নেশ্যনেল ডেস্ক, 3 মে’ : বিশ্বৰ সৰ্ববৃহৎ গণতান্ত্ৰিক দেশ ভাৰতবৰ্ষৰ সাংবিধানিক মুৰব্বী ৰাষ্ট্ৰপতিৰ চিমলাৰ বাসগৃহ ১৭৫ বছৰ পুৰণি । অট্টালিকাটোৰ বেছিভাগ অংশ কাঠ আৰু মাটিৰে তৈয়াৰ কৰা যদিও ই ইমানেই মজবুত যে ভূমিকম্পয়ো ইয়াৰ ওপৰত কোনো প্ৰভাৱ পেলাব নোৱাৰে । কাৰণ ৰাষ্ট্ৰপতিৰ বাসগৃহ নিৰ্মাণত পৰম্পৰাগত ষ্টাকো নিৰ্মাণ শৈলী ব্যৱহাৰ কৰা হৈছিল ।
ধজ্জী দেৱালৰ (পাহাৰত পৰম্পৰাগত দেৱালৰ বাবে ব্যৱহাৰ কৰা শব্দ) বিশেষত্ব হ’ল ভূমিকম্পয়ো ইয়াত কোনো প্ৰভাৱ পেলাব নোৱাৰে । ৰাজতন্ত্ৰৰ কালত এই ভৱনটো কোটিটকীয়া ৰাজকীয় ৰাজ্যৰ সম্পত্তি আছিল । এতিয়া এই ভৱনটো ভাৰতৰ ৰাষ্ট্ৰপতিৰ গ্ৰীষ্মকালীন বাসগৃহ হিচাপে ব্যৱহাৰ কৰা হয় ।
ৰাষ্ট্ৰপতি দ্ৰৌপদী মুৰ্মুৰ চিমলা ভ্ৰমণ
চাৰিদিনীয়া প্ৰৱাসত হিমাচললৈ আহি আছে দেশৰ ৰাষ্ট্ৰপতি দ্ৰৌপদী মুৰ্মু । চিমলাত তেওঁ এই অট্টালিকাতে বাস কৰিব । যোৱা বছৰো ৰাষ্ট্ৰপতিগৰাকীয়ে ১৮ এপ্ৰিলত তিনিদিনীয়া চিমলা ভ্ৰমণলৈ আহিছিল । এতিয়া ৰাষ্ট্ৰপতিয়ে চিমলাৰ একেটা অট্টালিকাৰ পৰা চাৰিদিন কাম চলাব । দিল্লীৰ ৰাষ্ট্ৰপতি ভৱনৰ সচিবালয় চাৰিদিনৰ বাবে চিমলালৈ স্থানান্তৰ কৰা হ’ব ।
অট্টালিকাত পৰম্পৰাগত ধজ্জী নিৰ্মাণ শৈলীৰ ব্যৱহাৰ
চিমলাৰ সমীপৰ ছাৰাবৰাত অৱস্থিত ৰাষ্ট্ৰপতিৰ গ্ৰীষ্মকালীন বাসগৃহ ৰিট্ৰিটৰ দেৱাল মাটিৰে নিৰ্মিত । এই দেৱালবোৰক ধজ্জী দেৱাল বুলি কোৱা হয় । ৰাষ্ট্ৰপতি হোৱাৰ পিছত দ্বিতীয়বাৰৰ বাবে ইয়ালৈ আহিব দ্ৰৌপদী মুৰ্মু । যদিও ছাৰবৰাত অৱস্থিত ৰাষ্ট্ৰপতিৰ বাসগৃহ সাধাৰণ জনতাৰ বাবে মুকলি, তথাপিও ৰাষ্ট্ৰপতিৰ ভ্ৰমণৰ সময়ত কটকটীয়া নিৰাপত্তা ব্যৱস্থা কৰা হয় । ইয়াত সাধাৰণ জনতা আৰু পৰ্যটকৰ আহ-যাহ সম্পূৰ্ণৰূপে বন্ধ কৰি দিয়া হৈছে । নিৰাপত্তাৰ বাবে নিয়োগ কৰা হৈছে এক হাজাৰৰো অধিক জোৱান । ইয়াৰ উপৰিও ৰাষ্ট্ৰপতিৰ ব্যক্তিগত নিৰাপত্তাৰ ব্যৱস্থাও কটকটীয়া কৰা হৈছে ।
এই ভৱনটো ১৮৫০ চনত নিৰ্মাণ কৰা হৈছিল
ছাৰাবৰাৰ নিস্তব্ধ, নিৰ্জন, প্ৰাকৃতিক আৰু চিত্ৰময় পৰিৱেশত অৱস্থিত এই ভৱনটো ১৮৫০ চনত নিৰ্মাণ কৰা হৈছিল । ৰাজধানীৰ হৈ চৈৰ পৰা আঁতৰত প্ৰকৃতিৰ কোলাত আছে ৰিট্ৰিট ভৱনটো । এই ৰিট্ৰিট ভৱনটো প্ৰথমে ৰাজপৰিয়ালৰ কোটি টকীয়া সম্পত্তি আছিল । এই অট্টালিকাটো এক হাজাৰ বৰ্গফুটতকৈও অধিক এলেকাত বিস্তৃত । ইংৰাজৰ শাসনকালত তেতিয়াৰ শাসকসকলে ইয়াক ৰজাৰ পৰা পট্টাত লৈছিল ।
এই ঘটনা ১৮৫০ চনত সংঘটিত হৈছিল । ৰজাই পিছলৈ ১৮৮৬ চনত ইয়াক ইংৰাজৰ পৰা ঘূৰাই লৈ যায় । যিহেতু ব্ৰিটিছে এই ভৱনটো ভাল পাইছিল, সেয়েহে ১৮৯৫ চনত তেতিয়াৰ ভাইচৰয়ে ইয়াক পুনৰ ব্ৰিটিছ শাসনৰ অধীনলৈ আনে ।
ৰিট্ৰিটত ভাৰত আৰু বিদেশৰ ফুলেৰে সজাই তোলা বাগিচা
এই অট্টালিকাটোৰ বাহিৰত এখন ধুনীয়া লন আছে । বহু সময়ত এই লনত অতিথিসকলৰ বাবে সতেজ খাদ্যৰ ব্যৱস্থা কৰা হয় । ৰাষ্ট্ৰপতি নিৱাস ৰিট্ৰিটৰ চৌহদত আছে এখন ডাঙৰ ফুলনি আৰু এখন বাগিচাও । এই বাগিচাত থলুৱা আৰু বিদেশী জাতৰ আপেল গছ ৰোপণ কৰা হয় । ফুলৰ যত্ন ল’বলৈ কেইবা ডজন মালিক নিয়োগ কৰা হৈছে । ভাৰত আৰু বহিঃৰাষ্ট্ৰৰ পৰা বহু জাতৰ ফুল ক্ৰয় কৰি ইয়াত ৰোপণ কৰা হৈছে ।
ৰাষ্ট্ৰপতি দ্ৰৌপদী মুৰ্মু দ্বিতীয়বাৰৰ বাবে চিমলা ভ্ৰমণ
দ্ৰৌপদী মুৰ্মু দেশৰ দ্বিতীয়গৰাকী মহিলা ৰাষ্ট্ৰপতি । প্ৰতিভা পাটিলো প্ৰথম মহিলা ৰাষ্ট্ৰপতি হিচাপে চিমলালৈ আহিছিল । ক্ৰমাগতভাৱে দ্বিতীয়টো বছৰৰ বাবে চিমলা ভ্ৰমণলৈ আহিব দ্ৰৌপদী মুৰ্মু । যোৱা বছৰ তেওঁ ব্ৰিটিছৰ শাসনকালত ভাইচৰয়ৰ বাসগৃহ ভাইচৰগেল ল'জটো পৰিদৰ্শন কৰিছিল । ভাইচৰগেল ল'জক স্বাধীনতাৰ পিছত ৰাষ্ট্ৰপতি নিবাস বুলি কোৱা হৈছিল । পিছলৈ তেতিয়াৰ ৰাষ্ট্ৰপতি সৰ্বপল্লী ৰাধাকৃষ্ণনে উচ্চশিক্ষাৰ কেন্দ্ৰ হিচাপে ভাইচৰগেল ল'জ প্ৰতিষ্ঠা কৰে । এতিয়া ভাইচৰগেল ল'জখনক ইণ্ডিয়ান ইনষ্টিটিউট অৱ হায়াৰ ষ্টাডিজ বুলি জনা যায় ।
লগতে পঢ়ক: তুষাৰপাতৰ ফলত কেদাৰনাথ যাত্ৰাৰ প্ৰস্তুতি বাধাগ্ৰস্ত - Kedarnath yatra
