঠিছে অসমীয়া বোলছবি উদ্যোগটো ৷ পৰিচালক-প্ৰযোজকে নতুন নতুন কাহিনীৰে দৰ্শকক আমোদ দিয়াৰ মানসেৰে লৈ আহিছে বহু নতুন নতুন প্ৰজেক্ট ৷ মুক্তি পাইছে বহুকেইখন অসমীয়া চিনেমা ৷
পূৰ্বতে য’ত নেকি বছৰটোত এখন অসমীয়া ছবি মুক্তি দিয়াক লৈ ভাবিবলগীয়া হৈছিল, এতিয়া প্ৰায় গোটেই বছৰজুৰি চিনেমাই মুক্তি লাভ কৰে বুলি ক’লেও ভুল কোৱা নহ’ব ৷ চলিতে বছৰটোতে মুক্তি লাভ কৰে কেইবাখনো অসমীয়া চিনেমাই ৷ লগতে মুক্তিৰ পথত আছে আন বহুকেইখন চিনেমা ৷
প্ৰাপ্ত খবৰ অনুসৰি, চলিত বছৰতে ছেপ্টেম্বৰ মাহত মুক্তি পাবলগীয়া এখন ছবিৰ গীতত কণ্ঠদান কৰিছে বলীউডৰ জনপ্ৰিয় গায়ক শ্বানে ৷ ছবিখনৰ নাম সুন্দৰপুৰ কেঅ'ছ ৷ আৰ চি প্ৰডাকচনৰ বেনাৰত নিৰ্মাণ কৰা এই ছবিখনৰ পৰিচালনা ঝুলন কৃষ্ণ মহন্তৰ ।
২৯ নৱেম্বৰত ৰাজ্যৰ প্ৰতিটো ছবিগৃহতে মুক্তি লাভ কৰিবলগীয়া এই নতুন অসমীয়া ছবিখনৰ শ্বুটিং ইতিমধ্যে সমাপ্ত হৈছে । এটি হৃদয়স্পৰ্শী বিষয়বস্তুৰে নিৰ্মিত এই ছবিখনৰ মুখ্য চৰিত্ৰত অভিনয় কৰিছে নেশ্যনেল স্কুল অৱ ড্ৰামা দিল্লীৰ স্নাতক তথা সু-নৃত্যশিল্পী পাৰ্থপ্ৰতীম হাজৰিকাই । ছবিখনৰ কাহিনী আৰু সম্পাদনা পৰিচালনা ঝুলন কৃষ্ণ মহন্তৰ ।
আনহাতে, ছবিখনৰ চিত্ৰগ্ৰহণ কৰিছে কুমাৰ দাসে ৷ ছবিখনৰ সংগীত পৰিচালনা সৌৰভ মহন্তৰ, ডি আই ধনজিত দাসৰ আৰু শব্দ সংমিশ্ৰণ ৰাষ্ট্ৰীয় বঁটাপ্ৰাপক যান্ত্ৰী দেৱজিত গায়নৰ । ছবিখনৰ এটি গীত লিখিছে বিশিষ্ট গীতিকাৰ তথা লেখিকা মঞ্জুলা হাজৰিকাই । ছবিখনত আন এটি গীত লিখাৰ উপৰিও কন্ঠদান কৰিছে জনপ্ৰিয় গায়িকা গায়ত্ৰী হাজৰিকাই ।
উল্লেখ্য যে, ঝুলন কৃষ্ণ মহন্তই পৰিচালনা কৰা প্ৰথমখন ছবি "নদী মাথোঁ বয়" বহুকেইখন চলচ্চিত্ৰ মহোৎসৱত প্ৰদৰ্শন হোৱাৰ লগতে বঁটা লাভ কৰিবলৈ সক্ষম হৈছে । মহন্তৰ প্ৰথমখন ছবিৰ দৰে এই ছবিখনকো দৰ্শকে আদৰি ল’ব বুলি আশাবাদী পৰিচালক তথা ছবিখনৰ কলা-কুশলীসকল ।
লগতে পঢ়ক : ছাচপেন্স-থ্ৰিলাৰ-একশ্যন সহিতে শ্বাহৰুদ্ধ কৰিব ৰুদ্ৰই - NEW ASSAMESE FILM RUDRA
