عالمی وبا کورونا وائرس کی دوسری لہر پہلے سے کہیں زیادہ مہلک اور خطرناک ثابت ہو رہی ہے۔ گذشتہ کئی دنوں سے نئے مریضوں کی تعداد تین لاکھ سے بھی زیادہ ریکارڈ کی جارہی ہیں، جبکہ تین ہزار سے زائد ہلاکتیں ہورہی ہیں۔
نئے مریضوں کی تعداد میں اضافے کے دوران ہسپتالوں سے آکسیجن اور ادویات کی کمی کی شکایتیں بھی موصول ہورہی ہیں۔ اسی درمیان کٹھوعہ کے بلاک برنوٹی میں سرپنچوں نے دیہی ترقی کے لیے آئے ہوئے فنڈز کو صحت عامہ کے لیے عطیہ کرنے کا فیصلہ کیا ہے۔
اس سلسلے میں کٹھوعہ کے بلاک برنوٹی میں آج سرپنچوں کا اجلاس منعقد ہوا۔ اس کی صدارت بلاک برنوٹی کے چیئرمین راجیشور سنگھ انڈو نے کی۔ اجلاس میں اس بات پر اتفاق رائے ہوا کہ گاؤں کی ترقی کے لیے آیا ہوا فنڈ صحت عامہ کے لیے عطیہ کیا جائے۔ اس سلسلے دیہی ترقیاتی کونسل کے چیئرمین راجیشور سنگھ نے یہ معلومات صحافیوں کو دی۔
اس موقع پر انہوں نے کہا کہ' اس وقت سب سے زیادہ ضروری لوگوں کی جان بچانا ہے۔ جان ہے تو جہاں ہے۔ کسی بھی طرح کی ترقی انسان کی جان سے زیادہ ضروری نہیں۔ اس لیے ہم نے فیصلہ لیا ہے کہ ہمارے پاس آیا ہوا فنڈ میں سے 25 لاکھ روپے محکمہ صحت کو آکسیجن سلنڈر، بیڈ اور وینٹی لیٹر پر خرچ کیے جائیں گے'۔
