Congress Protest in Jammu راہل گاندھی پوسٹر کے خلاف جموں میں کانگریس کا احتجاج

کانگریس کارکنان نے ملک بھر میں آج بی جے پی کی جانب سے کانگریس کے سابق صدر راہل گاندھی کو" راون کی مشابہت" والا پوسٹر کے خلاف احتجاج کیا ہے۔ احتجاجیوں نے بی جے پی کے خلاف جم کر نعرہ باری کی۔

جموں:جموں کشمیر کی سرمائی دارالحکومت جموں میں آج پردیش کانگریس کمیٹی کی طرف سے بھارتیہ جنتا پارٹی کے خلاف احتجاج کیا گیا۔ اس دوران احتجاجیوں نے بی جے پی صدر جے پی نڈا کا پتلہ نذر آتش کیا۔

وہیں احتجاج میں شامل جموں کشمیر پردیش کانگریس کمیٹی کے ترجمان راویندر شرما نے بی جے پی کی جانب سے راہل گاندھی کا پوسٹر بنانے پر بی جے پی کو تنقید کا نشانہ بنایا۔انہوں نے کہا کہ بی جے پی کانگریس لیڈر کی بڑھتی ہوئی مقبولیت کو ہضم نہیں کر سکی اور سوشل میڈیا پر پوسٹر کی نمائش صرف پارٹی کی مایوسی کو ظاہر کرتی ہے۔ انہوں نے کہا کہ بی جے پی کی جانب سے راہل گاندھی کو راون کی طرح پیش کرکے ان کی توہین کی گئی ہے ایسا کرنا مناسب نہیں اور کانگریس اس کی مذمت کرتی ہے۔

دریں اثناہ سرینگر میں بھی کانگریس کے کارکنان نے بی جے پی کے خلاف احتجاج کیا۔اس دوران کانگرس کے درجنوں کارکنان نے بی جے پی اور وزیر اعظم نریندر مودی کے خلاف نعرہ بازی بھی کی۔ یہ مظاہرین سرینگر کے ایم اے روڈ پر مظاہرے کرنا چاہتے تھے لیکن پولیس کے اہلکاروں نے ان کو کانگرس صدر دفتر سے باہر جانے کی اجازت نہیں دی۔

واضح رہے کہ کانگریس کے سینئر لیڈر جے رام رمیش نے جمعرات کو ٹویٹر پر لکھا کہ آج بی جے پی نے اپنے آفیشل ٹویٹر ہینڈل پر ایک تصویر جاری کی ہے جس میں راہل گاندھی کو راون کے روپ میں دکھایا گیا ہے۔ کانگریس اس کی مخالفت کررہی ہے۔ یہ ایک رکن اسمبلی کی توہین ہے اور تشدد بھڑکانے کی بی جے پی کی سازش ہے۔انہوں نے کہا کہ بی جے پی کے سرکاری ہینڈل پر راہول گاندھی کو راون کے طور پر دکھائے جانے والے گرافک کے پیچھے اصل مقصد کیا ہے؟

قابل ذکر ہے کہ بی جے پی نے انسٹاگرام پر راہل گاندھی کی ایک تصویر شیئر کی ہے۔ جس میں وہ راون کی طرح نظر آ رہے ہیں۔ راہل کی تصویر کے ساتھ بی جے پی نے لکھا کہ وہ نئے دور کے راون ہیں۔ وہ مذہب اور رام کے خلاف ہے۔ وہ بھارت کو نقصان پہنچانا چاہتے ہیں۔