میرٹھ: اولمپک کھیلوں میں پانچ کھلاڑیوں کا تعلق میرٹھ سے ہونے پرعلاقہ میں جشن کا ماحول

ٹوکیو اولمپک2021 اُتر پردیش کے کھلاڑیوں کے لئے خاص ہونے والا ہے۔ پہلی مرتبہ ریاست سے 10 کھلاڑی اولمپک کھیلوں میں میڈل کی دعوے داری پیش کرنے جارہے ہیں۔ ان دس کھلاڑیوں میں سے پانچ کا تعلق میرٹھ سے ہونے کی وجہ سے ان کھلاڑیوں کے گھر، گاؤں اور قصبے کے علاوہ مغربی یوپی کے لوگوں میں میڈل کے لیے خوشی اور اُمید کی لہر دیکھی جارہی ہے۔

ٹوکیو اولمپک میں حصہ لینے جارہے اتر پردیش کے دس کھلاڑیوں میں سے 5 کا تعلق میرٹھ سے ہے۔ 10 میٹر ایئر پسٹل میں جہاں ورلڈ چمپیئن سوربھ چودھری میڈل کے لیے دعویداری پیش کریں گے۔ وہیں جیولن تھرو میں انّو رانی پیدل دوڑ میں پرینکا گوسوامی، ڈسکس تھرو میں سیما انتل اور ہاکی میں وندنا کٹاریا میڈل کی دعوے داری پیش کریں گی۔

اولمپک میں بھارت کی نمائندگی کرنے والے ان کھلاڑیوں سے ویڈیو کانفرنسنگ کے ذریعہ بات کرکے وزیر اعظم نریندر مودی اور وزیر اعلیٰ یوگی آدتیہ ناتھ نے حوصلہ افزائی کی تھی۔

ان کھلاڑیوں کو اولمپک کا ٹکٹ حاصل ہونے کے بعد جہاں ان کے گھر، کنبے اور گاؤں میں خوشی کی لہر ہے وہیں میرٹھ کھیل اور اتھلیٹکس سنگھ نے بھی اسے کھلاڑیوں کے لیے ایک بڑا موقع مانتے ہوئے مستقبل میں نئی نسل کے کھیلوں کی طرف رجحان کے لیے بڑی کامیابی قرار دیا ہے۔

مغربی اترپردیش خاص طور پر میرٹھ کے کھلاڑیوں میں جذبہ، ہمت، حوصلہ اور محنت سب کچھ ہے۔ بس ضرورت ہے تو بنیادی ڈھانچے کو مضبوط کرکے سہولیات کو بہتر کرنے کی تاکہ وہ اپنے کھیلوں میں بہترین کارکردگی کا مظاہرہ کرکے ملک کے لیے میڈل حاصل کریں۔