নেশ্যনেল ডেস্ক, 21 এপ্ৰিল: ৰাজস্থানত সংঘটিত হৈছে এক শোকাৱহ পথ দুৰ্ঘটনা ৷ ৰাজস্থানৰ ঝালাৱাৰ জিলাৰ অকলেৰা থানা এলেকাত সংঘটিত হৈছে এই হৃদয় বিদাৰক দুৰ্ঘটনাটো । দ্ৰুতগতিত অহা ট্ৰলী এখনে নিয়ন্ত্ৰণ হেৰুৱাই এখন ভেনত খুন্দা মৰাৰ ফলত একেটা অঞ্চলৰ 9 জনকৈ লোকৰ মৃত্যুৰ ঘটে ।
দেওবাৰৰ পুৱাই সংঘটিত হয় এই শোকাৱহ দুৰ্ঘটনাটো । ঘটনা সন্দৰ্ভত জানিব পৰা মতে আটাইকেইজন লোক মধ্যপ্ৰদেশৰ পৰা এখন ভেনেৰে দুগৰগাঁৱত থকা নিজৰ ঘৰলৈ উভতি আহিছিল । সেই সময়তে পচোলাৰ সমীপত এখন ট্ৰলীয়ে নিয়ন্ত্ৰণ হেৰুৱায় ভানখনত খুন্দা মাৰে ।
অকলেৰা আৰক্ষী থানাৰ ভাৰপ্ৰাপ্ত বিষয়া সন্দীপ বিষ্ণৈয়ে জনোৱা মতে, শনিবাৰে অকলেৰাৰ সমীপৰ ডুংগাৰ গাঁৱৰ বাগৰি সম্প্ৰদায়ৰ লোকসকল তেওঁলোকৰ আত্মীয়ৰ বিবাহ অনুষ্ঠানৰ বাবে মধ্যপ্ৰদেশলৈ গৈছিল । উক্ত বিবাহ কাৰ্যসূচীৰ পৰা ঘৰ অভিমুখে গৈ থাকোতে ভ্যানখনত তীব্ৰবেগী ট্ৰলী এখনে খুন্দা মাৰে । এই দুৰ্ঘটনাত 9 জন লোকৰ মৃত্যু ঘটিছে । বৰ্তমান আৰক্ষীয়ে মৃতদেহবোৰ অকলেৰাৰ সমূহীয়া স্বাস্থ্যকেন্দ্ৰত ৰাখিছে ।
ঘটনা সন্দৰ্ভত ষ্টেচন ইনচাৰ্জে জনোৱা মতে মৃত সকলো লোক বাগৰি সম্প্ৰদায়ৰ । বৰ্তমান আৰক্ষীয়ে দুৰ্ঘটনাৰ ঘটনা সন্দৰ্ভত তদন্ত আৰম্ভ কৰিছে । এই দুৰ্ঘটনা সম্পৰ্কে পৰিয়ালৰ লোকক অৱগত কৰা হৈছে বুলি ষ্টেচন ইনচাৰ্জে জনায় । পৰিয়ালৰ সদস্যৰ অভিযোগৰ ভিত্তিতহে আৰক্ষীয়ে পৰৱৰ্তী ব্যৱস্থা গ্ৰহণ কৰিব ।
উল্লেখ কৰা প্ৰয়োজন যে বিগত কিছুদিনৰ ভিতৰত জিলাখনত সংঘটিত হোৱা এইটো দ্বিতীয়টো বৃহৎ দুৰ্ঘটনা ৷ ইয়াৰ পূৰ্বে গংগাধৰ আৰক্ষী এলেকাত ডাম্পাৰৰ সৈতে হোৱা সংঘৰ্ষত 5 জন লোকে প্ৰাণ হেৰুৱাইছিল ।
লগতে পঢ়ক: গুজৰাটত ভয়াৱহ পথ দুৰ্ঘটনাত নিহত ১০ - Accident in Gujarat
