নেশ্যনেল ডেস্ক,২৫ জানুৱাৰী : আপুনি জানেনে দেশৰ প্ৰথম ভোটাৰ কোন ? দেশত প্ৰথম নিৰ্বাচন কেতিয়া অনুষ্ঠিত হৈছিল ? নিৰ্বাচনৰ ৫ মাহ পূৰ্বে হিমাচলত ভোটগ্ৰহণ কিয় অনুষ্ঠিত হৈছিল ? এই সন্দৰ্ভত এক আকৰ্ষণীয় কাহিনী আছে । যিটো কাহিনীত বিদ্যালয়ৰ এগৰাকী সাধাৰণ শিক্ষক গণতন্ত্ৰৰ আটাইতকৈ বৃহৎ ব্ৰেণ্ড এম্বেচেডৰ । যি পৰিস্থিতিয়ে নহওঁক তেওঁ প্ৰতিবাৰেই ভোটদান কৰিছিল । মৃত্যুৰ প্ৰাকমুহূৰ্তলৈ তেওঁ ভোটদান কৰি আছিল । ৰাষ্ট্ৰীয় ভোটাৰ দিৱসত গণতন্ত্ৰৰ সেইগৰাকী নায়কৰ কথা উল্লেখ কৰিব বিচাৰিছো । এয়া হৈছে দেশৰ প্ৰথম ভোটাৰ শ্যাম চৰণ নেগীৰ কাহিনী ।
স্বাধীনতাৰ পিচত প্ৰথম নিৰ্বাচনৰ প্ৰথম ভোট- স্বাধীনতাৰ প্ৰায় ৫ বছৰ পিচত ১৯৫২ চনৰ ফেব্ৰুৱাৰী মাহত প্ৰথম সাধাৰণ নিৰ্বাচন অনুষ্ঠিত হৈছিল । কিন্তু হিমাচলৰ জনজাতীয় অঞ্চলত তুষাৰপাতৰ বাবে প্ৰায় ৫ মাহ পূৰ্বে ১৯৫১ চনৰ অক্টোবৰত নিৰ্বাচন অনুষ্ঠিত হৈছিল । ১৯১৭ চনৰ ১ জুলাইত জন্মগ্ৰহণ কৰা শ্যাম চৰণ নেগীৰ বয়স আছিল তেতিয়া ৩৪ বছৰ । প্ৰকৃততে নিৰ্বাচনত তেওঁৰ আন ঠাইত নিযুক্ত আছিল আৰু তেওঁৰ ভোটকেন্দ্ৰ কল্পাত আছিল ।
ইটিভিৰ সৈতে বাৰ্তালাপ কৰি তেওঁ কৈছিল, "মই প্ৰিজাইডিং বিষয়াজনক কৈছিলো যে মই ভোট দিব লাগিব, তেওঁ কৈছিল যে ইয়াত ক'ত নো ১০০ শতাংশ ভোটদান হ'ব । গতিকে মই সন্ধিয়া ঘৰলৈ উভতি আহিছিলোঁ আৰু পিছদিনা পুৱা ৬ বজাৰ পূৰ্বে ভোট দিবলৈ ভোটকেন্দ্ৰত উপস্থিত হৈছিলো । তেতিয়ালৈকে, নিৰ্বাচনী দলটোও আহি পোৱা নাছিল । মই তেওঁলোকক অনুৰোধ কৰিছিলো যে মোক সোনকালে ভোট দিবলৈ দিয়ক যাতে মই নিৰ্বাচনৰ দায়িত্বৰ বাবে যাব পাৰো । পিচত মই মোৰ ভোট দিছিলো আৰু তাৰ পিচত মই মোৰ কৰ্তব্যলৈ উভতি গৈছিলো ।"
২০০৭ চনত ভাৰতৰ প্ৰথম ভোটাৰ চিনাক্ত হ'ল- ১৯৫১ চনৰ অক্টোবৰৰ সেই পুৱা সেই খৰখেদাকৈ দিয়া ভোটটো শ্যাম চৰণ নেগীৰ ভাগ্য সলনি কৰিবলৈ গৈ আছিল । কিন্তু তেওঁৰ পৰিচয় প্ৰকাশ পাবলৈ প্ৰায় ৫৬ বছৰ সময় লাগিছিল ।
ইয়াৰ কৃতিত্ব হিমাচলৰ এগৰাকী প্ৰাক্তন ৰিটাৰ্ণিং বিষয়া মনীষা নন্দাক দিয়া হয়, যিয়ে ২০০৭ চনত প্ৰথম সাধাৰণ নিৰ্বাচনত ভোট দান কৰা ভোটাৰসকলক চিনাক্ত কৰাৰ সময়ত সকলো তথ্য পৰীক্ষা কৰিছিল, যাৰ বাবে বিশ্বৰ সৰ্ববৃহৎ গণতন্ত্ৰ ইয়াৰ প্ৰথম ভোটাৰৰ সৈতে পৰিচয় কৰাই দিয়া হৈছিল । কেইবামাহ ধৰি চিমলাৰ পৰা দিল্লীলৈ ফাইলৰ কামৰ আদান প্ৰদানৰ অন্তত স্বাধীন ভাৰতৰ প্ৰথম ভোটাৰৰ নাম পোহৰলৈ আহিছিল । ২০১০ চনত মুখ্য নিৰ্বাচন আয়ুক্ত নবীন চাওলাই কিন্নৌৰত শ্যাম চৰণ নেগীক সম্বৰ্ধনা জনাইছিল ।
প্ৰতিবাৰে ভোট দিছিল- শ্যাম চৰণ নেগীয়ে মুঠ ৩৪ বাৰ ভোট দিছিল । বিধানসভা, লোকসভা বা গাঁও পঞ্চায়তৰ নিৰ্বাচনেই হওঁক, শ্যাম চৰণ নেগীয়ে নিজৰ কাম এৰি ভোট দিছিল । একে সময়তে, তেওঁ যুৱক-যুৱতীসকলক ভোট দিবলৈ পৰামৰ্শ দিছিল । নতুন শতিকাৰ প্ৰথম দশকত, যেতিয়া দেশখনে প্ৰথম ভোটাৰ বিচাৰি পাইছিল, তেওঁ গণতন্ত্ৰৰ প্ৰতীক হৈ পৰিছিল । ২০১৪ চনৰ লোকসভা নিৰ্বাচনৰ পূৰ্বে গুগল ইণ্ডিয়াই নেগীৰ ওপৰত এখন তথ্যচিত্ৰ নিৰ্মাণ কৰিছিল আৰু তেওঁক গণতন্ত্ৰৰ ব্ৰেণ্ড এম্বেচেডৰ হিচাপে প্ৰশংসা কৰি সজাগতাৰ সৃষ্টি কৰিছিল ।
মৃত্যুৰ ৩ দিন পূৰ্বে অন্তিম ভোট - হিমাচল প্ৰদেশত ২০২২ চনৰ ১২ নৱেম্বৰত নিৰ্বাচন অনুষ্ঠিত হৈছিল । শ্যাম চৰণ নেগীৰ স্বাস্থ্য তেতিয়া বেয়া আছিল । নিৰ্বাচন আয়োগে ৮০ বছৰৰ অধিক বয়সৰ লোক আৰু বিকলাঙ্গসকলৰ বাবে ঘৰৰ পৰাই ভোটদানৰ অনুমতি দিছিল । আগ্ৰহী লোকসকলে ১২ডি প্ৰপত্ৰ পূৰণ কৰি এই সুবিধা লাভ কৰিব পাৰিছিল । নিৰ্বাচন আয়োগে শ্যাম চৰণ নেগীৰ ওচৰত আবেদন জনাইছিল, কিন্তু তেওঁ প্ৰথমে ইয়াক প্ৰত্যাখ্যান কৰিছিল আৰু কৈছিল যে তেওঁ কেৱল ভোটকেন্দ্ৰলৈ গৈহে ভোট দিব ।
ইফালে, শ্যাম চৰণ নেগীৰ স্বাস্থ্যৰ অৱনতি ঘটিবলৈ ধৰিলে । ১০৫ বছৰীয়া শ্যাম চৰণ নেগীয়ে সম্ভৱতঃ জানিছিল যে তেওঁৰ অন্তিমটো সুযোগ আছিল । ২০২২ চনৰ ২ নৱেম্বৰত, হিমাচলত ভোটদানৰ ১০ দিন পূৰ্বে নিৰ্বাচন আয়োগে তেওঁৰ ঘৰত সম্পূৰ্ণ প্ৰস্তুতি চলাইছিল আৰু শ্যাম চৰণ নেগীয়ে ভোটদান কৰিছিল । ভোটদানৰ ৩ দিন পিচতে ২০২২ চনৰ ৫ নৱেম্বৰত শ্যাম চৰণ নেগীৰ মৃত্যু হয় । কিন্তু তেওঁৰ শেষ উশাহৰ আগলৈ তেওঁ শেষ ভোটো দিছিল ।
গণতন্ত্ৰৰ নায়ক- শ্যাম চৰণ নেগী গণতন্ত্ৰৰ নায়ক আছিল । বন বিভাগত নিযুক্তি লাভ কৰা শ্যাম চৰণ নেগীয়ে পিচত বিদ্যালয়ৰ শিক্ষক হিচাপে দায়িত্ব লৈ গোটেই জীৱন ভোটদানৰ গুৰুত্বৰ ওপৰত মন্তব্য কৰিছিল । দেশৰ প্ৰথম ভোটাৰ হোৱাৰ বাবে, তেওঁ দেশৰ ভিভিআইপি ভোটাৰ আছিল । ভোটদানৰ দিনা স্থানীয় প্ৰশাসনে তেওঁক ঘৰৰ পৰা ভোটকেন্দ্ৰলৈ শোভাযাত্ৰাৰ জৰিয়তে লৈ গৈছিল । য'ত তেওঁক সেই ভোটকেন্দ্ৰত ৰঙা দলিচা আৰু ফুলৰ মালাৰে আদৰণি জনোৱা হৈছিল ।
শ্যাম চৰণ নেগী সেই লোকসকলৰ বাবে এক উদাহৰণ বিশেষকৈ যুৱসকলৰ বাবে যি সকলে ভোটদানক কেৱল বন্ধৰ দিন বুলি বিবেচনা কৰে । গণতন্ত্ৰৰ মহান উৎসৱত প্ৰতিটো ভোট অতি গুৰুত্বপূৰ্ণ । শ্যাম চৰণ নেগীয়ে শিক্ষা দিছিল যে প্ৰতিটো পানীৰ টোপালৰ দ্বাৰা এখন সাগৰৰ সৃষ্টি হয় । সেয়েহে আপোনাৰ এটা ভোটৰ গুৰুত্বক অৱমূল্যায়ন নকৰিব । আপোনাৰ ভোট কেৱল বিশ্বৰ সৰ্ববৃহৎ গণতন্ত্ৰক শক্তিশালী কৰাই নহয় দেশৰ প্ৰথম ভোটাৰৰ প্ৰতিও এক শ্ৰদ্ধাঞ্জলি হ'ব ।
লগতে পঢ়ক :ৰাষ্ট্ৰীয় ভোটাৰ দিৱস 2024: ভোটদান কেৱল অধিকাৰেই নহয় দায়িত্বও
